मांजेन चूत चाजूरान बानील
7
1 परीसीकूल आरू एरूसेलेम तीग वेर्रान मूसाल नीतीन मेरचीकतानेर ओदेर ईसून लेग्गे बोँरेक उलजेर।
2 ओर ईसून चेलालेर ओदेर,
केय्य नोडाका बुरकून्ड केय्योड तिन्दानोन चूड़ेर आरू आदीन चूत पाट्टो एनी चोमजूरीर।
3 (परीसीकूल आरू जाम्मा एऊदीकूल,
पुरकेत लोगीन रीती रिवाजूल ती चेल्लानूग आ नियोमूल ती एटे-एटे मेन्डू आटनी-आटनी केय्य नोडाका तिनोड चूत मानूरीर।
4 आरू आटतेल चेनी किली वेरेक ताम्म नियोमूल तो इसाब ती केलूल नोडाका तिना मेन्डीर।
मुत्तेल कुन्डरील आरू ताम तो नेकीलूलीन नातेक मांजी किली तिन्दान आकाट तो कुबे इसाबूल बेले ओर नियोम ती मेन्डू।)
5 आटनी मेन्डानूग परीसीकूल आरू मूसाल नीतीन मेरचीकतानेर ईसून,
“इन चेलालेर पुरकेत लोगीन रीती रिवाजूल ती नांग चेलारा?
ओर एके केय्यूल नोडाका बुरकून्ड केय्योड तिनमेर” एट्टेर।
6 आदूग ईसू,
“ईम पोबाक एर्रानोर आय।
इम बीतेर ती,
मापोरबून कान तो काबेरीन एसाया मेनगा पोकरानो चेत्ते आय।
एटे एनोड,
‘ई लोग चोन्डोड गो आनीन इजीत चाजूरार;
एरोड ओर मेन्न एके आन्न ले कोमाड मेन्डा।
7 ओर आनीन पोका मोड़कूमेर।
ओर मेरचीकतानो आन्न इसाब तो एरा,
आव मांजा पोकरान नियोमूल आय’a
9 आरू ईसू ओरीन,
“ईम गो इम पुरकेतेर रीती रिवाजूलीन मानूरान चेत्तूग मापोरबून नियोमूलीन रेच्चा ई काट काड्डूमोर।
10 एटे एनोड मूसाल मेनगा,
‘ईम आपला ईय्या बुवेन इजीत मानूरानो आय,
आरू आपला ईय्येन चिलाड बुवेन चेरापूरानेडीन चाय्यारे तापरानो आय’b एनी मापोरबू पोकरानोन पोक्केड नाड।
11-12 एरोड ईम एके,
‘एड बेले आपला ईय्येन चिलाड बुवेन आन इमूंग एञ्ञोत बानीन चियरानो मेट्टो आदीन आन कुरबान आकाट बोदने ती मापोरबूग बेंट चोत्तीकतान एनोड,
आव जाम्मा आन्नी काटोव’ एन्डार गो;
पिटतेल ईम ओनीन,
ईय्या बुवेग नाती नी चियू इडारा।
13 आटनी तीग ईम इम पुरकेतेर रीती रिवाजूलीन चेत्तूग,
मापोरबून पाटेन काट काड्डूमोर,
आरू आटनीत कुबे कामूलीन बेले चाजूमोर” एट्टेड।
14 आनातले मारी ओड जोप तो लोगीन तान्न लेग्गाट कूयी किली,
“जाम्मा लोग आन्न पाटेन वेनूर आरू चोमजूर।
15 वाल तीग मांजेन बीतराम चेन्डानो नातो एरको ओनीन चूत पाटतीकपाया।
एरोड नातो एरको मांजेन कान तीग वाल पेता आद्दी ओनीन चूत पाटतीकता।
16 (इमूंग केकोचील मेन्डाव चिला?
तेबे ईम रेच्चा केकोल ओनी वेनूर”) एट्टेड।c
17 आनातले ईसू जोपीन चायी किली ओलेक चेन्डेड।
आरू आना एके ओन चेलालेर ओनीन,
“आ चोमजाकतान डाग्गेन आमीन चोमजाक चियू” एट्टेर।
18 आदूग ईसू,
“ईम एबले बेले चोमजू ओड़ोर नार आदूग?
मांजा तिन्दान बानील नातीन एरको तिनोड,
ओनीन आद चूत पाटतीकपाया।
19 नांग एनोड आव मेन्न ती चेनावा।
आव एके बोके ती चेन्डाव आरू पिटतेल इड़ूराव” (एनी किली ईसू तिन्दान बानी नातो एरको तिनोड चूत पाडाया एनी चोमजाकतेड)।
20 आरू मारी,
“मांजेन कान तीग पेतानो ई गो आय,
ओनीन चूत पाटतीकता।
21 नांग एनोड मांजेन मेन्न तीग कियाल तो बिचारूल पेताव।
आदीन चेत्तूग दोस पाडरानो,
डोंगरानो,
चाय्यारे तापरानो दारीयालेर एर्रानो,
22 जिवड़ेय एर्रानो,
जाम्मा इसाबूल तो कियाल,
चेतूर एर्रानो,
ऊबागेरी एर्रानो,
कुचेर एर्रानो,
लोगीन नेडीकतानो,
बोड़पान एर्रानो,
बाकवा एर्रानो,
23 ईटो जाम्मा कियाल तो इसाबूल मेन्न तीगी पेताव आरू आव्वी मांजेन चूत पाटतीकताव” एट्टेड।
सूरूपीनीकेत आयालीन बिसवात
24 आनातले ईसू आना तीग पेची किली सूर आरू सयदा लेग्गेत पोलूबूल टिटाक चेन्डेड।
आरू आना ओक ओलेक बीतराम तान्नेड आरू “एडी तान आना मेन्डानोन पूना मेनकेर” एनी पोक्केड।
एरोड बेले ओड आना मेन्डानो,
लोगूग पाता चेलोतो।
25-26 आदूग एऊदीकूल चिला युनानीd जाती तो आयाल बेले ईसू आ ओलेक मेन्डानोन जानोतो।
आ आयाल सूरूपीनीके ती जेनोम एर्रानो आय।
आदीन मालीन एके बूत डुमा चुम्मी मेन्डू।
आदूग आ आयाल ईसून कान वेरी किली ओनीन केलूल पाट्टो।
आद ईसून,
“आन्न मालीन का मेन्डान बूत डुमेन वालीक चियू” एनी गुवारतो।
27 आदूग ईसू,
पोईल एऊदी लोगीन उजराकतानो आय एन्डानोन आ आयालूग चोमजाक,
डाग्गेन आकाट “एन्देर्रान रोटीलीन पोईल आपला चिन्ड पापकूलूग तिनूंग चियरानो आय।
पापकूलूग इड्डी मेन्डान रोटीलीन नेत्तेल मुन्देल तीनतानो रेच्चा एरा” एनी पोक्केड।
28 आदूग आ आयाल,
“ओ!
पोरबू,
एरोड बेले पापकूल तिनेक टेबूल तीग उरकूरान जूटेन नेत्तेल तिन्दावी तेबे” एनी किली ईसू एऊदीकूलीन उजराक गो वेञ्ञेड नाड,
एरोड बेले आवूर लोगीन इडोम आडोम बेले,
किन्डीकेच उजराक पाडरानोन डाग्गेन आकाट पोक्की किली चोमजाकतो।
29 आदूग ईसू,
“रेच्चा पोक चिञ्ञोत,
ईन चेन,
इन मालीन कान मेन्डान बूत डुमा पेची चेन्डो” एट्टेड।
30 आटनी एन्डानूग आ आयाल तान्न ओलेक चेन्डो।
आद चेनेक माल एके काटये ती माड्डी मेन्डू आरू बूत डुमा बेले आदीन कान तीग गूची मेन्डू।
तोतूर्रान बायरालीन ईसू उजराकतानो
31 आनातले ईसू सूर गेड़े तीग सयदा पावोड पेची किली दिकपूलीस (देस गेड़ेल) देचेन लेग्गेत गलील सोमून्द कुडी वेञ्ञेड।
32 आना ओन का ओक मांजेन ओदेर एन्दरेर।
ओड बायराल आरू तोतराल बेले आय।
ओर ईसून,
“इनूंग जुवार लागोको;
ई बायरालीन टोड्डू” एनी गुवारतेर।
ईसू ओनीन टोडोड,
आ चेपाल उजरूराड एनी आटनी पोक्केर।
33 आनातले ईसू आ बायरालीन जोप तीग एलगाक किली ओन केकोचीलीन तान्न वान्देलोड टोट्टेड आरू तान्न वान्दे ती ऊची किली ओन नेवान्डीन टोट्टेड।
34 आनातले ईसू सरग टिटाक चूड़ेड आरू किसीयाक किली निक्के नेञेड आरू ओनीन एपाता एट्टेड।
एपाता एनोड चानची एर एन्डानो आय।
35 आटनी एनेक आ मांजेन केकोचील वेनूंग एञ्ञोव आरू ओन नेवान्ड एनकोतो;
आदूग रेच्चा ऊबू एञ्ञो।
36 आनातले ईसू आनात लोगीन,
“ईम,
आन ओनीन उजराकतानोन एरीनी मुरले पोकरानो एरा” एट्टेड।
ओड एत्ती पारगाकमेन-पारगाकमेन एन्डीड आले आदूग ले आगेर ओर पारगाकपारे चेन्डेर।
37 आटनी मेन्नी किली जाम्मा लोग काबा एञ्ञेर आरू “ओड जाम्मा रेच्चा ई चाजूमेड,
बायरालीन बेले वेनपीकमेड आरू कोन्दालीन बेले ऊबीकमेड” एट्टेर।