Uzi hul Moises philun
4
Moises seemb jaa: "Bozo phaz ze nji, bozo ptein; bo pja: NYEEK azi bi ze wi." 2 NYEEK yep lo: Oye ubupunk ze kñene? Ka jak lo plaŋra pa." 3 NYEEK jak lo: "lisun pa zozee. Ka lis polo zozee, ka phuglo opuulo. Moises zi olo." 4 NYEEK jak Moises: "Solna kñen ubup olo ze ptaant. Ka solun kñen bup olo ze ptaant; ka phuglo plaŋra ze kñene lo." 5 NYEEK jaklo: Ominzi oko pjaaŋ bohilun phaz ja NYEEK, Uzi boliin nde, Uzi Abroŋ, Uzi Jaaki na Uzi Jako. Ubi ze wi. 6 NYEEK pot jaklo: "Zuun kñene zujuuns. Moises zu kñene. Kero a punun kolo ka kfaas iziñr ijeenkle injaka ojeelu." 7 NYEEK pot jaklo: otnu uzu kñene zujuuns, ka ado jaunk. Punun kolo iin kolo ka khili injaka olef lo oloŋ. 8 Ze boamphaz, ba pot ampteu ze mnjaaŋzin mnseke, bohilun phaz ze mnjaaŋzin mpugzan. 9 Ze bozi haz ze mnjaaŋzin mnseke na mpugzan, ze boampteu ukjek mnzup krik Nilu was zozee onkai, mnzup ulikmunk ze krik mo phuglo pñaak zozee.10 Ka Moises jak NYEEK: Aan! NYEEK! Ze phila ni mbazi o ñiinz anhili olado, nin zondiima nin ze krankaki utepi plado na nji, ntihun nu, zonkont nji diiz premte. 11 NYEEK yep lo: noonzi lemp mntum ñanjina? Noonzi lemp ndilm, o ña anfisoi? Noon akzu ña akten o akuuz? Mbaza Njia NYEEK? 12 Yan ze krank njo pho na mntum nu, Njo pjukjukun nu un woi plado. 13 Ka Moises jaa: Aan! Ñagonan NYEEK! Hilun ña aloŋ, mbaza nji a. 14 NYEEK deuzar Moises, yep lo: Aroŋ nnsi kiiñ Levi, mbaza amaku aa? Nji me ja a ka lado na mnjona. Asa o puni bi pjik na wi uz. Zo iin lo wi apliilun zujuuns lo. 15 Wo plado na yaa, wo pzu olado ze mntum lo; njo pho na mntum nu na mnsi lo uz, njo pjukjukun nde un ndei pdo. 16 Alo a oun plado na bopugi zonkont nu, a oun pho mntuum nu, wi wo pho injaka Uzi ze lo. 17 Jekun plaŋra pndaapun, zonkont pop woun pdoon ŋun ŋhatatŋi na polo.
Moises kak Ejitu
18 Moises kak ze Jetru, anhoi ayootun, jak lo: Nji jeu pkak phya pñog bowkoliin ni bonhoki ze Ejitu, nhya nten men boum hili. Jetru jak lo: Yan na mnjona. 19 Kero Moises um o ze Midyan, NYEEK jak lo: Solun ukak ze Ejitu, zonkont bo kmberki wi pfiŋ bo kez uzuuz . 20 Hunkran Moises jekdun ahar na bowk, dapun boko duzu ohuru. Ka kak ze Ejitu. Moises ya na plaŋra Uzi ze kñen lo.
21 NYEEK jak Moises: Okakru ze Ejitu, zuun kwaz pdo zurun Faro ŋun ŋhatatŋi Nji hulun wi philun antom udo. Ka njo pzu ujuuns lo utaambz a zo pdigzan phutun bopugi bo sol. 22 Wo pzuup Faro pjak lo NYEEK jaa: Israel oko nnsek ni. 23 Nji jaku hutnan nmbukin aya tihunarin adolin wojun, ka wi uyeel phutun naa. Nji njo pfiŋ awku nnseke.
24 Kero ka bo paant phyooŋ, antom fur zun boya aika furna, ka Uzi jik na Moises jeu pfiŋ lo. 25 Hunkran Zipora jekdun plaak pñeentpi injaka pntumopi hat awk pleke na polo, antom jek ktil afalkunk kobn Moises ze pzima, jaa: Zowadadi woun nhini nnsi pñaak. 26 Zipora jak Moises a o ahina nnsi pñaak, zonkont pleke. Hunkran NYEEK hutnun pfiŋ Moises.
27 NYEEK jak Aroŋ: Yan jik na Moises zolaal. Hunkran asoldun ya jik na lo zonkuŋ Uzi, hul lo obisa. 28 Moises zuup Aroŋ olado uzuuz NYEEK Jaki lo aya lado, na ŋun ŋhatatŋi ajakŋilo aya do. 29 Hunkran Moises na Aroŋ yadun ya zoñun boyeek uzuuz bosi Israel. 30 Aroŋ zuup olado uzuuz osi NYEEK ladoi na Moises, ka Moises do ŋun ŋhatatŋi zurun bopugi. 31 Ka bo hazi; kero bo te NYEEK lel bowk Israel, a iin onor boko bi pzu boko mnjona, ka bojuuz zah NYEEK.