Oiit osi mhuru
Oiimna 9:7-29
32
Kero bopugi iin ja Moises jon pyeto zonkuŋ Sinai, ka bo ya ze Aroŋ jak lo: ''Nazoon antom ulemp ndo uzi boi phya zurun ndo, zonkont ndozi me un onhiri na Moises ñiinz ampuni ndo zozee Ejitu.'' 2 Ka Aroŋ jak boko: Nde punan ŋrejel ŋhuru ŋnsi bo ahar nde, ŋnsi bowk nde bompili, nde bina ŋolo nde bi hulin. 3 Ka bopugi punun ŋrejel ze iwaz boko biin hul Aroŋ. 4 Aroŋ seh ŋa uzuuz ze iñen boko, yalan ŋolo, antom lemp owai. Ka bopugi jaa: Nde tenun bopugi Israel, ondai oun uzi nde umpuni nde zozee Ejitu. 5 Ka Aroŋ iin olo, lemp pkak zurun owai antom lado, jaa: "Faan opho onah osi NYEEK". 6 Ka onu luŋ jiinzi, ze khanan, ka bo bina ŋnsaam ŋloŋo antom dol wojun unturowi ka bobina ŋun ŋhaaloŋi ŋnsi phyoŋ; Ka bopugi zoori antom pde, pdaan, antom pnoonz. 7 Ka, NYEEK jak Moises: yetoon, osar; zonkont bopugi nu, bosi upununki ze Ejitu, bo jwi ze nji antom birin, 8 bo paloo osar ze book usi nji zui boko bo yaanz; bo lemp owai onhyalani antom ŋupr olo, dol olo wojun, antom jaa: Israel, ondai oun uzi nu, unpuni wi zosaak Ejitu. 9 Ka NYEEK pot jak Moises: Nji iin bopugi uki bo oko bopugi bontambzki ijuuns. 10 Yooŋan antom ntoom na boko na oreu ni; ze wi njo pzu kiiñ nu kmag zosaak.Moises zoknar bopugi
Dt 9.25-29
11 Ka Moises buur na NYEEK, Uzi lo, jaa: "NYEEK, oyezi kaa ku deuzar bopugi nu, bosi upununki ze Ejitu na philun psi kñen nu. 12 Zonkont bojitu opja: Ze phuz weene zuun ka upunun boko antom pfiŋ ze nkuŋ antom ptoom na boko zosaak? Hutnan oreu nu antom ujeñlo ze khuzin kminzki duzu bopugi nu. 13 Lelun botihun nu Abroŋ, Jaaki na Israel, ze kñago ubisro antom jak boko, njo pbundar iiñ nde injaka ŋhuzu duzu, osaak nji ladoink zonkont olo uzuuz , njo phul iiñ nde osaak ominzun, antom iij olo onzañi. 14 Ka NYEEK jiñlo ze khuzin ksi a jewi pdo bopugi lo.
15 Ka Moises yeto duzu onkuŋ na itaagwa 2 isi ilaak isi phuuz, ze iñene, impisohi ze ŋnjir uzuuz . 16 Itaagwa iminzyun Uzi lempun yolo; antom pis ŋiimna wolo ze yolo. 17 Kero Joswe te mntiŋzan mnsi bopugi kdomi, ka jak Moises: "O ka mntiŋzan ogut zun uzoñnor. 18 Ka Moises seemb lo jaa: Ozi o mntiŋzan mnsi bonkaki kpe ka ori o mntiŋzan mnsi bompeoki, oko mntiŋzan baña boknhyehki mom nji temun.
19 Kero Moises jau ze kwaŋ zun uzoñnor, ka iin owai na oki; ka deuz maakrin. Itaagwa ilaak abuphyunk, a lis ya zozee, antom kit yolo ze kwaŋ onkuŋ. 20 Ka jek owai ominzun osi bo lempunk, tur olo zuroo, ka alonolo an okint huglo mbool, ka zu molo ze mnzup, hul bowk Israel ka bo daani. 21 Ka Moises yep Aroŋ: ''Oye bopugi uki dolun wi, ontuntoi onkai ka ubi na khuzin kyeeki duzu boko? 22 Ka Aroŋ seemb lo: '' Ika deuzarin, nyeek ni; ume ja bopugi uki hagzo phuglo phya ze khuzin. 23 Bo jakin: Lempan ndo uzi woi phya zurun ndo, zonkont ndozi me un ondoli ñiinz aminzun oi Moises ampuni ndo zozee Ejitu. 24 Ka nji jak boko: Ña ankai mhuru akpunun molo. Bohulin ma; ka nji lis molo zuroo, ka mpun owai ondai.
Moises hilan pfiŋ boŋupr ŋnzi
25 Moises iin ja bopugi hatati, zonkont Aroŋ hutun baka bo yaanz ze mmol zurun bo bir boko. 26 ka Moises naz zoneeji zun uzoñnor jak boko: ''Ña anhoi zojir NYEEK, akbi ze nji.'' Ka bowk Levi uzuuz ya zoñnor na lo. 27 Ka jak boko: hunkran NYEEK jakdun, Uzi usi Israel: kana ña kjek kej lo ktan kolo zulaank lo, apun, ataneej zunaam, aya zojir oloŋ na oloŋ, afiŋ pzaaro lo, ahindu lo na akiinz lo. 28 Ka bowk Levi do ze mi Moises jak mi boko; Zonu ominzun baña bonkezki bo hilun pho boiinz 3000. 29 Ka Moises jaa: ''Nde iimnana hankri ze NYEEK; kana ña ze nde azi ka pbaap phila psi awk na pzaaro lo, antom uhilun pzu nde mnjona hankri.''
Moises zoknar bopugi
30 Kero onu luŋ jiinzi, Moises jak bopugi: ''Nde, nde do pjwa pmagpi; ze krank, njo payo phya ze NYEEK, njo pten ze njo philun pber mnsi Uzi oi pjour nde pjwa. 31 Hunkran Moises kakdun ze NYEEK jaa: ''bopugi uki bo do pjwa pmagpi, mnsi bo lempmunk uzi mhuru antom ŋupr wolo. 32 Nji ñaun nu jouran baka pjwa boko; ampho minzmun ukfah ktiim ni zoliuri upisunk.'' 33 Ka NYEEK jak Moises: ''Njo pfah zoliuri ni baña uzuuz bonjuuki. 34 Yan, ze krank uzoŋ bopugi uyan zun nji jakzi wi; oiili ni o phya zurun nu; zonu njoi bi piinu, njo pbotun baka pko ze pjwa boko. 35 Hunkran NYEEK fiŋdun bopugi, zonkont bolempunk owai Aroŋ hili yalani.