Oliure Opugzan
Ipun
Oneeji Olado
Kiiñ Jako ze Ejitu
1
1Indai oun itiim bowk Jako, one Israel bonhyaaki na lo ze Ejitu. Kana ña na bowkoliin. 2 Rubeŋ, Symeoŋ, Levi na Juda. 3 Isakar, Zebuloŋ na Benjamiŋ, 4 Daŋ, Naftali, Gadi na Aser. 5 Baña uzuuz bosi kiiñ Jako bo hil o 70, ka Jose hil o ze Ejitu. 6 Jose bi kezi, na pzaro lo uzuuz, na baña uzuuz bosi nkil ŋminzŋun. 7 Bowk Israel bi buki, bundar ankint sum maakrin; bo ka philun, ankint sum osaak.8 Ka nliin nhalu ani pme un oloŋ zojir Jose bi nazo liho ze Ejitu. 9 A jak bopugi lo: "Nde tenun! Baña Israel bobundari, sum ankint pe nja pka ofooza." 10 Nde biiri, nja do ulipl na boko, antom boki kbundar, zonkont ogut bi o, bo ki kbi koulor na bobir nja, pgutun zojir boko, kseh osaak. 11 Bozu boten utihun bonhoki boyeek botihun duzu boko, bonornorun boko na utihun ofooza. Hunkran bowk Israel lempdun Faro imbaau isi injiiu, ze Pitoŋ na Ramses. 12 Ka mi boknornornunk boko, hunkran bo kpedun pbundar, ankint sum osaak. hunkran bojitu siinkdun kliinki bowk Israel. 13 Ka hunkran Bojitu zudun bowk israel utihun utaamb. 14 Bo do baka kjoozi ze phila na kliinsi zutihun pol oful plemp itisol, na ŋntihun ŋnsi ijaar uzuuz . Ze ŋntihun ŋminzŋi uzuuz bo pe pdo baka khuzin.
Bobukbukun yeel pfiŋ Bopoz
15 Nliin Ejitu lado na bobukbukun boebreu, one Sifra na Puwa, 16 jak boko: Ze nde ya pziinkun bohaz boebreu ze khuk, zuliit bohaz aika bukna, nde tenun, ze nmpoz o ñiinz, nde fiŋ naa; a sa o ñaaz, nde ika fiŋa. 17 Ka bobukbukun kalo Uzi, bozi do injaka mi nliin Ejitu jakmunk boko. Hunkran bo baapdun phila bopoz boiinz. 18 Ka nliin Ejitu du boko, jak boko: Ezi ka nde do un ominzi hutun bopoz boiinz na phila? 19 Ka hunkran bobukbukun jakdun Faro: Bohaz boebreu bozi zok na bohaz bosi Ejitu; zonkont boka philun, boakbuk bowk boko, kero nmbukbukun azo jau ze baka, antom pziinkun boko. 20 Ka Uzi zu mnjona ze bobukbukun; hunkran bopugi bundardun antom ka philun maakrin. 21 Ze mi bobukbukun kalomunk Uzi, Uzi zu baka phyah ze pliin boko. 22 Antom ka Faro jak bopugi lo: Bopoz boiinz uzuuz bombukoki ze boebreu nde lisun baka ze krik Nilu, ze bo o bompili nde hutnan baka na phila.