Oiimna osi ksaaudu
35
Moises zooñun bowk Israel uzuuz , jak boko: ''Ŋun ŋndaŋi ŋoko ŋun ŋnsi NYEEK jakŋi nde antom nde do. 2 Nde ka ŋnu 6 ŋnsi utihun; onu ojaandun o onu onhimni ze nde, ksaaudu ksi phyoŋ ksi NYEEK. Ña andoli utihun zonu ominzun apfiŋo. 3 Nde ika asehun uroo nin zun nde oonzi zonu ksaaudu.''Un onhaaloi osi oku
4 Moises pot lado na uzooñnor uzuuz usi bowk Israel, antom jaa: '' Un ondai oko un NYEEK jaki nde: 5 Nde hulun NYEEK un onhaaloi osi nde kai. Ña ankai ujuuns unhwobi na mnjona akbina un onhaaloi osi NYEEK injaka mhuru, prat na kobre, 6 injaka mmuz nfulamul uz, purpura na karmesin, mmuz miknjilmi, na ifal isi opi, 7 injand isi ŋmpalalu nkal inowohi na karmesin, na injand isi ŋiit na mndera mnsi akasya, 8 mnsitidos mnsi olivera psehun nkandel, ŋun ŋnjai ka ñeel un onliili na mnsitidos mnsi pkir ña ze kfa lo, na nsensu uz injai ka ñeel un onliili, 9 ilaak isi sardonika na ilaak inkai ulur yoi pzwo zoyenknin nmpenen Uzi na kdeki ujuns.
Ŋun ŋnsi nku
10 ''Boiinz bonlipuki uz antom sum Oyek osi ulipl bo ka bi pdo ŋun ŋnsi NYEEK jaki boko bolemp uzuuz : 11 Oku, na oku uzoñnor, na ileri olo, insawaŋ, itaagwa mndera akasya, ilaankun na isap yolo, na iluzi isap; 12 ukau Uzi na ilaapi wolo, kleri ksi kñago, na inoŋnt ileri wolo, 13 omes na ilaapi wolo, ŋun olo uzuuz na opoŋ oiimna, 14 okandel antom pfiiz zunu, na infasi olo na mnsitidos antom pzu ze mezu ŋolo, 15 pkak psi nsensu na ilaapi polo, mnsitidos mnsi pkir ña ze kfa boko, knoŋt ksi oneeji oku; 16 pkak psi un onhaaloi onturoi, na iraami isi kobre, na ilaapi polo na ŋun polo, usya usi kobre na isap wolo, 17 inoŋnt isi unaam na isap na iluzi polo, knoŋt ksi oneeji unaam; 18 iriiŋi na ital isi oku, na iriiŋi isi unaam na ital yolo; 19 bo bina yun itiimo isi botihun zun ze iimna, yun iimna isi npenen Uzi akndwoi Aroŋ na yun itiimo isi bowk, antom botihunarin injaka bopenen Uzi.''
Baña bina ŋun ŋhaaloŋi
20 Ka Uzoñnor bowk Israel uzuuz pun zurun Moises, 21 Baña uzuuz bosi ijuuns boko siinkhi, bonkaki oyeek osi phutnor, bo bi bina un onhaaloi phul NYEEK antom pleemp oku osi uzooñnor, na yun itiimo iimna. 22 Hunkran, boiinz na bohaz uzuuz , na ijuuns boko hutnori, bo bina ifivela ifiu isi kzuuz na iñene, imiun, na ŋun uzuuz ŋñigi mhuru; ña ze boko a ka bi psoond un onhaaloi osi mhuru phul NYEEK. 23 Baña uzuuz bonkaki mmuz nfulamul, purpura na mnjenkle, na mmuz miknjilmi, ifal opi, knjand ompalalu knouki mbau mnjenkle, khilun pho knjand ksi ngoŋar mnzup , bo bina ŋa uzuuz . 24 Baña uzuuz bombiuki na un onhaaloi osi prat, osi kobre boyana ŋa injaka un onhaaloi phul NYEEK. Baña uzuuz bonkaki mndera mnsi akasya bo hil akyana ma zun utihun. 25 Bohaz uzuuz bonlipki bonhiki ptap mmuz bo hil akbina ŋun bolempŋi na iñen boko: mmuz nfulamul, purpura, karmesin na mmuz miknjilmi. 26 Bohaz uzuuz bosi ijuuns boko hutnorhi, bonhiki psulun ifal opi bo hil a ksulun ya. 27 Boyeek bina ilaak isi sardonika na ilaak iloŋo isi priza, oi pzwo ze mhuru mnsi oyenknin kdeki ujuuns usi nmpenen Uzi. 28 Bo sa bina mnsitidos mnsi nkadel, na ŋun ŋnjai ka ñeel un onliili osi mnsitidos mnsi pkir ña zoyar lo opseh kfa zutihun, na nsensu mikñeelmi un onliili. 29 Boiinz na bohaz bosi Israel uzuuz bosi ijuuns boko hutnori, bonsinki phyana un onhaaloi osi utihun usi NYEEK jaki, ze mntuum Moises, antom odolo, boyana ŋun ŋminzŋun na ijuuns boko uzuuz , injaka un onhaaloi osi NYEEK.
Uzi du Bezaleel na Aoliabi
30 Moises jak bowk Israel: ''Nde tenun, NYEEK du Bezaleel, awk Uri, awk Ur, ninsi kiiñ Juda, 31 ka oyek Uzi sumun lo kme, ulipl, na kme zutihun pfej ŋunu, 32 antom a o ña anjuli zutihun usi pmarkar na plemp mhuru, prat na kobre, 33 antom pfal ilaak isi ulur, pzu yolo ze mhuru, pfej mndera, na utihun uzuuz usi pfej ŋunu. 34 Uzi sa hula uz, alo na Aoliabi, awk Aysamaki, ninsi kiiñ Daŋ, phutnor antom pjukjukun boloŋo. 35 Usumun boko ulipl antom boho baña bonjulki zutihun usi pmarkar na ŋntihun ŋnsumŋi, injaka pmarkar, na plemp mmuz nfulamul, purpura na mnjenkle, na mmuz miknjilmi na utihun usi plir knoŋt.