Itaagwa ipugzan isi oiimna
Oiimna 10:1-5
34
Ka NYEEK jak Moises: ''Fejun ilaak injaka itaagwa 2 injaka isekeyun; njo pis olado ominzun osi njonko pisi zitaagwa utawyunk. 2 Bamnoon faan, antom upayo ze nfa, zonkuŋ Sinai, zolo wo pjik na nji duzu onkuŋ. 3 Ñazo payo na wi, ñazo piino zonkuŋ uzuuz , ka ŋmpalalu ŋozo pfer ze kwaŋ olo.'' 4 Hunkran Moises fejdun itaagwa 2 isi ilaak injaka isekeyun; ka anazo ze khanan, payo onkuŋ Sinai, ze mi NYEEK jakmi lo, Ka yana itaagwa 2 isi ilaak ze iñen lo. 5 Ka NYEEK yeto duzu knzun, ka anaz ze kwaŋ lo, ka tezan ktiim lo anhoi NYEEK. 6 Ka NYEEK zip zurun lo, ka Moises kiik maakrin: ''NYEEK, NYEEK, Uzi unkawi kñago, unjai ka jon pdeuz, unsumbi kñago na phazun; 7 unjai ka kñago ze iiñ 1000, unjai ka jour pjwa, boza khutun nja injaka ñani pka pjwa, waka ten pjwa ze boliin bopoz ze bowk boko, na bowai boko ampjau ze kiiñ khajzan na kwakna!'' 8 Ka Moises limoo zozee, antom ŋupr NYEEK; 9 ka jak lo: ''NYEEK, zowadadi ze nji iin kñago ze kil nu, uksol na ndo; zonkont bopugi uki tambz ijuuns, jouran ndo pjwa, ujek ndo injaka baña bonhoki piiju.''Uzi do phuuz
Oiimna 7:1-5
10 Ka NYEEK jaa: “Njo pdo phuuz. Njo pdo ŋun zurun bopugi nu uzuuz njo pdo ŋun ŋaahtatŋi ŋani po dolo zosaak uzuuz , nin ze psoof ŋnsaak uzuuz , bopugi uzuuz bosi nde ooki ze psoof boko bopiin utihun NYEEK, zonkont un onlinkni njoi pdolu. 11 Baapun un nji jaki wi hankri: Teun oiimna osi njoi phulu hankri. Njo punun zurun nu boamoreu, bokananeu, boeteu, bopereseu, boeveu, na bojebuseu. 12 Bambun ukik do phuuz na baña bonhoki zosaak osi nde khyani, kik kbi kho plufe ze psoof nde. 13 Nde pkit ikak boko, nde psok ŋnsantu boko, nde punun ŋnzi ŋnsi Asera. 14 Nde ika ŋupr ŋnzi ŋloŋ, zonkonk ktiim NYEEK o ktiim kñendki; zowadadi, wo Uzi uñendwi. 15 ''Zonkont nde ki kdo phuuz na baña bonhoki zosaak ominzun; zonkonk o yaar boko bi zal ŋnzi antom phul wojun usi ŋolo, bo hilun bi beunaru antom uya de na boko pre psi wojun. 16 Ika bi jek bompili boko antom bomado na bowku. Bohaz bominzkun bobi pzal ŋnzi boko, bobi pzu bowku bolemp ze mi bolempmunk .
17 ''Nde ika lemp ŋnzi ŋyalanŋi antom pŋupr ŋolo.
Ŋnah 3
18 Baapun onah osi opoŋ onhani pka ptila; ŋnu 7, nde pde opoŋ onhani pka iferment, ze mi nji hilunkwi , zokil pli psi Abibe, zonkont pli pminzpun nde punpun zosaak Ejitu. 19 ''Ŋun uzuuz ŋmbukoŋi ŋhinz ŋho ŋnsi ni; ampjau ze ŋiit na ŋmpalalu ŋnsek ŋolo ŋhinz uzuuz ŋho ŋnsi ni. 20 Owk ohuru ombukoi urun wo pzimlana na owk ompalalu. Zwam pzimlan olo ukit olo kzuuz. Boseknu uzuuz uka pzimlan baka. Ña azi hilun bi zuruni iñen isiil.
21 ''Uka ŋnu 6 ŋinsi utihun, zonu ojaandun, o pho onu ksaaudu osi phyoŋ, ŋanu o okil osi kjar o osi kit. 22 “Usa o pbaap uz onah osi imiŋu, oi onah osi ŋun ŋnseke ŋnsi trigu nkitoŋi. Usa baap onah uz osi otoomr olura. 23 “Ŋyaas 3 zolura, boiinz uzuuz ze psoof nu bo ka bi zurun ni NYEEK akndwoi Jova, Uzi usi Israel. 24 Zotoomrin punun ŋnraasa zurun nu, njo phul nde osaak ompei pmag, ñazo pjeu pseh osaak nu zoyar boiinz anhya zurun NYEEK Uzi nu ŋyaas 3 zolura.
25 ''Ika hul pñaak psi wojun ni na opoŋ onkai iferment; Ika hutun wojun usi onah osi paskwa oduko zurin ampjau ze nfa. 26 ''Yana ksepru kseke ksi kjar nu ze ku NYEEK, Uzi nu. Ika juŋ opi okmbooti. '' 27 Ka NYEEK pot lado na Moises:'' Pisun olado ominzi, zonkont phuuz nji dopi na wi, na Israel uz, phopi zolado ondai.'' 28 Moises duko za na NYEEK ŋnu 40 pnak na urim; azi de opoŋ ka azi daan mnzup. Uzi pis ze itaagwa olado osi phuuz, oi ŋiimna 10.
Mnkil Moises jiili
29 Kero ka Moises yeto duzu onkuŋ Sinai na itaagwa 2 isi ilaak ŋiimna ze kñen lo, azi me ja mnkil lo hil ze jiil, ze mi aladomunk na Uzi. 30 Kero ka Aroŋ na bowk Israel uzuuz iin mnkil Moises mi ka jiil, bo kalo pñog ze kwaŋ lo. 31 ka Moises du boko; Aroŋ na boyeek uzoñnor ñog ze lo; ka Moises lado na boko. 32 Ka bowk Israel bil uzuuz , ka Moises zu boko bo do ŋun Uzi ladoŋi na lo uzuuz zonkuŋ Sinai. 33 Kero ka Moises toom plado na boko, aler mnkil na otira. 34 Zoyar Moises an ze neej zurun NYEEK atom plado na lo, akpunun otira ampjau zopunr lo; ankanpuni a hil akzuup bowk Israel un NYEEK hili lado na lo. 35 Bo hil akhin mi mnkil Moises kjiilmi. Hunkran Moises a na kler mnkil lo na otira ankint kneej plado na Uzi.