ईसू पोईल चेलालेरीन कूयूरानो
5
1 ओकेच ईसू गन्नेसरत मुन्डेतa कुडी निलची मेन्डीड।
आदूग जोप तो लोग बोँरेक ले उरकी पाड्डी किली मापोरबून पाटेन वेनूंग वेञ्ञेर।
2 आरू ईसू सोमून्द कुडी इरडू ओडेलीन चूड़ेड।
मीनूल चुमरानेर ओडेल तीग इड़ी किली आ लेग्गे जारीलीन नोडरीर।
3 आ इरडू ओडेल तीग ओकूतीन का ईसू चोत्तेड।
आद सिमोनीनो मेन्डू।
तेबे ईसू आदीन कुडी तीग किन्डीक आकलाट टेगली चियूर एनी किली आना उन्डी किली आर्र तीग लोगीन मेरचीकतेड।
4 आरू ओड मेरचीक पोली किली सिमोनीन,
“गिड़ीया टिटाक ओडेन उय्यी किली मीनूल चुम्मू ईम जारीन तीनपूर” एट्टेड।
5 आदूग सिमोन,
“ए,
गुरू आम चित्ता विलोमी जारी तीनची पान्डोम;
ओक मीनी बेले चुमोमा;
आले ईन पोक्कूमोत;
आन जारी तीनतान” एनी पोक्केड।
6 आदूग ओर जारी तीनतानूग निक्के मीनूल वेञ्ञोव,
ओन जारी एके चार्रू मुरीयाकतो।
7 आदूग ओर आवूर ओडे ती मेन्डान ताम्म चेगा लोगीन केय्य चायगा टोटीक किली आमूंग चेंग चियूर एनी कूयेर।
आदूग ओर वेरी किली इरडू ओडेल ती मीनूलीन कोप्पीकतानूग ओडेल बूड़रान आकाट एर्रूव।
8-10 इदीन चूड़ी किली चेड़ीगेन मीनूलीन बेटूरानूग सिमोन पतरस आरू ओन चेंगेत जाम्मा लोग काबा एञ्ञेर।
आटनी सिमोनीन पाट लागेतेर मेन्डान जबदीन चिन्डूल याकूब आरू एऊना बेले काबा एञ्ञेर।
सिमोन ईसून केलूल पाड्डी किली,
“ए पोरबू!
आन ओक पापीयाल आय;
ईन आन्न लेग्गाट तीग गूच” एनी पोक्केड।
आदूग ईसू सिमोनीन,
“ईन नारचूमेन;
एबेतार्रे मीनूल चुमरानोत मेट्टोत;
इनेत ले ईन लोगीन मापोरबून पाव ती एन्देर्रात” एनी पोक्केड।
11 ओर ताम्म ओडेलीन चेक्काड एन्दरेर आरू जाम्मा बानीन चायी किली ईसून पोटतेल-पोटतेल चेन्डेर।
ईसू कोड़ बेमारतेडीन उजराकतानो
12 ओकेच ईसू ओक गेड़े ती मेनेक,
आना कोड़ बेमारूग निक्के नोयरान मांजा ओकूर वेञ्ञेड।
आरू ओड ईसून चूड़ेक मुड़दील उरकी किली “ए पोरबू इन मेन्न मेनोडेल आनीन चूत पाडरान तीग उजराक नाम्बीकतात”b एनी गुवारतेड।
13 तेबे ओड केय्य नीकीक किली ओनीन टोट्टेड।
आरू “आनूंग मेन्न मेन्डा;
ईन ओगराक एर” एट्टेड।
आरू तुरते नी ओन कोड़ बेमार चायोतो।
14 आदूग ईसू ओनीन चोमजाक किली,
“ईन एरीनी पोक्कूमेन,
एरोड ईन एके चेनी किली ईन उजरोत एन्डानोन पेलाचीन का टोटीक।
ओड इनीन चूड़ेकेड आरू ईन उजरूरानूग मूसाल मेनगा पोक्की मेन्डान बोदनेन चिय।
आटनी एरोड ईन उजरूरानूग ओगराक एञ्ञोत एनी लोगूग गोवाई एर्रा” c एनी तियारतेड।
15 एरोड बेले ओन पाटेल आदीक वेलारे चेन्डोव आरू आदीक जोप तो जोप लोग ओन पाटेल वेनूंग आरू ताम्म बेमार तीग रेच्चा एरू ओन कान कूड़ा एञ्ञेर।
16 एरोड ईसू चिड़ा बाट ती गेन एलगा चेनी किली बिन्ती जोड़ जोड़ी मेन्डीड।
ईसू लकवा बेमार तो मांजेन उजराकतानो
17 ओकेच ईसू मेरचीकपेक परीसीकूल आरू मूसाल नीतीन मेरचीकतानेर आना उन्डी मेन्डीर।
ओर गलील आरू एऊदीयेत जाम्मा पोलूबूल तीग आरू एरूसेलेम तीग वेरी मेन्डीर।
आरू बेमार लोगीन उजराक पोरबून ताकोत ईसून चेंगे मेन्डू।
18 इद चूड़ूर!
आतोड ओदो लोग लकवा तापरान बेमार तो मांजेन तान माड्डी मेन्डान चाट्टा चेंगे काञी किली एन्दरेर आरू ओनीन ईसू मेन्डान कान उय्यी किली ओन मुन्देल इड्डू बिचार चाजूरीर।
19 एरोड जोप मेन्डान चेत्तूग ओनीन बीतराम उय्यू ओड़ेर।
आदूग ओर चामकनाय मेन्डान इल पोडी चोत्ती किली कापरेलीन गुचाक किली,
ओनीन चाट्टा चेंगे लोग नाड़बूल ईसून मुन्देल इड़कीकतेर।
20 ईसू ओर बिसवातीन चूड़ी किली ओनीन,
“ए मांजेने!
इन पापदेरोमूल इनूंग माप एञ्ञोव” एनी पोक्केड।
21 तेबे मूसाल नीतीन मेरचीकतानेर आरू परीसीकूल,
“ऊड एड आय?
तानीन मापोरबून आकाट चोमजी किली मापोरबून निन्दरूमेड।
मापोरबून चायी एड पापदेरोमूलीन मापी चाजू नाम्बीकताड?”
एनी ताम-ताम बिचार चाजूरीर।
22 ईसू ओर मेन्न तो पाटेन ताड़ी किली ओरीन,
“ईम इम मेन्नूल ती नातोन पोका पोकी एरमोर?
23 इन पापदेरोम माप एञ्ञो एनी पोकरानो चेचीत तो आय काय चुलूक आरू ताक एनी पोकरानो चेचीत तो आय?
24 एरोड सरग तो मांजेगd लोगीन पापदेरोमूलीन माप चाजू मोंजीपूर ती पान्न मेन्डा एन्डानोन ईम पुनूंग लागूरा” एनी किली ओड आ लकवा बेमार तो मांजेन,
“आन इनीन पोक्कूमेन:
चुलूक,
चाट्टेन चुनतीक आरू आपला ओलेक चेन” एनी पोक्केड।
25 आदूग ओड तुरते नी चुलतेड आरू चाट्टेन चुनतीक किली,
मापोरबून चाराक किली तान्न ओलेक चेन्डेड।
26 ओनीन चूड़ी किली जाम्मा लोग काबा एरी किली मापोरबून चाराकतेर आरू निक्के नारची किली,
“इने आम काबा एर्रान कामूलीन चूड़ोम” एनी पोक्केर।
ईसू लेवीन कूयूरानो
27 आदीन ले पिटतेल ईसू आना तीग बाटतेल चेनी किली लेवी पिदीरतेड ओकूर पोटी पोटाकतान ओलेक ती उन्डी मेन्डानोन चूड़ेड आरू ओड ओनीन,
“आन्न पोटतेल वेर” एट्टेड।
28 आदूग ओड जाम्मा बानीन चायी किली चुलतेड आरू ओन पोटतेल चेन्डेड।
29 आरू लेवी तान्न ओलेक ती ईसूग ओक बेड़तो बोजी तितीकतेड आरू ओन चेंगे उन्डी किली तिन्दान कुबे पोटी पातरानेर आरू आवूर लोगीन बेड़तो जोप मेन्डू।
30 आरू परीसीकूल आरू ओर कान तो मूसाल नीतीन मेरचीकतानेर ओन चेलालेरोड गुर-मुराक किली,
“ईम नातेग पोटी पातरानेर आरू पापीकूलोड तिन्दार उन्डरार” एनी पोकरीर।
31 ईसू ओरीन,
“चुकनाय मेन्डान लोगूग केम्बूर चियरानेड लागाडा,
नोयरान लोगूग एके लागूराड।
32 आन देरमीकूलीन एरा,
एरोड पापीकूलीन मेन्नीन उजराकपूर एनी कूयू गो आय वेञ्ञेन नान” एनी पोक्केड।
नीवता मेन्डान इसाब ती चुवाल
33 ओर ईसून,
“एऊनेन चेलालेर गेन नीवता मेनमेर आरू बिन्ती जोड़ूमेर,
आरू परीसीकूल चेलालेर बेले आटनी चाजूमेर एरोड इन चेलालेर रोजे तिनमेर उनमेर” एनी पोक्केर।
34 ईसू ओरीन,
“ओदीर लोग चालनीडीन चेंगे मेनेक नीवता मेनारा।
आटनी आन्न चेलालेर,
आन ओर चेंगे मेनेक नांग नीवता मेन्डार?
35 एरोड चालनीडीन ओर कान तीग एलगाकतान दिना वेर्रा;
तेबे ओर आ दिनेल ती नीवता मेन्डार” एट्टेड।
36 आरू आटा नियोम ती तान मेरचीकतान पुन पाटेलीन मिसाक एराया एन्डानोन चोमजाक ईसू ओरीन ओक चोमजाकतान डाग्गेन बेले पोक्केड:
“एड एरको पुन्न गान्डेत दाड़केन चीकी किली आटा गान्डे ती जोड़ाकपारा।
आटनी चाजोड,
ओड पुन्न गान्डेन चारीकताड आरू पुन्न गान्डेत दाड़का आटोत कान मीसाया बेले।
37 एड एरको पुन आंगूर मेलीन तोल तो आटा जोरे ती पाच तापारा।
आटनी ताप्पोड आंगूर पाच पाड़ञेक आटा जोरा पोंगू ओड़ा कान्डूग पुन आंगूर पाच आदीन चारीकता आरू आंगूर पाच बेले वांगूरा।
आरू जोरा नाचरा।
38 पुन आंगूर पाचीन पुन जोरे ती तापरानो आय।
39 आरू एड एरको आटा आंगूर मेलीन उनोड,
पुन्न आंगूर मेलीन उनूंग मेन्न चाजाडा।
एटे एनोड आटोत निक्के रेच्चाट मेन्डा एनी पोकराड” एनी मेरचीकतेड।