एऊना 8

1 एरोड ईसू एके जेतून पिदीर तो कोप्पे ती चेन्डेड।

दोस पाडरान कामूल ती बिड़ी मेन्डान आयाल।

2 आनातले ओड पोक्काई गुडी ती मारी चेन्डेड, आरू जाम्मा लोग ओन लेग्गाट वेञ्ञेर, आरू ईसू उन्डी किली ओरीन केडीक मुरीयाकतेड। 3 तेबे मूसाल नीतीन मेरचीकतानेर आरू दोस पाडरान कामूल चाजेक चुमरान ओकाल आयालीन एन्दरेर, आरू आदीन जाम्मेन नाड़बूल नीतीक किली, 4 “ए गुरू! ई आयाल दोस पाडरान कामूल चाजेक देरा पाट्टो ना। 5 मूसाल नीती आमीन ईटो आयालीन केलकूलोड ताप्पूर एनी तियारूकमो; एरोड ईन इदीन इसाब ती, एटे चाजूरानो आय एनमोत आले?” एट्टेर। 6 ओर ओनीन बोदी चियू एर्रा एनी, केचूर पुच्चू ईटे जाच आडेर। एरोड ईसू एके चिंगरू जीती किली, नेन्दील ती तान्न वान्देनोड लिकू मुरीयाकतेड। 7 ओर गेन-गेन जाच आडी-आडी मेन्डानूग, ओड तेल्लीन पोडी एतीक किली ओरीन, “इम कान तीग एड मुरले पापदेरोम चाजाडी, ओडी आदीन पोईल केल्ल तापेकेड” एट्टेड। 8 आरू ओड मारी चिंगरू जीती किली नेन्दील ती लिकू मुरीयाकतेड। 9 एरोड लोग आदीन वेन्नी किली मुत्ताकेर ले पात्ती जाम्मा, ओकूर-ओकूर आना तीग गूचारे चेन्डेर। आटनी एरी आना ओकूरी ईसू बाचेड, आरू ओन मुन्देल आ आयाल बेले निलची मेन्डू। 10 ईसू तेल्लीन पोडी एतीक किली आदीन, “ए मा, ओर जाम्मा आट चेन्डेर? इनीन नियाव चिड़ाकतानेड ओकूर बेले चिल्लाड काय एटे?” एट्टेड। 11 आदूग आ आयाल “ए पोरबू, एडी बेले चिल्लार” एट्टो। तेबे ईसू, “आन बेले इनीन नियाव चिड़ाकपाना तेबे; चेन; एरोड एपोर मारी पापदेरोम चाजूमेन” एट्टेड।]

ईसू मोंजीपूर तो लोगूग विलीजीन आकाटतेड आय

12 आनातले ईसू मारी बेले लोगीन, “आन ई मोंजीपूर तो लोगूग विलीजीन आकाटतेन मेन्डान। एड एरको आन्न पाटेल ती चेलूरार, ओर चीकोड ती चेलारा, एरोड ओरूग जुग-जुग तो जियोमीनेल उयरान विलीज मेन्डा” एट्टेड। 13 आदूग परीसीकूल ओनीन, “ईनी इन गोवाईन कुदे चियमोत, आदूग इन गोवाई चेत्ते तो एरा” एट्टेर। 14 आदूग ईसू ओरीन, “एबे आन कुदे आन्न इसाब ती गोवाई चियोड बेले, आन्न गोवाई चेत्ते तो आय। एटे एनोड आन आरे तीग वेञ्ञेन नान, आरू आरे चेन्डान बे एनी आन पुट्टेन। एरोड ईम एके, आन आरे तीग वेञ्ञेन नान आरू आरे चेन्डान बे एनी पूनार। 15 ईम मांजेन नियोम ती नियाव चिड़ाकतार। आन एरीनी नियाव चिड़ाकपाना। 16 एरोड एबे आन नियाव चिड़ाकपोड बेले, आद चेत्ते तो आय। एटे एनोड आन ओकूरी एरा, एरोड आनीन चोटतान बुवा आन्न चेंगे बिड़ी किली, आम इरूल नियाव चिड़ाकताम। 17 आरू इरूल बिड़ी किली गोवाई चियोड, ओर पोकरानो चेत्ते आय एनी, इम नीती ती बेले लिका मेन्डा। 18 आन कुदे आन्न इसाब ती पोईलात गोवाई चियमेन। आरू आनीन चोटतान आम्म बुवा, आन्न इसाब ती दुसेर गोवाई चियमेड” एट्टेड। 19 तेबे लोग ओनीन, “इम बुवा आरे मेन्डाड?” एट्टेर। आदूग ईसू, “ईम आनीन बेले पूनार आरू आम्म बुवेन बेले पूनार। ईम आनीन पूनोड गो आम्म बुवेन बेले पुन्दूरमीन” एट्टेड। 20 ई पाटेलीन ईसू, मापोरबून गुडी ती मापोरबूग चान्दा चियरान सुन्दूप लेग्गे मेन्नी किली केडीकतेड; एरोड एडी ओनीन चुम्मेरा। एटे एनोड ओनीन चुमरान बेरा पूराका मेन्डू।

आन, आन पोक्कूमेन जे? आटनीतेन आय

21 ईसू ओरीन मारी ओपोट, “आन चेन्डान बे। आरू ईम आनीन कानतार। एरोड ईम एके इम पापदेरोम चाजूरान तीगी चाय्यरार। आन चेन्डान कान ईम वेरू ओड़ार” एट्टेड। 22 आदूग एऊदीकूलीन सियानकूल, “एटे ऊड तानीन तानी आनकीक एर्राड बे काय एटे की? आदूगी आय ‘आन चेन्डानेल ईम वेरू ओड़ार’ एनमेड काय एटे” एट्टेर। 23 ईसू एके ओरीन, “ईम किड़ीतोर आय, आन एके पोडी सरग तीग वेञ्ञेन नान; ईम मोंजीपूरतोर आय, आन एके ई मोंजीपूरतेन एरान। 24 आदूगी आय आन इमीन, ईम इम पापदेरोम चाजूरान तीगी चाय्यरार एनी मेन्डीन। ईम आनीन, आन पोक्कूमेन जे? आटनीतेन आय एनी पातीयाकपाकोड, ईम इम पापदेरोम चाजूरान तीगी चाय्यरार” एट्टेड। 25 आदूग ओर ईसून, “ईन एड आय?” एनी जाच आडेर। आदूग ईसू ओरीन, “आन टेट ले इमीन पोक्कूमेन जे? ओडी आय। 26 इम बीतेर ती पोक्कू आरू इमीन नियाव चिड़ाक, आन्न लेग्गे कुबे बानील मेन्डाव। एरोड आनीन चोटतानेड चेत्तेतेड आय, आरू आन ओन तीग नातोन वेट्टेन नान, आदीन मोंजीपूर तो लोगूग पोक चियमेन” एट्टेड। 27 एरोड ओर ईसू ओरीन तान्न बुवेन बीतेर ती पोक पोक्की मेन्डाड एनी चोमजेरा। 28 आदूग ईसू ओरीन, “ईम सरग तो मांजेन कुरूस पारे ती चोत्तीकतान पिटतेल, आनीन, आन पोक्कूमेन जे? आटनीतेन आय, आरू आन, आन्न पान्न तीग नाती नी चाजाना, एरोड एटे बुवा आनीन मेरचीकतेड, आटनी ई पाटेलीन पोक्कूमेन एनी चोमजूरार। 29 आरू आनीन चोटतानेड आन्न चेंगे मेन्डाड। ओड आनीन ओकूरी चायेडा; एटे एनोड आन एतोड एरको ओनूग मेन्न ती वेर्रानोनी चाजूमेन” एट्टेड। 30 ओड ई पाटेलीन पोक पोकी मेनेकी कुबे लोग ओन कान बिसवात चाजेर।

चेत्त इमीन चोड़ाकता

31 आनातले ईसू तानीन बिसवात चाजूरान एऊदीकूलीन, “ईम आन्न पोद्दीन मान मानी मेनोड, ईम चेत्तेगी आन चेलालेर आय। 32 आरू ईम चेत्तीन पुन्दार आरू चेत्त इमीन चोड़ाकता” एट्टेड। 33 आदूग ओर, “आम गो इबराईमीन तेरानतोम आय, आरू आम एतोडी एर कामीयालेरी एरामी, मारी नांग ईन आमीन, ‘चोड़ाक एर्रार’ एनमोत?” एट्टेर। 34 ईसू ओरीन, “आन इमीन चेत्ते पोक्कूमेन, एड एरको पापदेरोम चाजूरानेड पापदेरोमीन कामीयाल आय। 35 आरू कामीयाल एतोड नांग कुटूमतेड मेनाडा, एरोड चिन्ड एके एतोड एरको आयची कुटूमतेड मेन्डाड। 36 आदूगी चिन्ड इमीन चोड़ाकपोड ईम चेत्तेगी चोड़ाक एर्रार। 37 ईम इबराईमीन तेरानतोर आय एनी आन पुट्टेन। एरोड बेले आन्न पोद्दूग, इम गेरोब ती पाड चिल्ला कान्डूग ईम आनीन आनकीक कान्डूकमोर। 38 आन आन्न बुवेने मुन्देल नातीन चूड़ेन नान आदीनी पोक्कूमेन, आरू ईम एके इम बुवेन तीग नातीन वेट्टोर नार आदीनी चाजूरार” एट्टेड।

ईम, इम बुवा चेयतानीन पापकूल आय

39 आदूग ओर ओनीन, “आम्म बुवा गो इबराईम आय” एट्टेर। आदूग ईसू, “एबे ईम इबराईमीन पापकूल एरोड, ईम बेले इबराईम एटे चाजी मेन्डीड आटनी चाजूरूरमीन। 40 एरोड ईम एके मापोरबून तीग वेन्नी मेन्डान चेत्तीन पोकरान, आनीन आनकीक कान्डूकमोर। इबराईम गो आटे चाजेडा। 41 ईम इम बुवा एटे चाजूमेड आटनी चाजूमोर” एट्टेड। मारी ओर ईसून, “आम दारीयाट कामूल तीग जेनोम एरामी। आमूंग ओकूरी बुवा आय मेन्डाड। ओड मापोरबू आय” एट्टेर। 42 ईसू ओरीन, “मापोरबू इम बुवा आय एरोड गो, ईम आनीन चोग चाजूरूरमीन। एटे एनोड आन मापोरबून तीगी आय वेञ्ञेन नान, आरू एपोर आन इना मेन्डान। आन कुदे आन्न उवाट तीग वेरानी, एरोड ओडी आय आनीन चोटतेड नाड। 43 ईम आन पोकरानोन नांग चोमजू ओड़ोर नार? ईम आन्न पोद्दीन वेनूंग मेन्न चाजा कान्डूग गो। 44 ईम, इम बुवा चेयतानीन पापकूल आय, आरू ईम, इम बुवेन उवाट ती चेलू कान्डूकमोर। टेट ले ओड आनकीकतानेड मेन्डीड, आरू ओड एतोडी चेत्तीन मेन्न चाजेडा। एटे एनोड ओन कान किन्डीक बेले चेत्त चिल्ला। ओड पोन्ददी पाटा पोक्केक, तान्न गेरोब तीग पोकराड। एटे एनोड ओड पोन्ददी पाटेल ऊबूरानेड आय, आरू ओड जाम्मा पोन्ददी पाटेलीन उपजाकताड। 45 एरोड आन एके चेत्त पोक्कूमेन, आदूगी आय ईम आनीन बिसवात चाजारा। 46 इम कान तीग एड आनीन पापीयाल आय एनी केचूर लागाक नाम्बीकतार? आरू आन चेत्त पोकोड, ईम नांग चेत्त पातीयाकपारा आदूग? 47 एड मापोरबूनेड आय, ओड मापोरबून पोद्दूलीन वेनदाड; आरू ईम मापोरबूनोर चिल्लार; आदूगी आय ओनोन वेनारा” एट्टेड।

आन इबराईमीन ले बेले मुन्नीत ले मेन्डीन

48 इदीन वेन्नी एऊदीकूल ओनीन “एटे आम ‘ईन सामरीतोत आय एनी पोकरानो, आरू इन कान बूत डुमा मेन्डा’ एन्डानो चेत्ते एरा आदूग?” एट्टेर। 49 आदूग ईसू, “आन्न कान बूत डुमा चिल्ला; एरोड आन आम्म बुवेन इजीत चाजूमेन, आरू ईम एके आनीन इजीत चुम्मूमोर। 50 एरोड आन, आनीन लोग इजीत तो मान चियेकेर एनी कानपाना। ओ, ओकूर मेन्डाड ओड आदीन कानताड; आरू ओडी नियाव चिड़ाकताड। 51 एबे एड एरको आन्न पोद्दीन मानोड, ओड जुग जुगूग चाय्यकूडीन बेटाडा एनी, आन इमीन चेत्तेगी पोक्कूमेन” एट्टेड। 52 आदूग एऊदीकूल ओनीन, “एपोर आम इन कान बूत डुमा मेन्डा एनी पुट्टोम। इबराईम चाञ्ञेड, आरू मापोरबून कान तीग काबेर वेन्नी किली लोगीन पोक चियरान गुरूकूल बेले चाञ्ञेर। आरू ईन एके ‘एबे एड एरको आन्न पोद्दीन पातीयाकपोड, ओड जुग जुगूग चाय्यकूडीन बेटाडा’ एनमोत। 53 आम्म पुरकेत बुवा इबराईम गो चाञ्ञेड, एटे ईन ओन ले बेड़तोत आय आदूग? आरू मापोरबून कान तीग काबेर वेन्नी किली लोगीन पोक चियरान गुरूकूल बेले चाञ्ञेर; ईन इनीन एड आय एनमोत आले?” एट्टेर। 54 आदूग ईसू, “आनी आनीन चाराकपोड, आदीन ती पायदा चिल्ला, एरोड आनीन इजीत तो मान एरीकतानेड आम्म बुवा आय, ओनीनी ईम ‘आम्म मापोरबू आय’ एनमोर। 55 एरोड ईम ओनीन पूनोर नार; आन ओनीन पुट्टेन; आरू आन ओनीन पूनान एनोड, आन बेले इम आकाट पोन्ददी आय। एरोड आन एके ओनीन पुट्टेन आरू ओन पोद्दीन मानूमेन। 56 इम पुरकेत बुवा इबराईम आन वेर्रान बेरेन चूड़ू एनी वेड़का एरी मेन्डीड; आरू ओड चूड़ी किली ऊदीम एञ्ञेड” एट्टेड। 57 आदूग एऊदीकूल एके ओनीन, “ईन गो एबे पोचास बेरेकतोत बेले एराती आरू ईन इबराईमीन एटे चूड़ोत नात?” एट्टेर। 58 तेबे ईसू ओरीन, “आन इमीन चेत्तेगी पोक्कूमेन, आन इबराईमीन ले बेले मुन्नीत ले मेन्डीन” एट्टेड। 59 आदूग ओर ईसून ताप्पू केलकूल पेटकेर; एरोड ईसू एके पाक पाकी मापोरबून गुडी तीग वाल पेतेड।