Khuzin ksi ngula
10
NYEEK jak Moises: Yan lado na Faro, zonkont nji zu ujuuns lo na isi boyeek bogutun lo, izañ ze ptaambz, antom nhilun pdo ŋun ŋhatatŋi ze psoof boko, 2 antom uhilun pzuup bowku uz, na bowai nu ze mi nji domi bowk Ejitu irah na ŋun ŋhatatŋi ze psoof boko, antom uhilun pme njoun NYEEK.3 Hunkran Moises na Aroŋ yadun ya lado na Faro jak lo: NYEEK, Uzi boebreu jaa: Ampjau zonu oon ol woun pzañ ze phyeel phyool ween zurun ni? Phutun bopugi ni bopun, antom boya dolin wojun. 4 Ze waampjeu phutun boko bo sol, faan njo pbina ngula zosaak nu. 5 Ŋo pler osaak uzuuz , ozee ozo phino; Ŋo pde ŋun olur ilaak duklani ampkint pjau ze mun uzuuz mnduklomi, mun miknazomi ze ksaal. 6 Ŋo psum ze mez nu, na iku boyeek bogutun nu, na iku bojitu uzuuz . Khuzin kminzki ko pliinkun ampenpen ki nde oi o iin zosaak nu na bondiima nu anjau hankri. Ka ahuglo pun zurun Faro.
7 Ka boyeek bogutun Faro jak lo: Boomba ñiinzi oun pho khuzin ze nja? Hutnan boiinz bo sol, boya do wojun usi NYEEK, Uzi boko. Uri me pja Ejitu sokoo? 8 Hunkran boyadun na Moises na Aroŋ zurun Faro; aminzun jak boko: Nde hilun psol phya ptihunar NYEEK, Uzi nde. Ka nji jeu pme bi noon oum psol? 9 Moises seemb lo: Ndo ka psol uzuuz, bopoz bozala, bonzafki na boyeek, bowk ndo boiinz na bompili, na ŋmpalalu, ŋmpi na ŋiit zonkont ndo phya pdo onah NYEEK. 10 Ka Faro seemb lo: NYEEK o pho na nde, ze nji hutun nde, nde sol na bopoz. Zowadadi nde ka ŋnzaafu ŋhuzŋi. 11 Ozi hilun pho pjaunk; nde kaukun psol bonkonan nde boiinz, phya ptihunar NYEEK; un ominzi ol uñaunun. Ka bo dook boko zurun Faro.
12 Ka NYEEK jak Moises: Solnan kñen duzu Ejitu antom ngula bi zosaak Ejitu antom ŋnde mun mduklomi, mi olur ilaak anun psok. 13 Moises solun plaŋra duzu Ejitu, Uzi hutun oyook ze pmair onu ze pnaak uziindan na urim uziindan kero onu toom pjiinz oyook bina ngula. 14 Ka ngula taaslor uzuuz zosaak Ejitu, zoo ze ŋnjir uzuuz, sum maakrin; ozi hil o ka ngula injaka ŋminzŋi, ka ŋloŋ ŋozi poto bi pho injaka ŋminzŋi. 15 Zonkont ŋnler ozee uzuuz anko kint diimzi; Ŋnde otun uzuuz na mbuk mun mi olur ilaak duklani. Zozee Ejitu uzuuz un oloŋ ozi duklo onkai iku ifulamul zozee Ejitu uzuuz. 16 Ka Faro hilan pdu Moises na Aroŋ osar, osar jak boko nji juwi zojir NYEEK, Uzi nde na nde uz. 17 Ze krankanki nji ñaun nde, nde jourin pjuwa ni, antom nde buur na NYEEK, Uzi antom upunun ze nji pkez pndaapi. 18 Ka Moises pun zurun Faro, buur na NYEEK. 19 Ka NYEEK zu oyook omagi ofuuz ze phyour onuu, jek ngula uzuuz lis ŋolo ze krik Kjeenkle; ka ozi duklo ogula oloŋ zozee Ejitu. 20 Hunkran NYEEK zudun ujuuns Faro kutaambze antom azi hutun bowk Israel bopun bo sol.
Khuzin Urimrim
21 Ka NYEEK jak Moises: solnan kñen nu duzu, urimrim hilun bi zozee Ejitu, urimrim baña oi plaagz. 22 Hunkran Moises solnun kñen duzu, ka urim umagbi bi duzu Ejitu uzuuz ŋnu 3. 23 Bozi hilun phindo, ñazi hilun pnazo zun a oonzi ŋnu 3; Ka bowk boisraelita uzuuz ka knfasi zun bo oonzi. 24 Ka Faro du Moises jak lo: Nde yan do wojun NYEEK. Ŋmpalalu, ŋiit ŋhilun pduko. Ka bopoz nde hilun psol na nde. 25 Moises seemb lo: Wi uriinanu Woun phul ndo ŋnsaam ziñen ndo, ndoi phya pdoon wojun unturowi ndoi phul NYEEK, Uzi ndo. 26 Ka ŋnsaam ndo, ndo psona ŋa; nin kñiiri kozo pduko; zonkont ndo pjek ze ŋa pdoon wojun usi NYEEK, Uzi ndo, ze ndo ampo jau dolo, ndozo me un ndoi pfiir pdoon wojun NYEEK. 27 NYEEK zu ujuuns Faro taambze azi digzan phutun boko bo sol. 28 Ka Faro jak Moises: Punun zurun ni, lipun uzi pot ophin mnkil ni. Zonkont onu uiini mnkil ni wo pkez. 29 Moises jak lo: Ugusoo; mbazi poto phin mnkil nu.