Uzi lado na Moises
3
Kero Moises ka yafun ŋmpalalu ayootun, anhoi Jetru, nmpenen Midyaŋ, aya na ŋmpalalu zojir phyour onu zolaal, ka jau zonkuŋ Uzi, okndwoi Oreba. 2 Oiili NYEEK bi ze Moises ze psoof uroo uknhibi, ze bun umpozbi, Moises ka ten, hikran ja uroo ze hi ze bun umpozbi ka bun bozi turoo. 3 Moises jaa: "Yelan nhya nten un ondai onhatatink maakrin, antom mme un onkai bun umpozbi bozi turoo?" 4 Kero ka NYEEK iin ja Moises ze ya zojir ominzun osi bun umpozbi phya pten, ka Uzi dulo ze psoof uroo: "Moises! Moises!" Ka Moises seemb wolo jaa: "Njii zi!" 5 Uzi jaklo: "Ika ñog zi. Punan isapat ze izima, zonkont zun woonzink ze o osaak onjiinzi. " 6 Sa pot jaklo: "Nji njoun Uzi aliin nu, Uzi Abraoŋ, Uzi Jaaki na Uzi Jako." Moises ler mnkil zonkont akalo pten Uzi.7 NYEEK jak lo uz: "zowadadi, nji iin na mnjona onor bopugi ni knori ze Ejitu; Nji te ibuur boko zonkont boyeek boko utihun. Nji me omindo boko; 8 zonkont un ominzun, kaun ka nji yeto bi pburburun boko ze kñen bojitu, pzu boko bo pun zosaak ominzun, phya na boko osaak ombaliri ba magi, onsumi mntau na pnou; osaak osi bokananeu, boeteu, boamoreu, boperiseu, boeveu na bojebuseu. 9 Ze krankanki ibuur bowk Israel jau ze Nji, nji sa iin uz pjuuk psi bojitu zupi boko. 10 Biir ze krank, njo philu ze Faro, upunun bopugi ni, bowk Israel ze Ejitu." 11 Ka Moises jak Uzi: "Nji njoko noon phya ze Faro antom punun bowk Israel ze Ejitu? " 12 Uzi jak lo: "Njo pho na wi; Ondai oun pho mnjaŋzin pja Nji uriini, nji hilun wi. Zutoom punun bopugi uki ze Ejitu wo bi ptihunar Uzi zonkuŋ ondai."
13 Moises jak Uzi: "Ze nji ya ze bowk Israel jak boko: Uzi boliin nde hilun nji ze nde boloŋ; ze boyepin: Ktiim wolo? Yee njoun pjak boko?" 14 Uzi jak Moises: "NJI OUN ÑA NJI OI. Hunkran woun pjak bowk Israel: NJI OUN hilun nji ze nde." 15 Uzi pot jak Moises: "Hunkran woun pjak bowk Israel: NYEEK, Uzi usi boliin nde, Uzi usi Abraoŋ, Uzi usi Jaaki, Uzi usi Jako uhilun nji ze nde. Kndaaki oun pho ktiim ni onzañi, ondai oun pho mnlelnin ze iiñ uzuuz zurun." 16 Yan zooñun boyeek Israel ujak boko: "NYEEK, Uzi usi boliin nde, Uzi usi Abroŋ, Jaaki na Jako, ubi ze nji, jakin: Zowadadi nji bi ten nde iin un ondoli nde ze Ejitu. 17 Un ominzi kaun ka Nji ja njo pzu nde, nde pun zonor osi Ejitu, phya zosaak osi bokananeu, boeteu, boamoreu, boperiseu, boeveu, na bosebuseu, osaak oniiri ba sum mntau na pnou." 18 Bo pte prim nu; wo phya na boyeek Israel ze nliin Ejitu, wo pjaka: "NYEEK-Uzi boebreu, bi ze ndo. Ñagonan ndo, ze krankanki hutnan ndo, ndo ya wyaas ŋnu 3 zolaal phya pdol wojun usi NYEEK, Uzi ndo. 19 Nji uriini nji me nliin Ejitu azo phutun nde, nde sol ze ampzwo ofooza na kñen kndiizki. 20 Hunkran, njoun psolun kñen ni pnornorun Ejitu pfiŋ boko na ŋun ŋhatatŋi uzuuz njoi pdo ze psoof boko. Antom ahutun nde, nde sol. 21 Nji njo pzu bojitu bojaaŋ kñago ze bopugi ni; zopuni nde, nde zo pun iñen isiil. 22 Zonkont kana ñaaz boisraelita apñaun ñaaz Ejitu anzoori ze kwaŋ lo, na anzoori ze mez lo, ŋun ŋnsi praata, ŋhuru, na yun itiimo, ndei pñign bowk nde boiinz na bompili. Hunkran ndeun pseh priz bojitu."