Moises buko
2
Ñiinz aloŋ nnsi kiiñ ksi Levi animro na ñaaz nnsi kiiñ kminzkun, 2 ñaaz bi lempoo, buk nmpoz ñiinz. Ze mi ahimunk ja anuroo, ka menun lo kli 3. 3 Azi pot bi hilun pmenun naa, ka jek pntuuru pnliirpi na mpupa mnjai ka mai ze kwaŋ krik Nilu, niiu polo na alkatroŋ onhani pi ze tu, Zu nmpoz ze mezu polo ya zu ze kwaŋ krik ze psoof mpupa. 4 Amak naz un onloi antom ze ten un oknzipi na nmpoz.5 Awk Faro nmpili ya pñoo ze krik Nilu; ka bompili lo ka yaanz zo owau krik. Ka iin pntuuru pminzpun ka wui ze psoof mpupa, ka hil nnjuuk lo nmpili ya jek polo. 6 Ka ahaul polo iin nmpoz ze mezu. Ka nmpoz ka hur anka añago lo, jaa: Nmpozi o nnsi Boebreu.
7 Amak nmpoz yep awk Faro: "Nyeek ni jeu nhya ndu ñaaz nyebreu anhoi pbootun nmpoz, pkul lo"?
8 Awk Faro jak lo uhilun phya. Ka aya du aniin nmpoz nmbuk lo. 9 Awk Faro jak lo: "Jekun nmpozi uya kulin lo: Njo bi pluku." Hunkran ñaaz jekdun nmpoz antom kul lo. 10 Nmpoz bi yeekzo. Aniin jek lo ya diŋun awk Faro ka zulo injaka awk. Ka jaa: Njo pzwa ktiim Moises zonkont nji punun naa ze mnzup.
Moises fiŋ ñiinz Ejitu
11 Onuwan, kero Moises bi yeekzo pun phya phin bowkoliin. Ka a ka ten boko zutihun boko utaamb. Aiin ñiinz Ejitu uz ka kob awk aliin aloŋ nyebreu. 12 Ka ten ojiri, ten ondaun iin ja ña azi o za, ka fiŋ ñiinz nnsi Ejitu moi lo ze mbool. 13 Kero onu luŋ jiinzi, ka pot kak phya dolo, ya iin bowkoliin, boebreu ka gut. Ka yep nyebreu ankaunk okukpa: "Ezi kaa uka kob asinzu?" 14 Aminzun yep lo: "Noonzi zuu nyeek ze psoof ndo?" Ujeu pfiŋin injaka mi ufiŋmunk ñiinz Ejitu? Moises liinki, ja ze kwaz lo: "Zowadadi, uni o meo ze boyeek. 15 Kero Faro te un ominzi, ber pfiŋ Moises, ka Moises zi Faro, ya zoo zosaak okndwoi Midyan. Onuwan ka ya zo ze kwaŋ plik. 16 Nmpenen Midyan hil ka bopoz bompili 7, bonhyaaki plik mnzup psumun ŋntina, antom phul ŋmpalalu aliin boko ŋndaan. 17 Boyafna boloŋ bi dook baka ka Moises nazo zoknar boko, zu ŋmpalalu ka ŋdaani. 18 Kero bompili kak mez Rewel aliin boko yep boko: Nde sanka sar pbi hankri? 19 Bo seemb lo jaa: Ñiinz aloŋ nnsi Ejitu burburun ndo ze kñen boyafna bondaakun; sa pot lik mnzup uz mnsumi zu ŋmpalalu ndo ka ŋndaan. 20 Ka a yep bowk: A oon zoon? Ezi ka nde duk ñiinz aminzun dolo? Nde duun naa abi de. 21 Moises bi siink pduko na ñiinz aminzun. Rewel bi hul lo awk, akndwoi Zipora, antom amar. 22 Ka abi buk nmpoz, Moises zu lo ktiim Jersoŋ, zonkont a jaki: Njo nya zosaak onhani pho osinin.
Pkez Faro