एऊना 7

ईसू गुड़सेल तो तियारूग चेन्डानो

1 आदीन ले पिटतेल ईसू गलील देचे ती चुल चुल्ली मेट्टेड। आरू एऊदीकूलीन सियानकूल ओनीन आनकीक कानतानूग, ओड एऊदीया देचे ती चेनाना एनी उवाट चाजेड। 2 आरू एऊदीकूलीन गुड़सेल तो तियार एदी मेन्डू। 3 आदूग ईसून तोल्लेनकूल ओनीन, “ईन इना तीग पेची किली एऊदीया देचे ती चेन। तेबे ईन चाजूरान कामूलीन इन चेलालेर बेले चूड़ेकेर। 4 एड एरको पिदीर कामाक मेन्न चाजूरानेड, तान्न कामूलीन पाकी किली चाजाडा। ईन ईटो कामूलीन चाजूरानूग, मोंजीपूर तो लोगीन टोटीक” एट्टेर। 5 एटे एनोड कुदे ईसून तोल्लेर बेले ओनीन बिसवात चाजा मेन्डीर। 6 आदूग ईसू ओरीन, “आन काम चाजूरान बेरा एदायी गाट। एरोड इम बेरा एतोड नांग इना मेन्डा। 7 ई मोंजीपूर ती आनीन माना लोग इम्मोड कुचेर एरारा, एरोड आन्नोड कुचेर एर्रार। एटे एनोड आन ओर विरूद ती ओर चाजूरान कामूल कियाल तोव आय एनी टोटीकमेन। 8 ईम ई तियारूग चेनूर; आन वेराना; एटे एनोड आन्न बेरा एबे पूरायी” एट्टेड। 9 ईसू ईटे पोक्की किली गलील ती नी तेबेड। 10 एरोड ओन तोल्लेनकूल तियारूग चेन्डान पिटतेल, ओड बेले पारगोड एरा कियाल, पाकी किली चेनी मेन्डीड। 11 एऊदीकूलीन सियानकूल एके ओनीन तियार ती “ओड आरे मेन्डाड?” एनी कानतीर। 12 आरू ईसून इसाब ती जोप तो लोग कुच कुचनाय बानीग-बानीग ऊबूरीर। ओदेर, “ओड रेच्चाल मांजा आय” एन्डीर। आरू ओदेर एके, “एरा, ओड लोगीन बूलकाकमेड” एन्डीर। 13 एरोड बेले एऊदीकूलीन सियानकूलूग नारची किली एडी ओन इसाब ती पारगोड ऊबा मेन्डीर।

एरूसेलेम ती ईसू मेरचीकतानो

14 आरू तियार चिरीक तो ओक पारी एर्रानूग, ईसू गुडी ती चेनी किली केडीक मुरीयायतेड। 15 तेबे एऊदीकूलीन सियानकूल काबा एरी किली “ऊड पोड़ाका एटे बुदी बेटेड रे?” एट्टेर। 16 आदूग ईसू ओरीन, “आन केडीकतानो आन्नोत एरा, एरोड आद आनीन चोटतान मापोरबूनो आय। 17 एड बेले मापोरबू उवाट चाजूरान आकाट चाजू कानपोड, आन केडीकतानो मापोरबूनो आय काय, आन्न पान्न ती पोक्कूमेन? एनी पुन्दाड। 18 एड एरको तान्न उवाट ती ऊबूराड, ओड तानूंग इजीत तो मान कामाक आटे चाजूराड; एरोड एड तानीन चोटतानेडीन इजीत तो मान एरीक कानताड, ओन का चेत्त मेन्डा, आरू ओन का नाती पोन्ददी पाटा चिल्ला। 19 एटे मूसाल इमूंग नियोमूलीन चियेडा आदूग? एरोड बेले इम कान तीग एडी आ नियोमीन मानारा। ईम आनीन नांग आनकीक कान्डूकमोर?” एट्टेड 20 आदूग जोप तो लोग, “इनीन बूत डुमा चुमोतोना; एड आय इनीन आनकीक कान्डूकमेड?” एट्टेर। 21 आदूग ईसू, “आन ओक पोरलेत कामीन चाजेन आरू ईम जाम्मा काबा एञ्ञोर। 22 मूसाल इमीन कुडरान नियोम चिञ्ञेड; (ई नियोम मूसाल मेनगेनो एरा, एरोड इम पुरकेतेर वादेक ले आटनी चेलूरू)। आरू ईम पाबूरान चिरीक चेपकूल जियोम पाड तो तीप तोलीन कुडरार। 23 एपोर, मूसाल नियोम जूका मेनको एनी, पाबूरान चिरीक जियोम पाड तो तीप तोलीन कुडीकमोर एरोड, आन ओकूर मांजेन पाबूरान चिरीक उजराकतानूग, ईम नांग आन्न पोडे रिच एरमोर गो? 24 नातो एरको चूड़ू एटे टोन्ड़ूमोव, आवीन इसाब ती ईम आवीन नियाव चिड़ाकपाका, नातो चेत्तेगी चेत्तेतोव आय आवीन इसाब ती नियाव चिड़ाकपूर” एट्टेड।

एटे ईसू ई मसीयाल आय?

25 तेबे एरूसेलेमतेर ओदेर, “लोग चाय्यीक कान्डूकमेर जे? आ मांजा ऊडी एरा आदूग? 26 एरोड चूड़ूर, ओड जाम्मा लोगीन मुन्देल मेरचीकमेड, आरू ओर नाती बेले एनारा तेबे? एटे एऊदीकूल मुकीयालेर चेत्ते ऊडी आय एनी ताड़ेर काय एटे? 27 आम गो, ई मांजा आरे तीग वेञ्ञेड नाड एनी पुट्टोम। चेत्त गो इद आय: मसीयाल वेरोड ओड आरे तीग वेर्राड एनी एडी पूनार” एट्टेर।

28 तेबे ईसू गुडी ती केडीकपेक, ओड जोड़ ती निक्के कोलार एरी किली, “इम आनीन चेत्ते पुट्टोर आरू आन आरे तीग वेञ्ञेन नान, आदीन बेले पुट्टोर एनी, ईम बिचार चाजूमोर। एरोड आन आन्न उवाट तीग वेरानी, आनीन चोटतानेड चेत्तेतेड आय, ईम ओनीन पूनायोर मेन्डार। 29 एरोड आन एके ओनीन पुट्टेन, एटे एनोड आन ओन कान तीगी वेञ्ञेन नान, आरू ओड आनीन चोटतेड नाड” एट्टेड। 30 आदूग ओर मारी ओनीन चुम्मू उवाट चाजूरीर। एरोड एडी बेले ओनीन टोडेरा, एटे एनोड ओनूग मापोरबू नीतीक मेन्डान बेरा एदाका मेन्डू। 31 एरोड बेले जोप तो कुबे लोग ओनीन बिसवात चाजेर आरू “एटे मसीयाल वेरोड, ई मांजा एंगोटा पोरलेत काम तो चिनेलीन चाजेड नाड, आवूग ले बेले आगेर तो पोरलेत काम तो चिनेलीन चाजूराड आदूग?” एट्टेर।

एऊदीकूल ईसून चुमरान उवाट

32  जोप तो लोग कुच कुचनाय ईसून इसाब ती, ईटे पोकरानोन वेट्टेर। आरू बेड़कूल पेलाचकूल आरू परीसीकूल ओनीन चुम्मू गुडीत पालटेनकूलीन चोटतेर। 33 मारी ईसू, “आन इम चेंगे मारी किन्डीक कोम्बेर आर्रे मेन्डान, आरू मारी आनीन चोटतानेडीनेल चेन्डान। 34 ईम आनीन कानतार एरोड बेटारा। आरू आन मेन्डानेल ईम चेनूंग ओड़ार” एट्टेड। 35 एऊदीकूलीन सियानकूल ओकूरीन ओकूर, “ई मांजा आरो पाड ती चेन्डाड बे आदूग, आम ऊनीन कान्डूक ओड़ाम? ऊड आम्म लोग बुरलेर नार जे? आ युनान तो गेड़ेल ती चेनी किली, युनानीकूलीन केडीकताड बे काय एटे? 36 ‘ईम आनीन कानतार, एरोड बेटारा’ आरू ‘आन मेन्डानेल ईम चेनूंग ओड़ार’ एनी ओड पोक्की किली, नातो पोक्कू कान्डूकमेड?” एनी ऊबूरीर।

जियोम चियरान नीर तो पेरेड

37 बासी तियार चिरीक बेड़तो चिरीक आय। आ चिरीक ईसू निलची किली कोलार एरी किली, “एरूग एरको नीर आन्डोड ओड आन्नेल वेरी किली उनकेड। 38 एड आन कान बिसवात चाजूमेड, ओन कान मापोरबून कागेत ती लिका मेन्डान आकाट ‘ओन मेन्न तीग जियोम चियरान नीर तो पेरेड पोड़ता’” एट्टेड। 39 इदीन ईसू, लोग तानीन बिसवात चाजोड बेटूरार जे?, आ नाती केचूर चिला जियोमीन बीतेर ती पोक्केड। एरोड ईसू आपलेग एर्रान इजीत तो मानीन एबलेत्तार्रे बेटा कान्डूक, बिसवात चाजूरान लोगूग नाती केचूर चिला जियोमीन एबलेतार्रे मापोरबू चियाका मेन्डीड।

ईसून बीतेर ती लोगीन ऊबाचील

40 तेबे जोप तो ओदो लोग इदीन वेन्नी किली, “ऊड चेत्तेगी पाटा चियी मेन्डान, मापोरबून कान तीग काबेर वेन्नी किली लोगीन पोक चियरान गुरू आय” एट्टेर। 41 आरू आवूर ओदो लोग एके, “ऊडी मसीयाल आय” एट्टेर। एरोड मारी ओदेर एके, “एटे मसीयाल गलील देचे तीग वेर्राड आदूग? 42 एटे मापोरबून कागेत ती मसीयाल दाऊदीन तेरानतेड आरू दाऊद मेन्डीड आ बेतलेएम पोलूब तीग वेर्राड एनी लिका चिल्ला आदूग?” एट्टेर। 43 आटनी एरी जोप तो लोग ईसून इसाब ती पुटा-पुटा एञ्ञेर। 44 ओर कान तीग ओदेर ओनीन चुम्मू कानतीर, एरोड एडी ओनीन टोडेरा।

बिसवात चाजा मुकीयालेर

45 आदूग गुडीत पालटेनकूल, बेड़कूल पेलाचकूल आरू परीसीकूल लेग्गाट मेलेरनेर। आदूग ओरीन, “ईम नांग ओनीन चुम्मी किली एन्देरपोरा?” एनी जाच आडेर। 46 आदूग पालटेनकूल, “ओड ऊबूरान आकाट एडी एतोडी ऊबारी” एनी जवाब चिञ्ञेर। 47 आदूग परीसीकूल ओरीन, “ईम बेले दोका तिन्दोर काय एटे? 48 आरोई बेले एऊदीकूल मुकीयाल, चिलाड परीसीकूल ओन कान बिसवात चाजेर आदूग? 49 एरोड नियोमूलीन पूना ई जोप तो लोगूग चेराप काटूरा ई” एट्टेर।

50 मुन्नी ईसून लेग्गाट चेनी मेन्डीड जे? आ निकूदेमूस परीसीकूल कान तीग ओकूर मेन्डीड। ओड ओरीन, 51 “आम्म नियोम तो नीती ती एरीन एरको, ओनोन वेन्नी किली, ओड नातो चाजेड नाड आदीन पाता लागाकतान ले मुन्नी नियाव चिड़ाक एराया” एट्टेड। 52 आदूग ओर एके ओनीन, “ईन बेले गलीलतोत आय काय एटे? मापोरबून कागेतीन रेच्चा पोड़ोड गलील तीग एडी मापोरबून कान तीग काबेर वेन्नी किली लोगीन पोक चियरान गुरू वेराडा एनी, इनूंग पाता चेल्ला” एट्टेर।

53 [तेबे ओर जाम्मा ई आना तीग आपला-आपला ओलेकूल ती बाग काट्टेर।