रेच्चाट गाडीड आरू ओन मेन्डेल
10
1 “एड एरको मेन्डेल गूड़े ती वेल पावोड चेनूंग चायी,
आरो बेले आवूर पावोड चोक्की किली बीतराम चेन्डानेड डोंगाल आरू कांगार आय एनी आन इमीन चेत्ते पोक्कूमेन।
2 एरोड एड एरको वेल पावोड गूड़ा बीतराम चेन्डाड,
ओडी मेन्डेल गाडीड आय।
3 गूड़े ती राका मेन्डानेड ओनूग वेल चानची चियराड।
तेबे गाडीड,
तान्न मेन्डेलीन पिदीर पात्ती कूयूराड आरू आव ओन पोल्लेन वेनदाव आरू ओड आवीन वाल पुचराड।
4 आरू तान्न जाम्मा मेन्डेलीन वाल पुचरान ले पिटतेल,
ओड आवीन मुन्देल-मुन्देल चेन्डाड आरू ओन मेन्डेल ओन पोटतेल-पोटतेल चेन्डाव;
एटे एनोड आव ओन पोल्लेन पुट्टोव।
5 एरोड आ मेन्डेल एतोडी पूना मांजेन पोटतेल चेनावा।
आव एके ओन कान तीग एलगा तूल्लाव;
एटे एनोड आव ओन पोल्लेन पुनाव” एट्टेड।
6 ईसू ई डाग्गेन आकाट तोन लोगीन पोक्केड।
एरोड ओर एके ओड तामीन नातोन पोक्केड एनी चोमजेरा।
ईसू ई आय रेच्चाल गाडीडीन आकाटतेड
7 तेबे ईसू मारी ओरीन “आन इमीन चेत्ते पोक्कूमेन,
आनी आय मेन्डेल गूडे ती तानरान,
वेल पावीन आकाटतेन।
8 आरू आन्न ले मुन्नी एंगोटा लोग वेञ्ञेर,
ओर जाम्मा डोंगालेर आरू कांगारकूल आय।
एरोड मेन्डेल एके ओरोन वेनोवा।
9 आन आय लोग मापोरबूनेल चेन्डान वेल पावीन आकाट मेन्डान।
एड एरको आनीन बिसवात चाजोड आन ओनीन बाचाकतान।
ओड गूडा बीतराम वेल पावोड तान्नी किली आरू वाल पेची किली रेच्चाट चारा तिनूंग नाम्बीकतान मेन्डेन आकाट तान्न बोजीन बेटूराड।
10 डोंगालेर आमान डोंगू,
चाय्यीक आरू नाचाक आय वेर्रार;
आवूर नाती कामूग वेरारा;
एरोड आन एके इमूंग जुग-जुग तो जियोम चियू आरू ईम आदीन चेड़ीगेन बेटोकोर एनी आय वेञ्ञेन नान।
11 आनी आय रेच्चाल गाडीडीन आकाटतेन।
आरू रेच्चाल गाडीड,
तान्न मेन्डेलूग आपला जियोमीन ओपीक चियराड।
12 एरोड मेन्डेलीन सावकार मेनाका,
बूतीग कोतानेड मिना कोलीयेल वेर्रानोन चूड़ी किली मेन्डेलीन चायी तूल्लाड;
आरू मिना कोलीयेल मेन्डेलीन चुमराव आरू आवीन बुरलाक काडराव।
13 बूतीग कोतान मांजा तान पोरू,
बूतीग मेन्डेलीन कोतानूग,
ओड मेन्डेलूग किसीयाकपाका तूल्लाड।
14-15 आन आय रेच्चाल गाडीडीन आकाटतेन।
आरू एटे बुवा आनीन पुट्टेड,
आरू आन ओनीन पुट्टेन आटनी आन आन्न मेन्डेलीन पुट्टेन आरू आन्न मेन्डेल बेले आनीन पुट्टोव।
आरू आन आन्न मेन्डेलूग आन्न जियोमीन ओपीक चियरान।
16 आनूंग मारी बेले आवूर मेन्डेल मेन्डाव,
एरोड आव ई गूडेतोव एराव।
आनूंग आवीन बेले एन्देर्रानो आय।
आव बेले आन्न पोल्लेन वेनदाव आरू इयची गूडे ती वेरी किली तानराव।
आदूग आव ओकती मान्दा एर्राव,
आनातले जाम्मेगी ओकूरी गाडीड एर्राड।
17 आन,
आन्न जियोमीन मारी पातेकेन एनी ओपीक चियरान।
आदूगी आय आम्म बुवा आन्नोड चोग ती मेन्डाड।
18 आदीन एडी आन्न कान तीग आयमू ओड़ाड;
एरोड आनी कुदे आन्न मेन्न तीग आदीन ओपीक चियरान।
आदीन ओपीक चियू आनूंग पान्न मेन्डा आरू मारी पातरान पान्न बेले मेन्डा आरू ई पान्न आनूंग आम्म बुवेन तीग टोन्डोतो ना” एट्टेड।
19 ईसू ई पाटेलीन पोकरानोन वेनदानूग एऊदीकूल मारी बेले,
ओर पुटा-पुटा एलगेर।
20 आरू ओर कान तीग कुबे लोग “ऊनीन बूत डुमा चुमोतोना,
आरू ऊड बाया एञ्ञेड नाड।
ईम नांग ऊन पाटेलीन वेनमोर आले?”
एट्टेर।
21 आवूर लोग एके,
“ओड ऊबूरानोव बूत डुमेल चुम्मी मेन्डान मांजेनोव एराव,
चेत्तेगी बूत डुमा कानालीन चूड़ीकपाया” एट्टेर।
आन आरू आम्म बुवा ओकती चोर ती मेन्डाम
22 आनातले पाञ्ञील वादेक एरूसेलेम ती मेन्डान मापोरबून गुडीन ओगराकतान तियार एदोतो।
23 आरू ईसू गुडीत सुलेमानीन चिन्द देवड़ी ती चुरलूरीड।
24 तेबे एऊदीकूल वेरी किली ईसून बेड़ेर आरू ओनीन,
“ईन आमीन एत्ती दिनेत्तार्रे ई पाटेन पाकीक मेन्डात?
ईन चेत्ते मसीयाल आय एरोड टिट्टे-टिट्टे पोक” एट्टेर।
25 आदूग ईसू,
“आन गो इमीन पोक्केन नान।
एरोड ईम गो आन्नोन बिसवात चाजारा।
आन आम्म बुवेन पिदीर ती चाजूमेन जे?
आ पोरलेत इसाबूल कुदे आन्न इसाब ती गोवाई चियमोव।
26 एरोड ईम आन्न मान्देत मेन्डेल आकाटतोर एरा,
आदूगी आय ईम बिसवात चाजारा।
27 आन्न मेन्डेल आकाट मेन्डान आन्न लोग,
आन्न पोल्लेन वेनदार,
आरू आन ओरीन पुट्टेन आरू ओर आन्न पोटतेल-पोटतेल वेर्रार।
28 आरू आन ओरूग जुग-जुग तो जियोम चियरान,
आरू ओर एतोडी नाचारा,
आरू ओरीन एडी आन्न केय्य तीग आयमू ओड़ाड।
29 ओरीन आनूंग बेटाकतान आम्म बुवा जाम्मेग ले लावतेड आय आरू ओरीन एडी आम्म बुवेन केय्य तीग आयमू ओड़ाड।
30 आन आरू आम्म बुवा ओकती चोर ती मेन्डाम” एट्टेड।
एऊदीकूल ईसून केलकूलोड मारी ताप्पू कानतानो
31 आनातले एऊदीकूल ईसून मारी ताप्पू केल्लकूल पेटकेर।
32 ईसू ओरीन,
“आन इमीन बुवेन टिटाक ले कुबे रेच्चाट कामूलीन टोटीकतेन;
आना तीग आरो कामूग आय ईम आनीन केल्लकूलोड ताप्पू कान्डूकमोर?”
एट्टेड।
33 आदूग ओर ओनीन,
“आम इनीन नाती रेच्चाट कामूग केल्लकूलोड तापामा,
एरोड ईन ओक आमान मांजा आय आरू ईनी इनीन मापोरबू एरीक किली ईन मापोरबून निन्दरूमोत नाना,
आदूगी आय” एट्टेर।
34 ईसू ओरीन,
“एटे इम नियोम ती,
‘आन,
इमीन बोगवानकूल आय एट्टेन नान’ एनी लिकाa चिल्ला आदूग?”
एट्टेड।
35-36 “एटे एरूग मापोरबून पाटा टोन्डोतो ना ओरीन बोगवानकूल एनी मापोरबू पोक्केड एरोड,
मापोरबू तानूंग एलगाक किली ई मोंजीपूर ती चोटतेर्रान आनीन सोजे ‘आन मापोरबून चिन्ड आय’ एन्डानूग,
ईम एटे ‘ईन मापोरबून निन्दरूमोत’ एनमोर आले?
मापोरबून कागेत ती पोकरानो एत्तोड नांग चेत्ते तो मेन्डा।
37 आन आम्म बुवेन कामूलीन चाजेना मेन्डान गो,
ईम आन्न पोडे बिसवात चाजूरानोन चाय काडूर;
38 एरोड आन बुवेन कामूलीन चाजूमेन एरोड,
ईम आनीन बिसवात चाजाकोड बेले,
आ कामूलीन गो,
बिसवात चाजूर।
तेबे ईम आवीन तीग,
बुवा आन्न कान मेन्डाड आरू आन बुवेन कान मेन्डान एनी चोमजूरार” एट्टेड।
39 तेबे एऊदीकूल मुकीयालेर ओनीन चुम्मू मारी ओपोट उवाट चाजेर।
एरोड ईसू एके ओर केय्य तीग बाची किली पेतेड।