एऊना 9

ईसू ओक कानालीन उजराकतानो

1 ईसू पावोड चेनेक ओक जेनमूकेत ले कानाल मेन्डान मांजेन चूड़ेड। 2 आदूग ओन चेलालेर ओनीन, “ए गुरू! ऊड तानी पापदेरोम चाजूरानूग कानाल जेनमेड काय, ताम्म ईय्या बुवा पापदेरोम चाजूरानूग आय?” एट्टेर। 3 आदूग ईसू, “ऊड कुदे तानी बेले पापदेरोम चाजूरानूग एरा, आरू ताम्म ईय्या बुवा बेले पापदेरोम चाजूरानूग एरा, एरोड मापोरबू ऊनीन उजराक किली तान्न ताकोतीन टोटीक एरको एनी आय, कानाल जेनमेड। 4 आनीन चोटतानेडीन कामीन, आमूंग चेत्तेगी, पाकटा मेनेकी, चाजूरानो आय। एटे एनोड चीकोड वेर्रा बे आतोड एडी नाती कामीन चाजू ओड़ार। 5 ई मोंजीपूर ती मेन्नारे, आन ई मोंजीपूर तो लोगूग विलीजीन आकाटतेन मेन्डान” एट्टेड। 6 आटनी एनी किली, ईसू नेन्दील ती ऊचेड आरू आना तीग किन्डीक आकाट तूकीन जोबा चाजेड आरू आदीन कानालीन बोम्मेल ती मेत्तेड। 7 आरू ओनीन, “चेन आरू चीलोम एन्डान गुट्टे ती मोकोमीन नोड काड” एट्टेड। (चीलोम एनोड चोटतानो आय।) आदूग आ कानाल चेन्डेड आरू मोकोमीन नोट्टेड आरू मेलेरपेक चूड़रानेड एरी वेञ्ञेड। 8 आनातले ओन लेग्गेत लोग, आरू ओनीन मुन्नी मुटी आडेक चूड़रानेर, “ई मांजा उन्डी किली मुटी आडूरीड जे?, ओडी एरा आदूग?” एट्टेर। 9 ओदेर, “ऊड ओडी आय” एट्टेर; एरोड आवूर ओदेर एके, “ऊड ओड एरा। ओन आकाट टोन्डूमेड” एट्टेर। आदूग आ कानाल तानी “आन आयची मांजा आय” एट्टेड। 10 आदूग लोग ओनीन, “इनूंग एटे तीग चूड़ू एञ्ञो?” एनी जाच आडेर। 11 आदूग ओड “ईसू एन्डान मांजा जोबा चाजी किली आन्न बोम्मेल ती मेत्तेड आरू आनीन, ‘चेन आरू चीलोम गुट्टे ती नोड काड’ एट्टेड। आदूग आन चेन्डेन आरू आन नोडूके आनूंग चूड़ू एञ्ञो” एट्टेड। 12 आनातले लोग ओनीन, “ओड आरे मेन्डाड?” एट्टेर। आदूग ओड “आन पूनान” एट्टेड।

13 लोग मुन्नी कानाल मेन्डीड जे? ओनीन लेग्गे उञ्ञेर। 14 ईसू जोबा चाजी किली आ कानालीन उजराकतेड जे? आ दिना पाबूरान चिरीक मेन्डू। 15 आदूग परीसीकूल बेले ओनीन मारी ओपोट, “ईन एटे ती चूड़ू मुरीयाकतोत?” एनी जाच आडेर। आदूग ओड ओरीन, “ओड आन्न बोम्मेल ती जोबेन मेत्तेड, आन आदीन नोट्टेन आरू एपोर आन चूड़ू नाम्बीकमेन” एट्टेड। 16 ओदो परीसीकूल, “ऊड पाबूरान चिरीकीन मानाडा; आदूग ई मांजा मापोरबून टिटाकतेड एराड” एट्टेर। एरोड मारी ओदेर, “पापीयाल मांजा एटे ती ईटो पोरलेत काम तो चिनेलीन चाजू नाम्बीकताड?” एट्टेर। आटे तीग ओर पुटा-पुटा एलगेर। 17 आदूग ओर मारी ओपोट आ उजरूरान कानालीन, “इनीन उजराकतेड एनमोत जे?, ओनीन ईन एड आय एनमोत?” एट्टेर। आदूग ओड, “ओड मापोरबून कान तीग काबेर वेन्नी किली लोगीन पोक चियरान गुरू आय” एट्टेड।

18 एरोड एऊदीकूलीन सियानकूलूग आतोड बेले ऊड कानाल मेन्डीड आरू एपोर चूड़ूमेड एनी चेत्त एरा मेन्डू। ओर कानाल मेन्डीड जे? आ मांजेन ईय्या बुवेन कूयी किली, 19 ओरीन, “ऊड इम चिन्ड आय काय एटे? ऊनीन ईम कानाल जेनमेड एन्डूर जे? ऊड मारी एपोर एटे ती चूड़ूमेड गो?” एनी जाच आडेर। 20 आदूग ओन ईय्या आरू बुवा, “ऊड आम्म चिन्ड आय आरू कानाल जेनमेड एनी आम पुट्टोम। 21 एरोड ऊड एपोर एटे ती चूड़ूमेड आरू एड ऊनीन चूड़ीकतेड, आदीन आम पूनाम। ओड तान्न इसाब ती पोक्कू नाम्बीकतान बातेरतेड आय; ओनीनी जाच आडूर; ओड तान्न इसाब ती तानी पोक चियराड” एट्टेर। 22 (ओन ईय्या बुवा एऊदीकूलीन सियानकूलूग नारचूरीर; आदूग ईटे पोक्केर; एटे एनोड एड बेले ईसून आय एनी मानोड, ओनीन एऊदीकूल बिन्ती जोड़रान ओलेक वेल ती गीर कीची वाल पुचराम एनी एऊदीकूलीन मुकीयालेर ओकती चोर एरी मेन्डीर।) 23 आदूगी आय ओन ईय्या बुवा, “ओड तान्न इसाब ती पोक्कू नाम्बीकतान बातेरतेड आय; ओनीनी जाच आडूर” एट्टेर।

24 तेबे ओर मारी ओपोट आ उजरूरान कानालीन कूयेर, आरू, “ईन मापोरबूग इजीत तो मान चियी किली किरीया तिन आरू चेत्तीन पोक, आम ऊड पापीयाल आय एनी पुट्टोम” एट्टेर। 25 आदूग ओड, “आन गो ओड पापीयाल आय काय एट्टेड आय आले, नाती नी पूनान। एरोड आन कानाल मेन्डीन आरू एपोर चूड़ूमेन एनी पुट्टेन” एट्टेड। 26 ओर एके मारी ओनीन, “ओड इनीन एटे चाजेड? आरू एटे ती इनीन चूड़पीकतेड?” एट्टेर। 27 आदूग ओड ओरीन, “आन इमीन मुन्नी गो पोक्केन, ईम गो वेनोरा। एपोर मारी नांग वेनूंग कान्डूकमोर गो? ईम बेले ओन चेलालेर एरू कान्डूकमोर काय एटे?” एट्टेड। 28 तेबे ओर ओनीन कावडी किली, “ईनी आय आ मांजेन चेलाल, आम गो मूसाल मेनगेन चेलालेर आय। 29 आम मापोरबू मूसाल मेनगेनोड ऊबेड एनी पुट्टोम; एरोड ई मांजा, आरे तीग वेञ्ञेड नाड एनी पूनाम” एट्टेर 30 आदूग आ उजरूरान कानाल, “ओड आरे तीग वेरमेड एन्डानोन ईम पूनार एरोड, इद काबा एर्रान पाटा आय। एरोड बेले ओड आनीन चूड़ीकतेड। 31 मापोरबू पापीयालेरोन वेनाडा, एरोड एड तानीन मोड़की किली ओन उवाटीन चाजूराड, ओनोन मापोरबू वेनदाड एनी आम पुट्टोम; 32 आरू मुन्नीत वादेक ले एडी जेनमूकेत ले कानाल मेन्डान मांजेन उजराकतेड एनी वेनाका मेन्डूम। 33 ई मांजा मापोरबून तीग वेराकोड ओड नाती नी चाजू ओड़ेडमीन” एट्टेड। 34 ओर ओनीन, “ईन गो जेनमूकेत ले ई पापीयाल जेनमोत नात, ईन आमीन नातो मेरचीकमोत?” एनी किली ओनीन एऊदीकूल बिन्ती जोड़रान ओलेक तीग गेपलाक किली वाल पुच्चेर।

35 ईसू ओर ओनीन वाल पुच्चेर एनी वेट्टेड आरू ओनोड बेट गाट एरी किली, “ईन सरग तो मांजेन कान बिसवात चाजूमोत काय एटे?” एट्टेड। 36 आदूग आ मांजा, “ए पोरबू ओड एड आय आदूग आन ओनीन बिसवात चाजेकेन?” एट्टेड। 37 ईसू ओनीन, “ईन ओनीन मुन्नीत ले चूड़ोत नात बेले; आरू ओडी आय इन्नोड ऊबूमेड” एट्टेड। 38 आनातले ओड, “ए पोरबू, आन बिसवात चाजूमेन” एनी किली ईसून केलूल पाड्डी ओनीन मोड़केड। 39 तेबे ईसू, “चूड़ायेर चूड़ेकेर, आरू चूड़रानेर एके कानालेर एरकेर एनी आन ई मोंजीपूर ती नियाव चिड़ाक वेञ्ञेन नान” एट्टेड। 40 ओन लेग्गे मेन्डान परीसीकूल ओदेर आटे पोकरानोन वेनी किली ओनीन, “आटेकोड आम बेले कानालेर आय आदूग?” एट्टेर। 41 आदूग ईसू ओरीन, “एबे ईम कानालेर मेट्टोर एरोड पापदेरोम चिलायोर मेन्डूरमीन, एरोड एपोर ईम, ‘आम चूड़ूमोम’ एनमोर; आदूगी आय इम पापदेरोम एबले बेले मेन्डा ई” एट्टेड।