Khuzin ŋhoplo
8
Ka NYEEK jak Moises: Aya ze Faro a jak lo: Hunkran NYEEK jakdun: Hutnan bopugi ni boya tihunarin. 2 Zuyeel phutun boko bo sol, njo pnornorun osaak nu na ŋhoplo. 3 Krik Nilu opsum ŋhoplo, ŋo pun phya ampkint pjau ze mez nu, ampkint pjau ze ku kneeji nu, amphya duzu uliit nu upiinzi, ŋnsa poto phya uz ze iku boyeek bogutun nu, na bopugi nu, ŋo pho ze ŋfurnu nu, na zun ze nagi opoŋ. 4 Ŋhoplo o pbi duzu nu, na bopugi nu na boyeek bopugi nu. 5 Ka NYEEK pot jak Moises: A jak Aroŋ: Jekun plaŋra nu usolun duzu irik, na iruuz Nilu na ŋlagwa, pzu ŋhoplo ŋmpun ze mnzup ŋnsum osaak uzuuz osi Ejitu. 6 Hunkran Aroŋ solnun kñene duzu mnzup Ejitu uzuuz ŋhoplo pun sum osaak Ejitu uzuuz . 7 Ka bokooz Ejitu do jaunk na pkooz boko ka ŋhoplo puni, ankint sum osaak Ejitu.8 Ka Faro du Moises na Aroŋ, jak boko: Nde ñauna NYEEK apunun ŋhoplo ze nji na bopugi ni; antom, nhutun nde nde sol nde ya do wojun NYEEK. 9 Moises jak Faro: Nliin hilun pzuupin onu njoi pbuur na Uzi zonkont nu, na boyeek botihun nu, bopugi nu antom ŋhoplo pun ze iku nu, na bopugi nu, ŋnduko ze krik Nilu. 10 Faro jak lo: Faan. Moises jak lo: Opho ze mi ujakmi, antom ume ozi ka ña injaka NYEEK, Uzi ndo. 11 Ŋhoplo o pun ze kwaŋ nu, ze iku nu, na iku boyeek botihun nu, na iku bopugi nu, ŋho pdukno ze krik Nilu. 12 Ka Moises na Aroŋ pun ze zurun Faro; Moises ñaun Uzi upunun ŋhoplo uzuŋi ze mez Faro, ze mi boladomi na Faro. 13 NYEEK do ze mi Moises ñaumunk lo. Ŋhoplo kez ze iku, zinaam iku na izaanz ijaar. 14 Ŋzoñnor nkuŋ, nkuŋ, osaak ka ñeel un onjoozi. 15 Kero Faro iin ja osaak ka phyooŋ, ka pot pezni, ka Faro yeel pte Moises na Aroŋ, ze mi NYEEK onko jaa.
Khuzin ksi Ŋnzem
16 NYEEK jak Moises: Jakun Aroŋ asolun kñen na plaŋra a kob mbool zozee, antom mhuglo ŋnzem zosaak Ejitu uzuuz. 17 Hunkran bododun. Aroŋ solun kñen na plaŋra kob ze mbool zozee, ka ŋnzem sum ze boiinz na ŋnsaam; kru ze Ejitu uzuuz huglo ŋnzeme. 18 Bokooz ya phugl kru ze ŋnzem na pkooz boko, ka bozi hilni. Ŋnzem ŋmizŋun o ze boiinz na ŋnsaam. 19 Bokooz jak Faro: Kñen Uzi ka. Ka ujuuns Faro zañ ze ptaambz, azi seemb pte Moises na Aroŋ, ze mi NYEEK onko jaa.
Khuzin ŋhura
20 NYEEK jak Moises: Nazoon ze nfa lis, uya zurun Faro; zoyaar lo phya ze krik , ukjak lo hunkran NYEEK jakdun: Hutnan bopugi ni, boya dolin wojun bo ya tihunarin. 21 Zwam phutun boko bo sol njo pzu ŋhur ŋnsumŋi duzu nu na boyeek bogutun nu na bopugi nu. Iku nu, na iku baña Ejitu, osaak Ejitu uzuuz opsum ŋhura. 22 Zonu ominzun njo ptaaslan Goseŋ, osaak bopugi ni oonzi, ozo pka ŋhur ŋnsumŋi ŋminzŋun, antom ume pja njoun NYEEK ze psoof osaaki. 23 Njo ptaaslan bopugi ni, na bosinu. Faan mnjaaŋzin minzmi mo phino. 24 Hunkran NYEEK dodun; knzun kyeek ksi ŋhura, sum ze mez Faro na iku boyeek bogutun lo, na osaak Ejitu uzuuz . Hunkran knzoŋ ŋhur sokdun osaak.
25 Faro du Moises na Aroŋ jak boko: Nde yan do wojun Uzi nde ze mezu osaaki. 26 Moises seemb boko: ozi o na mnjona ndo do wojun NYEEK, Uzi ndo, zozee Ejitu antom obi o un onzijrani zurun ikil boko, boki ktap ndo na ilaak. 27 Ndo phya ze book ŋnu 3 zolaal antom pdo wojun NYEEK, Uzi ndo ze mi ujakmi. 28 Ka, Faro jak lo: njo phutun nde, nde ya do wojun usi NYEEK, Uzi nde zolaal. Ka nde ika loo. Nde buuran zonkont ni. 29 Moises seemb lo: Njo pun zurun nu pñaun NYEEK. Faan ŋhur ŋnsumŋunk ŋho pun ze Faro, boyeek bogutun nu na bopugi nu. Ka ika pot darin ubi yeel phutun bopugi phya pdo wojun NYEEK. 30 Ka Moises pun zurun Faro buuri, ñaun NYEEK. 31 NYEEK do ze mi Moises ñaumunk lo; ka ŋhur ŋsumŋunk pun ze Faro na boyeek bogutun, na bo bopugi lo, ozi duko nin ohur oloŋ. 32 Ka bosol ka ujuuns Faro pe ptaambz; azi jak bopugi bo sol.