Oiili NYEEK o phya zurun bopugi
33
NYEEK jak Moises: ''Punun zi, wi na bopugi ubinki zosaak Ejitu, nde ya zosaak nji bisroi njo phul Abroŋ, Jaaki na Jako, kero ka nji jak boko njo phul iiñ boko osaak ominzun. 2 Njo phil oiili ni zurun nu, njo punun bokananeu, boamoreu, boeteu, boperiseu, boeveu na bojebuseu zuri. 3 Nde phya zosaak oniri onjai ka buk mntau na pnou; mbazo phya na nde, nde o bopugi bontambki ijuuns, nki kbi ktoom na nde ze book.''4 Kero bopugi te onowa owzin, bo tep phur, nin ña ze boko azi ñigo na ŋun boai ka ñigno, 5 zonkont NYEEK hil jak Moises: ''Jakun bowk Israel: Nde o bopugi bontambzki ijuuns; ze nji bi ze wi, njo ptoom na wi; punan ŋun ukñignoŋi, antom mme un njoi plempu. 6 Hunkran bowk Israel punundun ŋun bokñignoŋi ptep zonkuŋ Horeb ampjau zurun.
Oku osi ujik na NYEEK
7 Moises hagzo phank oku, pñal unaam uzoñnor, adu oku ominzun oku uzoñnor. Ña kmberi NYEEK akpun khya zoku uzoñnor, ohili o ze pñal unaam usi uzoñnor. 8 Zoyar Moises pun phya zoku ominzun oñali, bopugi uzuuz ba kdeŋo knaz kana ña ze plumun oku lo, ka ten Moises zufez an akint kneej zoku. 9 Zoyar Moises an neej zoku, knzoŋ knzun ka kyeto knaz duzu plumun oku; NYEEK hil aklado na Moises. 10 Bopugi uzuuz hil akhin knzun duzu plumun oku; bopugi hil aknazo uzuuz , kana ña ze plumun oku lo a kŋupr NYEEK. 11 Uzi hil a klado na Moises mnkil na mnkil, injaka ña aklado na ahindu lo; antom Moises ot kak zunaam uzoñnor, ka nmpoz nzala akndwoi Joswe, ntihun lo, awk Nuŋ aza ka lo oku.
Moises ñaun Uzi wo na boko
12 Moises jak NYEEK: '' Ujakin: Antom mpunun bopugi uki nsolna, ka uzi dolin pme ña woi phil na nji; ka ujaa: nji me ktiim nu; usa iin kñago uz ze kil nin. 13 Krank ze nji iin kñago ze kil nu, nji ñau nu ujaaŋi book nu, antom mmeu, iin kñago ze kil nu; antom ulel pja bopugi uki oko bopugi nu. 14 Ka NYEEK seemb lo: ''Nji urinani njo phya na wi, antom nzuu uyooŋ.'' 15 Ka Moises jak lo: ''Wam phya na ndo, ika zu ndo antom ndo pun zun ndazi. 16 Ka ndo pdo pjaan ampme ndo iin kñago ze kil nu, nji na bopugi nu? Mbaza hunkranda, mbaza ooru na ndo ojaaŋun jaa ndo diiti, nji na bopugi nu, na bopugi uzuuz ze ŋnsaak?
Moises ñaun Uzi ujaaŋ lo ulujl wolo
17 NYEEK jak Moises: '' Njo pdo un ujakink nji; zonkont uiin kñago ze kil ni, ka nji meu ze ktiim nu.'' 18 Ka jak wolo: ''nji ñaunu antom ujaaŋin ulujl nu.'' 19 NYEEK seemb lo: ''Njo pzu mnjona ni zip zurun nu njo ptezan ktiim NYEEK; njo ka kñaŋo ze ña nji jewi pñago sa poto pñago ña nji jew pñago. 20 Sa pot jaa: Uzo philun phiin mnkil ni, zonkont ñiinz azi hilun piin mnklil antom phil.'' 21 NYEEK pot jaa: ''Tenun zun loŋ ze kwaŋ ni; zoz woun pnazn duzu plaak phyeek. 22 Zoyar ulujl ni an zipi, njo pzuu zuir plaak phyeek njo pleru na kñene, ankint nzip. 23 Njanka punun kñen ni wo piin ni zufez; ka mnklil ni uzo piin ma.''