Uzi ja bo pburburun boisraelita
6
NYEEK jak Moises: "Ze krankanki wo phin un njoi pdo Faro; zonkont kñen ni kndiizki ksi philun aphutun baka bo sol; hunkran, zonkont kñen ni kndiizki ksi philun apunun nde zosaak lo.2 Uzi pot lado na Moises jak lo: "Nji njoun NYEEK. 3 Nji ya ze Abroŋ, Jaaki na Jako injaka Uzi unkawi philun, ka mbazi hutun baka bomein, na ktiim NYEEK, bozi mein na ka. 4 Nji huuz na baka uz phul boko osaak Kanan, zun bohili o pzoona injaka boya. 5 Ze krankanki Nji uz, nji te bowk Israel ka tih, ze mi bo omunk ze pjuuk ze kñen bojitu. Nji lel phuuz ni. 6 Hunkran, zuupun bowk Israel ujak boko: "Njoun NYEEK." Njo bi punun nde zonor osi bojitu. Njo pburburun nde pho bojuuk boko; Njo pburburun nde na kñen kndiizki ksi philun ksi pdo olado. 7 Njo bi pjek nde antom nde o bopugi ni, njo pho Uzi nde. Nde pme njoun NYEEK, Uzi nde, njo punun nde zutihun undiizwi ze iñen bojitu. 8 Njo bi phya na nde zosaak nji bisrounk ja njo phul Abraoŋ, Jaaki na Jako. Njo phul nde a, osi phij. Njoun NYEEK." 9 Moises zuup bowk Israel olado ominzun, ka boyeel pte a, ze mi bo omunk na kjoozi zonkont pjuuk bo oonpi.
10 Ka NYEEK pot lado na Moises jak lo: 11 "Yan ze Faro, nliin Ejitu, ujak lo: hutnan bowk Israel bo pun zosaak nu." 12 Moises jak NYEEK: "Bopugi Israel bozi tein, Ka Faro optein pjaan? Ze mi njanunk phil olado." 13 NYEEK lado na Moises na Aroŋ hul boko oiimna: "Bowk Israel na Faro nliin Ejitu, njo pjak nde, nde punun bowk Israel ze Ejitu."
Kiiñ Moises na Aroŋ
14 Bondaaki bo okun yeen isi phwkpliin boko: Bowk Rubeŋ, nnsek Israela bo o: Enok, Palu, Esroŋ na Karmi. Bondaaki bo okun bowkoliin Rubeŋ. 15 Bowk Symeoŋ bo o: Jemwel, Jamiŋ, Oadi, Jakiŋ, Joar na Saul awk ñaaz nnKananeu. Bonhoki bowkoliin Symeoŋ. 16 Indai oun itiim bowk Levi, ze kiiñ boko: Jersoŋ, Koati na Merari. Phila Levi uzuuz pho ŋnlur 137. 17 Bowk Jersoŋ bo o: Libni na Simei ze mi bo omi ze phwpliin boko. 18 Bowk Koati bo o: Anraŋ, Isar, Hebroŋ na Uzyel. Koati ka ŋnlur 133 ze phila lo uzuuz . 19 Bowk Merari bo o: Mali na Musi. Bondaaki bo o bowkoliin Levi ze mi boomi ze kiiñ boko. 20 Anraŋ nimro na ñaaz akndwoi Jokobed, anhoi aliin lo ñaaz. Bi bwk na lo Aroŋ na Moises. Aroŋ ka ŋlur 137 ze phila lo uzuuz . 21 Bowk Izar bo o: Kore, Nefeg na Sikri. 22 Bowk Uzyel bo o: Misael, Elsafaŋ na Sitri. 23 Aroŋ nimro na ñaaz akndwoi Eliseba awk Aminadabe, aza Naasoŋ. Buk na lo Nadabe, Abiu, Eleasar na Itamar. 24 Bowk Kore bo o: Asir, Elkana na Abyasafe. Bondaaki bo okun bowkoliin kore. 25 Eleasar, awk Aroŋ, animro na ñaaz anhoi awk Putyel. Abwk na ya Fyneya. Bondaaki bo okun yeen bowkoliin bolevita ze mi bo omi ze iiñ boko.
26 Bondaaki bo okun Aroŋ na Moises NYEEK ladoi na boko jaa: Nde punan bowk Israel ze Ejitu, ze mi bo omi ze iiñ boko. 27 Bondaaki bohokun, Moises na Aroŋ, boladokun na Faro nliin Ejitu antom punun bowk Israel ze Ejitu.
Uzi hil Moises apot alado na Faro