Khuzin Ksi Pkez Ŋnsaam
9
NYEEK jak Moises antom aya ze Faro a jak lo: Hunkran NYEEK, Uzi boebreu, jakdun: Hutnan bopugi ni boya tihunarin bo dolin wojun. 2 Zonkont zuneen boko psol, ba pot bup boko na ofooza, 3 kñen NYEEK opho duzu ŋnsaam nu, ze ksaal, ŋnsumpliz, ŋhuru, ŋnsuntukluŋ, ŋiit, ŋmpi na ŋmpalalu. Ŋo bup pmaak phuzin. 4 NYEEK o pdiitun ŋnsaam boisraelita na ŋnsi bojitu, ka ozo pkez nin onsaam oloŋ osi boisraelita. 5 NYEEK zu klehe: Faan NYEEK opdo un a jaki zosaaki. 6 Ko onu luŋ jiinzi NYEEK fiŋ ŋnsaam bojitu uzuuz, ka nin onsaam oloŋ osi boisraelita ozi kezi. 7 Faro hilan pten ze ŋnsaam boisraelita, azi iin onsaam oloŋ onkezi. Ze ŋun ŋminzŋi uzuuz ujuuns nliin zañ ze ptaambz, ka azi hutun bopugi bo sol.Khuzin ksi Ŋntap
8 NYEEK, Uzi lado na Moises
9 Ophuglo kru zoyook, zosaak Ejitu uzuuz zun uzuuz o phuglo ŋntap ŋoi pmai ze baña na ŋnsaam ze Ejitu. 10 Hunkran Moises na Aroŋ jekdun ofoou osi onfurnu ya zurun Faro. Moises gur olo zoyook, kohuglo ŋntap ŋmaiŋi ze boiinz na ŋnsaam, 11 bokooz bominzkun bozi hilun pduko pzañ zurun Moises zonkont bonkaki ŋntap ze ŋnleef boko na baña Ejitu uzuuz . 12 Antom ka NYEEK zu ujuuns Faro ka utaambzi, azi te baka, ze mi NYEEK jakmunk Moises.
Khuzin Olur Ilaak
13 NYEEK jak Moises: Nazoon ze nfa lis wya lado na Faro ujak lo: Hunkran NYEEK, Uzi boebreu jakdun: Hutnan bopugi ni bo pun boya tihunarin 14 Ze krankanki Njo pzu khuzin ni uzuuz jet duzu nu, boyeek bogutun nu, na bopugi nu, antom uhilun pme pja ozi ka ña anaami na nji zosaak uzuuz . 15 Tenun nji hil o hilun pnornor nu, wi na bopugi nu, botihun nu, na pmaak philumpi ptoom na wi zosaak. 16 Ka nji um hutnu na phila, antom pjaaŋu philun ni, antom pzu ktiim ni hilun pzaho zosaak uzuuz. 17 Ka uzañ zubido na bopugi ni, antom pnin phutun boko bo sol? 18 Tenun, faan ze ori ondaan, njo phutun olur onliinkni osi ilaak olu zozee Ejitu uzuuz, olur onhani pho iino zotepr Ejitu anjau hankri. 19 Ze krankanki. hilanan pneejun ŋnsaam nu uzuuz ŋhoŋi ze ksaal, baña uzuuz o ŋnsaam olur ilaak disi ze ksaal, ŋozi neej ze mez ŋho pkez uzuuz. 20 Boyeek botihun Faro bonkalokunk olado NYEEK, kana ña khilan punun boyafna boko na ŋnsaam boko ze ksaal phyan mez; 21 boani pte un NYEEK jaki, bozi punun boyafna boko na ŋnsaam boko ze ksaal.
22 Hunkran NYEEK, Uzi jakdun Moises: deŋun kñen duzu, olur ilaak opjet zozee Ejitu uzuuz . Opjet duzu baña, duzu ŋnsaam, duzu mun uzuuz . 23 Moises deeŋ plaŋra duzu, NYEEK zu okika na olur ilaak na impantaŋ, ka uroo yeto duzu osaak. Ka NYEEK zu olur ilaak ko yeto duzu osaak Ejitu. 24 Ze minzmi ohil ka olur ilaak na uroo na olur ilaak omagi maakrin, onhani pho iino zotepi osaak Ejitu uzuuz. 25 Zosaak Ejitu uzuuz olur ilaak toom na ŋun uzuuz ŋhoŋi ze ksaal, baña na ŋnsaam; sa kitkitun mun uzuuz ze ksaal na mun myeek. 26 Zosaak Goseŋ onkona olo zun boisraelita oonzi, olur ilaak ozi lu za.
27 Ka Hunkran Faro hilanun pdu Moises na Aroŋ jak boko: Wyaaswi nji juwi; NYEEK o ña anjaali, nji na bopugi ni ndo o baña bani pme Uzi. 28 Nde buuran na NYEEK; Okik oyeek onliinkni na olur ilaak oliiŋi. Njo phutun nde nde sol, nde zi poto pduko zi. 29 Moises seemb lo: Zo punin ze kmbaau, njo pdeeŋ iiñen pbuur na NYEEK; Okik o ptoom, ka olur ilaak ozi poto pho; antom uhilun pme osaak o osi NYEEK. 30 Ka wi, na boyeek bogutun nu, ndezi me un onhoi mnkalo NYEEK, Uzi . 31 Mmuuz na ksepru ki kndwoki sevada soko, ozi hil o jiiji, ka mmuuz o ka pzeñ 32 Trigu na senteyu ŋozi soko zonkont ŋozi hil o mai. 33 Ka Moises pun zurun Faro, sa pun ze kmbaau deeŋ iiñen buur na NYEEK, ka okik na olur ilaak toomi.Olur ilaak ozi pot lu ze Ejitu. 34 Kero Faro iin ja olur toomi, olur ilaak na impantaŋ ozi poto o, ka pot juwi tambzan ujuuns, alo na botihun lo pot ze pezun. 35 Ze minzmi Faro, na ujuuns utaambzi, azi digzan phutun boisraelita bo pun, ze mi NYEEK onko jak Moises.