Ŋiimna 10
(Oiimna 5:1-12)
20
Ka Uzi lado olado ominzi uzuuz : 2 Nji Uriinani, Njoun NYEEK, Uzi nu, umpuni wi zosaak Ejitu, zun pjuuk.3 Ika ka ŋnzi ŋloŋ zurun ni.
4 Ika fej pun zu polo uzi nu, nin un oloŋ onaami na olo duzu, nin zeu ozee, nin ze mnzup mhomi zeu ozee. 5 nde ika ŋupr ŋa ka nde ka buur ŋa; zonkont njoun NYEEK, Uzi nu, Uzi uñendwi, unjai ka ten pjwa boliin bopoz ze bowk boko ampjau ze bowai boko, bonzukzuk, na bonaagal boko ze baña bombirki nji. 6 Ka nja kjaaŋ kñago ampjau ze iiñ 1000 ze baña bonfundarki nji antom baap ŋiimna ni.
7 Ika du ktiim NYEEK, Uzi nu, ze klas, zonkont NYEEK azo piin ña andoli jaunk, injaka ñani pka pjwa.
8 Lelun onu ksaaudu uditun nolo. 9 Tihunan ŋnu 6 antom ulemp ŋun uzuuz ŋnsi ukaŋi plemp. 10 Zonkont onu ojaandu o ksaaudu ksi NYEEK, Uzi nu. Ika dol utihun uloŋ, nin wi, nin awku ñiinz o nmpili, nin nnjuuk nu ñiinz o ñaz, nin onsaam nu, o nya anhoi ze mez nu. 11 Zonkont ŋnu 6, NYEEK lemp duzu nozee, na ofor na ŋun uzuuz ŋhoŋi zolo, ka ayooŋ zonu ojaandun. Hunkran, NYEEK zudun mnjona zonu ksaaudu antom diitun nolo.
12 Moodon aliinu na aniinu, injaka mi NYEEK, antom uhilun pka ŋlur ŋnsumŋi zosaak, oi NYEEK, Uzi nu, oi phulu.
13 Ika fiŋi.
14 Ika piinz na ñaaz wani pmar.
15 Ika kiiji.
16 Ika jubjubun akiinz nu.
17 Ika yutzar mez akiinz nu. Ika yutzar ahar akiinz nu, nin nnjuuk lo ñiinz na ñaaz, nin oiit lo okal, nin ohuru lo, nin un oloŋo osi akiinz nu kai.
Moises nzu uido zu Uzi na bopugi
(Oiimna 5:22-33)
18 Bopugi uzuuz iin impantaŋ na kliklik, te mntinzan mnsi ptin pkluulpi, onkuŋ ka duhro; ka bopugi, iin un ominzi, pun zolo naz un onloi. 19 Ka bo jak Moises: Wi uhilun plado na ndo, ndo pte; ka ika Uzi lado na ndo, ndo ki kbi kez. 20 Moises seemb bopugi: Nde ika liinki; Uzi biki ptelman nde antom mnkalo Wolo hilun pho zurun nde, antom nde ki kjuu. 21 Bopugi duko naz un onloi, ka Moises, ñog ze knzun kndimizki zun Uzi hili oni.
Ŋiimna ŋinsi Pkak
22 Ka NYEEK jak Moises: Hunkran woun pjak bowk Israel: Nde iin ze mi nji ladomunk na nde duzu. 23 Nde ika lemp ŋnzi ŋnsi prat ze kwaŋi. Nde ika lemp ŋnzi ŋnsi mhuru antom ŋho ŋnsi nde. 24 Lempan pkak psi mbool udo wojun unturowi duzu polo, ŋun nu ŋhaloŋi ŋinsi phyoŋ, ŋmpalalu nu, na ŋiit nu nkal; ze ŋnjir uzuuz zun nji zui mnlelnin ktiim ni, njo pbi ze wi antom pzuu mnjona. 25 Zulempin pkak psi ilaak, ika lempa na ilaak infejohi; Zutihun yolo na iziij nu, wo psok oiimna pkak. 26 Ka ika payo pkak ni zorir antom uki kiino urimu.