Oiimna zonkont un ña kai
22
Ze ña kiij oiit okal o ompalalu fiŋ olo o hap olo, apluk ŋiit nkal 5 zoiit oloŋ ominzun, o ompalalu, apluk ŋmpalalu 4. 2 Ze ninkiij bupo kiij ze pjip ku ña, zadiiso kezi, ña afiŋunk lo azo pka pjwa ze pñaak lo. 3 Ze un ominzi iir kero onu o jiinzi, ña andiisni lo apka pjwa ze pñaak lo; ze minzmi ninkiij ka pluk uzuuz . Zampka un aiplukna akhapo zonkont kiij lo. 4 Zonsaam akiiji iino utenten ze kñen lo; ŋanu oiit , ohuru o ompalalu a ka pluk ŋyas ŋmpugz.5 Ze ña hutun onsaam odoh otun zuzan usi mhuba, za hutun olo ka oya doh otun zun ña aloŋ, apluk na buk mun mpemi pnuro zuzan lo na mpemi pnuro zuzan lo usi mhuba. 6 Ze zun bi bup uroo, anbup zo manman ankint tur iñen isi trigu yonko tano, o sa sok zun uzuuz , ña anseununk uroo a pluk ŋun ŋnturoŋi uzuuz .
7 Ze ña hul akiinz lo praata o un oloŋ osi ulujul antom aban lo, ze unominzi bi kiijo ze ku ñiinz aminzun ze nkiij bi iino apluk ŋyas ŋmpuguz 8 Ze nnkiij amphino nminz ku khya zurun bo dol olado antom pten men azi zu kñen ze unu akiinz lo. 9 Ze ña jek asiinz oiit okal, ohuru, ompalalu o un oloŋ onmei osi ña disi; ze aloŋ jaa osilo a, boko bopugz bo phya na oŋou boko ze bo dol olado. Ña bo dol olado jaki azi kaa ogus, a kaa pluk asinz ŋyas 2 penpen. 10 Ze ña tanun asinz, oiit okal, ompalalu, o onsaam oloŋ antom abup lo zonsaam ominzun bi kezi o odiisoo o oburi ña azi iina, 11 Bo ka phya boko 2 zurun NYEEK antom ña ambupunk olo bisro a ja azi kiij onsaam osi akiinz lo. Nminz olo digzan lo ña anseunk lo kntani azo pluk. 12 Zokiijo ze kñen ña ansehi kntani a ka pluk nminz olo. 13 Zogoŋar pgof fiŋ un oloŋ, akiinz lo ka phya na pnzink antom ohilun pho un onjinzi. Hunkran azo pluk nminz onsaam onfiŋoi 14 Ze ña ye onsaam akiinz lo, ka obi diiso o okezi kero nminzolo azi matiri ña anhyeunk olo opluka. 15 Ze nminz onsaam matiri ña anhyeunk olo azo pluka osaam ominzun liiŋi.
Oiimna Baña
16 Ze ñiinz dar nmpili ani po jeko unima antom piinz na lo, a ka pluk unima. Nmpili aminzun ka pho har. 17 Ka aliin nmpili yeel amar lo, ñiinz aminzun ka pluk onsaam onsumi onliŋi na osi pluk unima 18 Ñaz akndoli pkalum ika hutna na phila. 19 Ña anpiinzi na ogoŋar a ka pfiŋo. 20 Ña dol wojun usi ŋnzi a ka pfiŋo. 21 Nde ika lemp nya un onjozi; zonkont nde hil oko boya ze Ejitu. 22 Nde ika do ña ankeznani ahina un onjozi na ŋnjiiŋ, 23 Ze nde do boko khuzin, ka bo bi hudarin, njo pter baka ibuur, 24 Njo pdeuz njo pfiŋ nde na keeje, bohar nde opduko ŋnjiiŋ na bowk nde. 25 Zunankan bopugi ni onsaam, na niñagin anhoi na wi, ika do injaka ña aknankani antom pseh opafu. 26 Zujek knoŋt asinzu, ze mi anankamunk wi kolo, botnan naa ka onu nimpo jeti. 27 Zonkont apiinz na yee? Kok akakun nkonakolo botnan naa ka onu nimpo jeti antom aler oleef. Zaduin njo ptea zonkont nja ka kñago. 28 Ika kar Uzi nu, Ika ladar nimbuli bopugi nu un onjozi. 29 Ika jon phulin ojir oseke osi kit nu, injaka trigu o pkeme; Wo bina ninsek nu bi phulin. 30 Hunkran Woun pdo na ŋiit nu nkal, ŋmpalalu nu; ŋho pho na ŋniin ŋolo ŋnu 7; zonu obakrin ukbi na ŋolo kbi khulin. 31 Nde pho boiinz bonjaalki ze nji, nde ika dee oyemz osi ogoŋar ohuzin fiŋi ze pgof; nde lisun na ŋhul.