Oiimna osi Pdol Olado
23
Ika lado ujubl, ika hul ñani pme Uzi kñene, antom pho ña anmatiri ze khuzin. 2 Ika ñoz baña bonsumki antom pdo khuzin. Ze wo pho ze kmatir ze pdol olado, ika ya zojir bojubl. 3 Ka ika duko zojir niñagin ze pdol olado. 4 Zuiin oiit okal ña, o ouru ninbir nu omei, bupna na ubotun lo. 5 Ze uiin ouru nmbir nu onkuŋoi jeti, ika hutun na za, zuna o nazo.Un Bo dol olado Kai Pdo
Oiimna 16:18-20
6 Ika zimlan oguus nnñagin kai zurun pdo olado antom phul ña aloŋ. 7 Zuun olado ujubl lo ze mtuum nu. Ka ika zu ña anjaali pkez. 8 Ika digzan pseh oluuku ozee, zonkont o akzu baña bokntenki bokuuz antom ksok pdol olado. 9 Ika nornorun nya, nde me ujuuns nya, zonkont nde hil oko boya zozee Ejitu.
Olur Osi Phyoŋ
Uojun 25:1-7
10 Ze ŋlur 6 wo pjaar ozee antom pkit ŋun nu; 11 Zolur ojaandun hutna na oyoŋ, antom boñagin ze bopugi nu, ka un bokdei, ondukloi okho osi ŋgoŋar pgof. Hunkran usaun hilun pdo na isi mhuba na Olivera.
Ksaaudu
Uojun 23:3
12 Ze ŋnu 6 dolun utihun nu, zonu ojaandun yoŋun; zun oiit okal nu oyoŋ na ohuru nu; antom awk ninjuuk nu ambukoi ze mez nu yoŋ na nya. 13 Ze ŋun ŋi nji jakŋi nde uzuuz ; nde yaanzan na ulipl; nde ika lel itiim ŋnzi ŋnloŋ, ka yozo pteo ze mntuum nde.
Ŋnah 3
14 Ŋyas 3 zolura nde dol onah. 15 Nde baapun onah opoŋ onhani pka Iferment; ŋnu 7 nde pde opoŋ ominzi, ze mi nji jakmi wi, zojaur pli Abibe, zonkont pop nde punpun ze Ejitu; Ika ña bi zurun ni na iñen isiil. 16 Wo pdol onah osi ŋreu ŋnseke zotepru ikit isi ŋreu nu, na onah osi ikit zotomr olura, zo yaaru anjiu ŋreu ukitŋi. 17 Ze ŋyaas 3 kana olura boiinz uzuuz bo bi zurun NYEEK. 18 Ika hul pñaak psi wojun ni na opoŋ onkai iferment, ka ika duk mnira mnsi onah ni zurim uzuuz ampjau ze nfa. 19 Bina ksepru kseke ksi ukitki ksi ozee nu ze ku NYEEK, Uzi nu. Ika juŋ opi okal oumi ka boot.
Uzi Ja Bo phul Baña Osaak
20 Tenun, Njo phil oiili zurun nu, antom obaapu ze book ukyaanzinbi anukint ujau zun nji bamni wi. 21 Bambun ute prim olo, ika ñankun na oiili, ozo pjour pjwa nde, zonkont ktiim ni o na a. 22 Zu sikna psiink un o kjaki wi, dol un nji jaki wi udo, njo pho nmbir bobir nu njo psajzo bonsajzoki wi. 23 Oiili ni opya zurun nu, pya na wi zozee boamoreu, boeteu, boferizeu, bokananeu, boeveu na bojebuseu nji njo ptoom na baka. 24 Ika ŋupr ŋnzi boko, ka ika buur na ŋa, ika do injaka mhagzin boko; zoseke uka psok ŋa uzuuz ukitkitun isap ŋolo. 25 Nde don wojun NYEEK, Uzi nde wo pzu nde mnjona phul nde ŋun ŋnde na pzuup. Wo punun maka ze psoof nde. 26 Zozee nde ozo pka ñaaz ambuki antom haŋi, ozo pka ñaaz anfeuzoi; phaŋ nmpoz, nde zo pka bonfeuzoki ze psoof nde. Njo pzu phila nde pkañ. 27 Njo pzu klinki zurun nde, antom phatatun bopugi zun nde yaanzi; bobir nu bo pziu uzuuz . 28 Njo pzu mhatlina ze psoof boeveu, bokananeu, na boeteu punun boko zurun nde. 29 Mbazo punun baka zolur oloŋ, ozee ik bi khat na nde, pzu ngoŋar pgof ŋmbundar antom ŋgut na nde. 30 Njo punun baka mpozmi mpozmi, ande kint nde bundar, nde sum nde seh osaak antom piij. 31 Njo pzu ilil nu ptet ze krik kjenkle ampjau ze krik bofilisteu ptep zolaal ampjau ze Eufrate; njo pzu ze iñen nu bopugi bonhoki zosaak, antom uhilun punun boko zurun nu. 32 Ika do pla na baka nin na ŋnzi boko. 33 Ika hutun baka bo zoo zosaak nde, antom bo ki kzuu ukjw ze nji; ze nde tihunar ŋnzi boko, un ominzun opho plufe ze wi.