Uzi lado na Moises zonkuŋ Sinai
19
Ze pli phajzan bowk Israel pun ze Ejitu, zonu oseke ze pli pminzpi, bo jau zolaal Sinai. 2 Kero kabo pun ze Refidiŋ, bo ya zolaal Sinai, ya zoñnor zurun onkuŋ. 3 Moises payo zonkuŋ phya pjik na Uzi, Zonkuŋ ka NYEEK dulo jak lo: Hunkran woun plado na baña kiiñ Jako, antom ujak bowk Israel: 4 "Nde iin un nji doli bojitu, ze mi nji sabmunk nde injaka oplukaku jai ka sab ŋhukolo ze iwaaklu antom ka hizna, bina nde zun nji onze. 5 Ze krankanki, ze nde digzan pte prim ni na mnjona baap phuuz ni, njo pdat nde ze psoof ŋrasa ŋnloŋ antom nde o bopugi ni, nji huli ulujl. Zonkont osaak uzuuz o osini; 6 Nde phyoŋ pliin bopenen Uzi, osaak onhiimni. Olado ominzi ol woun pjak bowk Israel.7 ka Moises bi du boyeek bopugi, zuup zurun boko olado ominzi uzuuz osi NYEEK jaki lo a do. 8 Ka bopugi seemb ze prim ploŋ, ŋun uzuuz ŋinsi NYEEK jaki ndo, ndo pdo ŋa. Ka Moises zuup NYEEK olado bopugi. 9 NYEEK jak Moises: Njo pbi ze wi ze knzun kndimzki, antom bopugi hilun pte zo yaarin anze lado na wi, antom bo hilun phaz ze wi oloŋ. Zonkont Moises hil o zuup NYEEK olado aladoi na bopugi.
10 NYEEK jak Moises uz: Yan ze bopugi ujinjinzun boko hankri na faan. Bo ñou yun boko itiimo, 11 bo bamni phyoŋ onu oajzan; zonkont onu oajzan NYEEK, ze ikil bopugi uzuuz , a phyeto duzu onkuŋ Sinai. 12 Wopzu ilil ze kwaŋ onkuŋ isi bopugi oi pnazna, ujak boko: nde ika payo onkuŋ, ka nde ika dapro klil olo; ña andaproi olo, zowadadi a pkez. 13 Ka kñene kloŋo kozo pdapro a, ña andaproi olo zowadadi a ptapo na ilaak o pfiŋo na insaaŋen. Ŋanun a oko onsaam o ñanjina, azo phil. Zoluulr ptin un onjoni, nde payo onkuŋ. 14 Kero Moises yeto zonkuŋ, aiimnan bopugi; antom ka boñou yun boko itiimo. 15 Ka Moises jak bopugi: Nde bamnoon phyoŋ onu oajzan; nde ika ñog ze ñaaz.
16 Kero onu oajzan ka jiInz, oka okik oyeek na impantaŋ na knzun kndimzki duzu onkuŋ, na mntiŋzan magmi mnsi ptin, anka bopugi uzuuz bo hil o zunaam uzoñnor liinki, ka ŋleef ka ki na boko. 17 Ka Moises ya na bopugi zuri phya pjik na Uzi; bonaz ze kwaŋ onkuŋ. 18 Onkuŋ Sinai uzuuz kaduhro, Zonkont NYEEK yeto za zuroo; Odu olo payo injaka odu onfurnu oyeek, onkuŋ uzuuz liklik maakrin. 19 Mntiŋzan ptin ka tiŋzan maakrin; ka Moises ka lado, ka Uzi ka seemb lo na prim phalpi. 20 Kero ka NYEEK yeto duzu knduunslu onkuŋ Sinai, ka NYEEK du Moises ze duzu knduunslu onkuŋ; ka Moises payo zolo, 21 ka NYEEK jak Moises: yeton ujak bopugi bo ki kzip klil ampjau ze NYEEK antom piin lo, antom bonsumki ze boko kikbi kez. 22 Ka bopenen Uzi uz, bonjai ka ñog ze NYEEK, bo ka piimna, zonkont NYEEK kikbi kfiŋ boko. 23 Ka Moises jak NYEEK: Bopugi bozi hilun payo zonkuŋ Sinai, Zonkont ulado na ndo, jaa: zuun ilil ze kwaŋ onkuŋ antom uiimna nolo. 24 NYEEK seemb lo: Solun, uyeto, antom wot upayo, wi na Aroŋ; ka bopenen Uzi na bopugi bozi hilun pzip kli antom payo phya ze NYEEK, zonkont a kikbi kfiŋ boko. 25 Ka Moises yetoo, ya ze bopugi zuup boko ŋun ŋminzŋun uzuuz .