Oiimna osi Bojuuk
(Oimna 15:12-18)
21
Uni oko ilul woi pzu boko bo zal: 2 zuganz nnjuuk anhoi nhebreu, a ka ptihunaru ŋlur 6; zolur ojaandun, a ka phutno, azo pluk un oloŋ. 3 Ze abi nzuŋl, a pun nkolo; ze animi, a ka pun na ahar. 4 Ze nminzlo hulo ñaz, ka ñaaz aminzun buk bopoz boiinz na bompili,ñaaz na bopoz bo pho bosi nminzlo, ñiinz ka psol nkolo. 5 Ze nnjuuk aminzun jaa afundar nminz lo, na ahar na bowk, ze a jaa azi jeu pun, 6 nminz lo khya na lo ze bo dol olado kzu lo añog ze plumun o ze kwaŋ krarm, antom ol afutlun lo kwaz na pnsiñi ol adukun o nnjuuk lo onzañe.7 Ze ñiinz hap awk lo nmpili injaka ninjuuk, azo phutno injaka bojuuk boiinz. 8 Ze nminz lo ganz lo antom bobi mado, ze ampjeu lo azi mado na ya, a ka phutun na aliin pot aganz lo. Azi hilun phapa baña bompazki, zonkont azi baapa na mnjona. 9 Ka sa hul lo awk amar, a ka baapa injaka awk lo ñaaz. 10 Ze abi bundar awk ñaaz aloŋ, azi hilun phail ŋun ŋnde ŋnsi ajaun ka hul lo. Ka azi hilun phail a yun lo itiimo, na ifah lo isi unima. 11 Ze ampdo lo ŋun 3 ŋminzŋi, ñaaz ka pun azo pluka un oloŋ.
Ŋiimna zonkont kpe
12 Ña ankobi ña fiŋi, alo uz asa ka pfiŋo. 13 Ze amplemp olo ze mbaaji pzu lo watro, ka Uzi zu lo a jet ziñin lo, njo pjaaŋu zun aipzi phya ptayo. 14 Ze ña zu khwaz pdar asinz antom fiŋ lo, ŋanu azii ya ze pkak ni, apuno ze pa antom afiŋo. 15 Ze ña kob aliin o aniin a ka pfiŋo. 16 Ña ankiji ña hap lo, o iino na lo a pfiŋo. 17 Ña ladar aliin na aniin khuzin a ka pfiŋo. 18 Ze baña bopugz guti, anka aloŋ tap asiinz na plaak ka sa koblo oluku, ze ampkez, maak duko zu liit; 19 za jik nazo ankint pun zuri, yaanz na pliiti, ankobunk lo aphutno, a ka pluka ŋnu ŋnsi asokŋuk lo, a sa pot ajund lo ankint ahil siŋl. 20 Ze ña jek oŋol kob ninjuuk lo ñiinz o ñaz, ka akez ze kiiñ lo, ze minzmun a ka pnornorno; 21 ze ampkez zonu ominzun o opugzan, nminz lo azo pnornorno, zonkont a oko onsaam lo. 22 Ze boiinz guti, diisun ñaaz anleempoi, anka pu kint pun na lo, ka ñaaz azi diiso maakrin, ñandisnunk lo opluk ze mi ahin ñaaz aminzun ñaumi; apluk ze mi bo dol olado zumi lo aluk. 23 Ze ñaaz diiso maakrin, uluk opho phila na phila, 24 pkil na pkil, pñiin na pñiin, kñene na kñene, pzima na pzima, 25 ptur na ptur, oris na oris, kob na kob. 26 Ze ña kob ninjuuk lo ñiinz o ñaaz sok lo pkil, akhutun lo aksol na mburi zonkont pkil lo. 27 Ze akob ninjuuk lo ñiinz oñaaz kit lo pñiin akhutun lo aksol na mburi zonkont pñiin lo. 28 Zoiit okal yu ñiinz o ñaaz na ptin anka akint kezi, oiit okal ominzun ka ptapo na ilaak; oyemz olo ozo pdoho, nminzolo azo pzwo pjuuk. 29 Zoiit okal ominzun jon ze yu baña, ka nminz olo me na mnjona ka azi tana, ka oiit okal bi fiŋ ñiinz o ñaz, o ptapo na ilaak, ka nminz olo ka pfiŋo uz. 30 Ze nminz olo bi zwo pluk antom pburburun phila lo, a pluk ŋun uzuuz ŋnsi bo zuŋi lo aluk. 31 Zoiit bi yu nmpoz ñiinz o nmpoz nmpili, a ka pdolo ze mi oiimna ominzi jaki. 32 Zoiit okal ominzun bi yu ninjuuk ñiinz o ñaz, nminz olo opluk nminz ninjuuk onsaam 30 osi prat, oiit ominzun ka ptapo na ilaak.
33 Ze ña jip plik o uhir azi ler ba ka oiit oloŋ o ohuru bi jet ze bolo, 34 nminz uhir opluk nminz lo onsaam, antom asa jek oyemz.