Moises na Aroŋ ya zurun Faro
5
Zozipr ŋun ŋminzŋi, Moises na Aroŋ ya ze Faro jak lo: "Hunkran NYEEK jakdun, Uzi usi Israel: Hutnan bopugi ni bo sol boya dolin onah zolaal." 2 Faro seemb boko: "Noonzi o NYEEK aminzan, njoi pte prim lo phutun boisraelita bo sol? Mbazi me NYEEK aminzan, ka mbazo phutun boisraelita bopun." 3 Ka bo jak lo: Uzi boebreu bi ze ndo: ze minzmun, hutnan ndo, ndo sol ndo ya wyaas ŋnu 3 zolaal phya pdo wojun un onhaloi usi NYEEK, Ze ndo ampdo molo, bo pnornorun ndo na pmaaka o na keeje. 4 Ka nliin Ejitu jak boko: "Moises na Aroŋ, Ezi ka nde zu bopugi bo hutun utihun boko? Nde ya do un nde kai plemp." 5 Ka Faro pot sa ja uz: "Bopugi boisraelita sum zosaak, ka nde zu boko bohutun uthiun bo kai pdo."Faro nornorun Boisraelita
6 Zonu ominzun Faro hul prim jak nzoŋ botihun na ayeek boko: 7 Zurun nde hutun phul bopugi otun, antom botur itisol. Boko uz boya ber otun urina boko na iñen boko. 8 Ka nde pzu boko bo do utihun itisol usi bojonunk kado. Nde ika hail nin kloŋ. Zonkont bo o baña bombinkranki, un ominzi kaun boka kiik ze ja: Ndo phya pdo wojun usi Uzi ndo. 9 Nde zuun boiinz bominzkun utihun untaambi, antom boŋou ze bolo, boki kzu ywaz zolado ujubl.
10 Hunkran nzoŋ utihun na ayeek utihun boya lado na bopugi jaa: Faro ja azo phul nde otun. 11 Nde yan urina nde, nde ber otun zun ndei phin nolo, antom nde do utihun punun itisol nde anka kapunun kana onuu, yozo phailo. 12 Hunkran bopugi hairodun ze ŋnjir uzuuz zisaal Ejitu psinz ikitr trigu, antom hilun pho ze kfah otun bo klempni ŋntisol na olo. 13 Ka bozoŋ utihun iinzo boko jaa: Nde lempun prez itisol nde anka ka lemp kana onuu. Ze mi nde anka kalemp kero nde ka ka otun. 14 Bozoŋ utihun Faro kob boyeek utihun bosi Israel bondatoki pten utihun, yep boko: Ezi kaa, ndezi toom utihun busi montoŋ na hankri, prez itisol nde anka ka lemp?
Boisraelita yugun zurun Moises na Aroŋ
15 Hunkran boyeek utihun Israel yadun yugun zurun Faro, yep lo: Ezi ka udo botihun nu jeink? 16 Botihun nu bozi hulo otun, kabo jak ndo: Nde lempun itisol. Tenun, botihun nu ka kobo, ka bopugi nu kaun okulpa. 17 Ka Faro seemb boko: Nde oko bobinkran! Nde oko bobinkran! Un ominzi kaun nde ka ja: ndo phya pdo wojun NYEEK. 18 Nde yan bup zutihun! Otun ndezo phulo a, nde plemp prez itisol nde jonunk kalemp. 19 Hunkran boyeek bowk Israel, iindun ja bo ka onor omagi, ze mi bojakmunk boko bozo phail itisol bojoni ze lemp kana onuu. 20 Kero ka bo pun zurun Faro, bo jik na Moises na Aroŋ boka yoŋ boko. 21 Bo jak boko: NYEEK o pten ze nde, a oun pdo nde olado, zonkont nde zwi Faro deuzar ndo na boyeek bopugi lo. Nde hul baka keej ze kñene bo fiŋ ndo.