Phuuz Uzi dopi na Israel
24
Antom ka Uzi jak Moises: Payon wya ze NYEEK, wi, Aroŋ, Nadab, Abiu, na boyeek 70 bosi Israel; nde buur na nji un onloi. 2 Moises nkonalo a oun pñog ze NYEEK; bondaakun bozo pñog, ka bopugi bozo payo na lo.3 Ka Moises bi lado na bopugi antom zuup bopugi olado uzuuz osi NYEEK na ilul lo uzuuz ; ka bopugi seemb uzuuz ze prim ploŋ jaa: Ŋun uzuuz ŋnsi NYEEK jakŋi ndo, ndo, ndo pdo ŋa. 4 Moises pis olado NYEEK uzuuz , antom nazo ze nfa lis lemp pkak ze pñog onkuŋ, na inzoŋ 12 isi ilaak ze mi iiñ 12 isi bowk Israel omi. 5 Ka hil bopoz bozal boloŋ ze bowk Israel, bonturki un onhaloi osi NYEEK, dol wojun usi phyoŋ ŋiit nkal ŋmpozŋi. 6 Moises jek psoof pñaak zu zyem; ka psoof pdapun has polo duzu pkak. 7 Ka jek oliuri phuuz, leiri zurun bopugi. Ka jak boko: Nja pdo ŋun uzuuz NYEEK jakŋi; Nja pzal ŋa. 8 Moises jek pñaak has polo duzu bopugi jaa: Pñaak pi o psi phuuz NYEEK dopi na nde ze mi alodomi uzuuz .
9 Moises payo na Aroŋ, Abiu, Nadab, na boiinz boyeek 70 bosi Israel. 10 Boiin Uzi Israel, ze izima zozee ohili oko injaka ilaak inurohi ikndwoi safira, onamzani na duzu ze knfasi kolo. 11 Uzi bozi solun kñen ze boyeek bowk Israel bondatoki pdo boko khuzin; boiin Uzi dee daani.
Moises na boyeek pot payo onkuŋ
12 Ka NYEEK jak Moises: Payon onkuŋ ubi ze nji, zonkuŋ, wo pduko za; njo phulu itaagwa ilaak na ŋiimna nji pisŋi antom ujukjukun bopugi. 13 Moises ya na Joswe, nmpoz lo, ka Moises payo zonkuŋ Uzi, 14 ka a jak boyeek Israel: Nde yoŋa ndo zunzi ando kint ndo kak ze nde boloŋ. Aroŋ na Hur bo pduko nan nde; ña ankai un oloŋ aklado na boko.
15 Kero Moises payo, ka knzun kloŋ ler onkuŋ. 16 Ka hulujl NYEEK yetoo zañ zonkuŋ Sinai, ka knzun ler olo ŋnu 6, zonu ojaadun, NYEEK du Moises ze psoof knzun. 17 Mnamzin ulujl NYEEK hil oko injaka uroo biknturbi ze knduunslu onkuŋ, zikil bowk Israel. 18 Ka Moises neej ze psoof knzun kero ka payo Onkuŋ. Zañ zonkuŋ ŋnu 40 ze pnak 40 zurim.