Khuzin pkez bopoz boseke
11
NYEEK jak Moises: "Nji poto philan khuzin kloŋ ze Faro zosaak Ejitu. Antom ahutun nde, nde pun zi; zoyaar lo anhutun nde, zowadadi a pdook nde uzuuz . 2 Jakun bopugi ze krankanki, boiinz uzuuz na bohaz, kana ña akñaun boiinz na bohaz ze pkiinz ŋun ŋnsi praata na mhuru. 3 NYEEK zu boisraelita bo iin kñago zojir bojitu, ka Moises sa hil o ñiinz ankai ktiim khyeek zosaak Ejitu, zikil boyeek bogutun Faro na bopugi.4 Ka Moises pot jaa: hunkran NYEEK jakdun: Ze pñog psoof ujuuŋ nji uriinani, njo pzip ze psoof Ejitu; 5 Bopoz boseke uzuuz zosaak Ejitu bo pkez, ptep ze nnsek Faro aika zoo ze pzoori pliin lo, nnsek nnjuuk lo ñaaz aika loŋ lo trigu, ampkint pjau ze ŋnsek ŋnsaam ŋnsi mez. 6 Ze Ejitu uzuuz opka ihur yeek yani po iino, ze nkil ŋnzipŋi na ŋikmbiŋi. 7 Ze psoof boisraelita nin ña aloŋ azi kezi, ptep ze baña, ampjau ze ŋnsaam ŋnsi mez, ka ohul o zo pluut, antom nde me pja NYEEK diitun baña Ejitu na boisraelita. 8 Ka boyeek bogutun Faro uzuuz bo bi ze nji antom pŋup zurun ni pja: Punun, wi na bopugi boknzalki wi. Zotoomi njo pun. hunkran Moises pundun na oreu oyeek zurun Faro. 9 Ka NYEEK jak Moises: Faro azo pte nde, antom nhilun pbundar ŋun ŋhatatŋi zosaak Ejitu.
10 Moises na Aroŋ bo do ŋun ŋhatatŋi ŋminzŋun uzuuz zurun Faro; ka NYEEK zu ujuuns Faro utaambz, azi osi phutun boisraelita bopun zosaak lo.