लूका 8

ईसून चेंगे चेन्डान आयचील

1 आनातले ईसू गेड़ेल-गेड़ेल आरू पोलबूल-पोलबूल ती मापोरबू आंगरूरान इसाब तो एडो पाटेन वेनपीक-वेनपीक चुल्लू मुरीयाकतेड आरू आ बारा जान चेलालेर ओन चेंगे मेन्डीर। 2-3 आरू बूत डुमेल चुम्मी मेन्डानेर कान तीग आरू बेमारूल तीग उजराक मेन्डान ओदो आयचील बेले मेन्डूव। आव ईव आय: मगदलीत मरीयम, इदीन कान तीगी सात गोटा बूत डुमेलीन ईसू पुच्ची मेन्डीड। आरू एरोदेस कोसीन बान्डारी कूजाल एन्डानेडीन आयाल योआन्ना, आरू सूसेन्ना, आरू कुबे आवूर आयचील मेन्डूव। ईव गो ताम्म देन तीग ईसू आरू ओन चेलालेर चाजूरान कामूग चेंग चियरूव।

वित्तील वीतूरानेडीन इसाब तो चोमजाकतान डाग्गा

(मत्ती 13:1-9; मरकू 4:1-9)

4 आनातले मारी बेड़तो जोप रून्डोतो आरू गेड़ेल-गेड़ेल तो लोग ईसून लेग्गाट वेर्रीर। तेबे ईसू ओरीन ओक चोमजाकतान डाग्गा पोक्केड। 5 “ओक वीतूरान मांजा वीतू पेतेड। ओड वीतेक ओदो पिटकेल पाव कुडी उरकोव, आरू आव रेमदी एञ्ञोव, आरू बादोर तो तीतेल वेरी किली तिन काट्टोव। 6 आरू ओदो चाटरे तो नेन्दील ती उरकोव, आरू पान्डोव, एरोड पोदूरान तूक चिला कान्डूक वेट चेन्डोव। 7 ओदो वित्तील एके चाकेल ती उरकोव आरू चाकेल चेंगे-चेंगे चान्दी किली आवीन चेपाकतोव। 8 आरू ओदो रेच्चाट नेन्दील ती उरकोव आरू पान्डी किली चोव गोटा गुबोड़ूल आगेर ” एनी किली ईसू, निक्के जोड़ ती “इमूंग केकोचील मेन्डाव चिला? तेबे ईम रेच्चा केकोचील ओनी वेनूर” एट्टेड।

वीतूरानेडीन डाग्गा नातो इसाबीन पोक्कूमो?

(मत्ती 13:10-17; मरकू 4:10-12)

9 ईसून चेलालेर ईसून ई चोमजाकतान डाग्गा नातो इसाब तो आय एनी जाच आडेर। 10 ओड आदूग, “मुन्नी पाकीक मेन्डू जे? आ मापोरबू जाम्मेनी आंगरूरान इसाब तो पाटेलीन इमूंग पुनूंग गियान चियरानो मेन्डा; एरोड ‘ओर चूड़ चूड़ी बेले चूड़ा मेनकेर आरू वेन वेनी बेले चोमजा मेनकेर’ एनी ओरोड चोमजाकतान डाग्गेल पोक-पोक्की ऊबूमेन” एट्टेड।

11 ई चोमजाकतान डाग्गेन इसाब इद आय: मापोरबून पोद्द वित्तील आकाट आय। 12 पाव कुडीत पिटकेल आकाटतेर वेनूंग वेनदार, एरोड ओर बिसवात चाजी बाचा मेनकेर एनी चेयतान वेरी किली ओर मेन्न ती मेन्डान पाटेलीन बूलकाक काडरा। 13 चाटरे तो नेन्दील ती पाडरान पिटकेल आकाटतेर एके वेड़के ती वेनदार आरू पातीयाकतार, एरोड वारकूल पान्डा कान्डूग डेन्डीक आर्रे बिसवात चाजी मेन्डार एरोड पोरकूरान सताव एरेक चाय काडरार। 14 चाकेल नाड़बूल उरकूरान पिटकेल आकाटतेर मापोरबून पोद्दीन वेनदार। एरोड ओर पीय पीयी मेनेक, ई मोंजीपूर तो किसीयाकतान इसाबूल आरू देन आरू वेड़का एरीकतान इसाबूल तो बिचारूल आ पोद्दीन चेपाकतानूग मापोरबून पाटा ओर मेन्न ती रेच्चा काम चियाया। 15 एरोड रेच्चाट नेन्दील ती उरकूरान पिटकेल आकाटतेर, पोद्दीन वेन्नी किली चेत्त आरू रेच्चाट मेन्न तीग पातीयाकतार आरू पालकूल पातरान आकाट तो मापोरबून मेन्न ती वेर्रान कामूलीन दिरजे ती चाजारे चेन्डार।

दिया इसाब तो चोमजाकतान डाग्गा

(मरकू 4:21-25)

16 “दियेन एडी पातीक किली नेकी बान्डवे ती पाकीकपारा चिलाड काटीया किड़ी इडारा। एरोड बीतराम वेर्रान लोगूग विलीज आट्टोको एनी कोलकी ती इडरार। 17 आटनी पाकी मेन्डान आकाट तोव मापोरबून पाटेल नाती चिल्लाव आरू पाड़चे-पाड़चे मेन्डान पाटेल बेले पारगूरा। 18 आदूग ईम एटे मापोरबून पाटेन वेनमोर आले आदीन लेक ती वेनूर। एटे एनोड एड बेले चोमजूराड ओनूग मारी बेले मापोरबू चोमजू आकेल चियराड आरू एड बेले चोमजाडा ओड तान नातोन चोमजी मेन्डान एनी बिचार चाजूराड आदीन बेले मापोरबू आयमूराड।”

ईसून ईय्या आरू तोल्लेनकूल

(मत्ती 12:46-50; मरकू 3:31-35)

19 आतोड ईसून ईय्या आरू तोल्लेनकूल ईसून लेग्गाट वेञ्ञेर, एरोड जोपीन चेत्तूग ओनोड बेट गाट एरू ओड़ेर। 20 तेबे ओकूर ईसून, “इम ईय्या आरू तोल्लेनकूल वाल इन्नोड बेट गाट एर्राम एनी वाल निलतेर नार” एट्टेड। 21 एरोड ईसू ओरीन, “मापोरबून पोद्दीन वेनदानेर आरू मानूरानेरी आन्न ईय्या आरू आन्न तोल्लेनकूल आय” एनी पोक्केड।

ईसू बेड़तो वाल्लीन आटकाकतानो

(मत्ती 8:23-27; मरकू 4:35-41)

22 मारी ओकेच ईसू आरू ओन चेलालेर ओडे ती चोत्तेर आरू ईसू ओरीन, “वेरूर सोमून्दीन आड़ञी किली आकलाट चेनार” एनी पोक्केड। तेबे ओर ओडेलीन कुयकीक किली गाटेर। 23 ओडा चेनेक-चेनेक ईसू तुञ काट्टेड। सोमून्द ती निक्के वाल्ली वेञ्ञो आरू ओडे ती नीर कोप्पू मुरीयाकतानूग ओर आबोड़ ती पाड्डी मेन्डीर। 24 तेबे ओर ईसून लेग्गाट वेरी किली ईसून चुनतीकतेर आरू “ए सियान! ए सियान! आम बूड़राम बे” एनी पोक्केर। तेबे ईसू चुलची किली वाल्लीन आरू नीर तो बेड़कूल एलकेलीन कावडेड आरू आव तेबोव आरू किटूक पाड चेन्डोव। 25 तेबे ईसू ओरीन, “इम बिसवात आट चेन्डो?” एट्टेड। ओर नारचेर आरू काबा एरी किली ओकूरीन ओकूर, “ऊड एट्टो मांजा आय? वाल्लीन आरू नीरीन बेले डागा चियमेड आरू आव बेले ऊन पाटेन पातूमोव” एट्टेर।

ईसू बूत डुमेल चुम्मी मेन्डानेडीन उजराकतानो

(मत्ती 8:28-34; मरकू 5:1-20)

26 मारी ओर गिरासेनीयो पेरगेन ती एदेर। आद गलील पेरगेन मुन्देल सोमून्द आकलाट मेन्डू। 27 ईसूलेर कुडी इड़ेक आ गेड़ेत ओक मांजा ईसून बेट गाट एञ्ञेड। ओन कान बूत डुमेल मेन्डूव। ओड कुबे दिनेत ले गान्डेल नूड़ा मेन्डीड आरू ओलेक बेले मेना मेन्डीड, एरोड माड़ाबाटेल ती नी डेरा मेन्डीड। 28-29 बूत डुमा ओनीन गेन-गेन ताकलीस चाजूरू आरू लोग ओनीन चिकरीलोड आरू बारेयूलोड काटकी किली राका चाजूरीर। एरोड बेले काटरानोन पुटतीड आरू बूत डुमेल ओनीन चिड़ा बाटतेल तूलपीक-तूलपीक चुनतूव। ईसू आ बूत डुमेन आ मांजेन कान तीग पेक एनी तियारतेड। आदूग ओड ईसून चूड़ी किली कोलार एञ्ञेड आरू ईसून मुन्देल उरकी किली निक्के जोड़ ती, “ए, पोडीत बेड़तो मापोरबून चिन्ड ईसूने! आनूंग इन्नोड नातो काम मेन्डा? आनीन सताकमेन एनी आन इनीन गुवारूकमेन” एट्टेड। 30 ईसू आदीन, “इन पिदीर नाताय?” एनी जाच आडेड। आदूग ओड “पालटेनकूल मान्दा” एट्टेड। एटे एनोड कुबे बूत डुमेल ओन कान मेन्डूव। 31 आरू आव ईसून आमीन पातालपूर चेनूर एनी पोकूमेन एनी उमडी गुवारतोव।

32 आतोड आना कोप्पे ती कुबे पेन्ड मान्दा चारा तिन्दूव। आदूगी बूत डुमेल ईसून, “आमीन आवीन कान तान्नू इड” एनी गुवारतोव। आदूग ईसू आवीन चेनूंग इट्टेड। 33 तेबे बूत डुमेल आ मांजेन कान तीग पेची किली पेन्डकूल कान चेन्डोव आरू आ पेन्डकूल डेंगाट पाड तीग तूली किली सोमून्द ती बूड़ी चाय्य चेन्डोव।

34 गाडीकूल पेन्डकूल नीर ती बूड़रानोन चूड़ी किली तूलेर, आरू गेड़े ती आरू पोलबूल ती चेनी किली आदीन काबेरीन पोक्केर। 35 आरू लोग एटे एञ्ञो एनी चूड़ू पेतेर, आरू ईसून लेग्गाट वेरी किली बूत डुमेल पेची चेन्डूव जे? आ मांजा ईसून केलूल लेग्गाट गान्डेल नूड़ी किली रेच्चा चुरते ती उन्डी मेन्डानोन चूड़ी किली नारचेर। 36 आरू ईसू चाजूरानोन चूड़रानेर, ओड बूत डुमेल चुम्मी मेन्डान मांजेन एटे उजराकतेड एन्डानोन वेर्रान लोगीन पोक्केर। 37 तेबे गिरासेनीयो पेरगेन तो आली पालीत जाम्मा लोगूग निक्के नार चेपाक मेन्डानूग, ओर ईसून ताम्म कान तीग चेन एनी गुवारतेर। आदूग ईसू ओडे ती चोक्की किली आना तीग मेल्लेड। 38 बूत डुमेल पेची चेन्डान मांजा ईसून, “आनीन बेले इन चेंगे वेरू इड” एनी गुवारतेड। एरोड ईसू ओनीन, 39 “ईन मेल्ली किली ओलेक चेन आरू लोगीन मापोरबू इनूंग एटो बेड़तो कामीन चाजेड एनी पोक” एट्टेड। आदूग ओड आना तीग पेची किली गुलाय गेड़े ती ईसू तानूंग एटो बेड़तो कामीन चाजेड एनी पोक चिञ्ञेड।

चाय्यरान माल आरू ओक बेमार तो आयाल

(मत्ती 9:18-26; मरकू 5:21-43)

40 ईसू आना तीग मेल्लानूग आना पाव चूड़ी मेन्डान जोप तो लोग ओनीन वेड़के ती बेट गाट एञ्ञेर। 41 आतोडी चूड़ याईर पिदीर तो ओक मांजा वेञ्ञेड। ओड एऊदीकूल बिन्ती जोड़रान ओलेक तो मुकीयाल मेन्डीड। ओड ईसून केलूल ती उरकी किली ओनीन, “आन्न ओलेक चाम” एनी गुवारतेड। 42 एटे एनोड ओनूग बारा बेरेक तो ओकाली माल मेन्डू, आरू आद चाय्यरान बातेर एरी मेन्डू।

तेबे ईसू चेनेक ओन बोँरेक निक्के जोप उरकी पाडरू। 43 आना बारा बेरेक ले मोरकोड बेमार तो ओक आयाल मेन्डू आरू आद तान्न देन मालीन केम्बूरूल चियरान गुनीयालेरूग चिय चियी पोली मेन्डू। एरोड बेले एडी आदीन रेच्चा उजराक ओड़ा मेन्डीर। 44 आद पोटतेल तीग वेरी किली ईसून गान्डा देड़ीन टोट्टो आरू तुरते नी आदीन नेतीर पेतानो तेबोतो। 45 तेबे ईसू, “आनीन एड आय टोट्टेड?” एनी जाच आडेड। आदूग, “आम पूनाम” एनी किली जाम्मा लोग पोक्केर। तेबे पतरस, “ए सियान! लोग इन पोटतेल कुबे लोग टेका टेक वेरमेर आरू चेपाकमेर” एनी पोक्केड। 46 एरोड ईसू एके, “आनीन एड आय आले टोट्टेर; एटे एनोड आन्न मेन तीग नोयकूडीन उजराकतान ताकोत पेची चेन्डो एनी आन ताड़ूमेन” एट्टेड। 47 आतोड आ आयाल, “आनूंग पाकू एराया” एनी किली तिरी-तिरी वेञ्ञो आरू ईसून केलूल पाड्डी किली जाम्मा लोगीन मुन्देल, तान नातेग ओनीन टोट्टो आरू एटे तान तुरते उजरोतो एनी पोकोतो। 48 ईसू आदीन, “नोनी! इन बिसवात इनीन उजराकतो; चुकनाय चेन” एट्टेड।

49 ईसू आटनी ऊब ऊबी मेनेक, एड आले एऊदीकूल बिन्ती जोड़रान ओलेक तो मुकीयाल याईरीन कान तीग वेरी किली, “इन माल चाञ्ञो ना। गुरून ओरबोर चियमेन” एट्टेड। 50 ईसू आदीन वेन्नी किली, “ईन नारचूमेन; आमान बिसवात चाजी मेन; आद बाचूरा” एट्टेड। 51 ओलेक वेरी किली ईसू पतरसीन, एऊनेन, याकूबीन आरू मालीन ईय्या, बुवेन चायी मारी एरीनी तान्न चेंगे बाकरा बीतराम वेरू इडेडा। 52 आतोड जाम्मा लोग आड़ आड़ी किली कोलार एरी मेन्डीर। ईसू एके ओरीन, “आड़मोर; ई माल चाय्यायी; आद तुञ्ञूमो” एट्टेड। 53 ओर आद चाञ्ञो ना एनी पुन्दानूग ओन पोडे नाव्वू मुरीयाकतेर। 54 एरोड ओड आदीन केय्य पात्ती कूयी किली, “ए मालीने! चुलूक” एट्टेड। 55 तेबे आद मारी जियोम पट्टो आरू आद तुरते चुलची उन्डोतो। मारी ओड, “आदूग तिनूंग नातोन बेले चियूर” एनी पोक्केड। 56 आदीन ईय्या बुवा काबा एञ्ञेर। एरोड ओड, “ओरीन ईटे एर्रानोन एरीनी पारगाकमोर” एनी तियारतेड।