Paskwa NYEEK
12
NYEEK, Uzi lado na Moises na Aroŋ zosaak Ejitu, jaa: 2 Pli pndaapi o pho pli pseke ze kana olura. 3 Zuupun bopugi Israel uzuuz ujak boko: Ze ŋnu 10 ze pli pndaapi, kana ña apjek owk ompalalu 1 ze mi bo omi ze mez pliin boko, kana ña opjek owk ompalalu ze kmboot boko. 4 Ze baña ze kmboot boko tiiŋz antom pde owk ompalalu uziindan, akbeunar akiinz lo añogi ze lo, ze mi bo omi ze kfinu boko; ze mi kana ña 1 hilni pde, ze mizmi nde hilun pfin baña bo hilunki pde owk ompalalu 1. 5 Ompalalu ontiik ozo pka ktap, o pho okal onkai olur 1; ndei pjek owk ompalalu o owk opi; 6 Nde baanun na ampjau ze ŋnu 14 ŋnsi pli pndaapi, zu uzoñnor boisraelita uzuuz bo pfiŋa ze montna mntiik. 7 Bo pjek pñaak antom pkir polo zirarm 2 na duzu plumun ze iku bo deeni olo. 8 Zurim uminzun, nde pde oyemz onsowoi zuroo; o pdeo na opoŋ onhani pka iferment na otun onhai. 9 Oyemz ozo pdeo owm, nin onjuŋoi ze mnzup; onsaam uziindan,weene, pkaba na omez, ŋo psowo zuroo: 10 Nde ika duklan un oloŋ ampjau ze nfa; ondukloi nde ptura zuroo. 11 Ze minzmi ndeun pde olo kero nde o bamni, tan inoŋnt ze ilaank, ptan isapat ze izima na oŋol ze kñene; nde pdea osar; uni oun Paaskwa psi NYEEK. 12 Zonkont urim uminzun njo pzip zosaak Ejitu, njo pfiŋ bopoz boseke, bosi Ejitu uzuuz, ptep ze boiinz ampjau ze ŋnsaam ŋnseke uzuuz; njo pdo ŋnzi Ejitu olado. Njoun NYEEK. 13 Pñaak zilumun oun pho mnjaaŋzin ziku nde oonhi; ohini pñaak, njo pzip ze psoof nde, ozo pka ze psoof nde khuzin ksi pkez, zofiŋrin baña zosaak Ejitu.14 Onu ominzi o pho onu nde osi mnlelnin, nde pdola onah osi NYEEK; nde pdola mnlelnin ze iiñ nde antom o mnlelnin mnzañi. 15 Nde pde opoŋ onhani pka iferment ŋnu 7. Zonu oseke nde punun inferment zoku nde, ña nzañi ze pde iferment, ptep zonu oseke ampjau zonu ojaandun, ña minzi o pfiŋo ze psoof Israel. 16 Zonu oseke, nde pka uzoñnor unjiinzwi; zonu ojaandun uz nde pka uzoñnor unjiinzwi. Utihun uloŋ bozo pdo lo zonu ominzun, ze mbaza pde un ode a; un ominzi ol nde hilnun pdo. 17 Nde baapun onah osi opoŋ onhani pka iferment zonkont onu ominzi nji punun bopugi nde zosaak Ejitu. Zonkont un ominzi nde baapun onu ominzi ze iiñ nde antom o phuuz nde pnzañi. 18 Ze pli pseke, ze ŋnu 14, ze montna, nde pde opoŋ onhani pka iferment, ampjau ze ŋnu 21 ze pli pminzpun ze montna. 19 Ampjau ze ŋnu 7, ozo pka iferment ziku nde; zonkont ña ndei opoŋ onkai iferment, a pfiŋo zuzoñnor usi Israel, ŋanu athoko nya o nmbukno osaak. 20 Nde ika de un onkai iferment; zun nde zoonzi uzuuz, nde pde opoŋ onhani pka iferment.
21 Moises du boyeek ze bopugi Israel uzuuz jak boko: Nde datun, antom nde jek ŋhwk ŋmpalalu ze mi nde omi ze pliin nde, nde pfiŋ ŋolo zonu Paaskwa. 22 Nde jekun utan usi bun ukndwobi isopu nde ñoyun bolo ze pñaak phopi ze ptisel nde kir ze ŋjir 2 ŋnsi irarm na duzu plumun. Nin ñaloŋ ze nde azo pun ze plumun lo ter nfa. 23 Zonkont NYEEK o pzip antom pfiŋ bojitu; zoyaar lo iin pñaak ze ŋnjir 2 ŋnsi irarm na duzu plumun, NYEEK o pzip plumun pminzpun azo phutun nnsok a neej ziku nde antom a fiŋ nde. 24 Nde na bowk nde, nde baapun phuuz pndaapi onzañi. 25 Zoneejr nde zosaak NYEEK jaki aphul nde, nde baapun onah ominzi. 26 Zoyaar bowk nde bi yep nde: Onah ondai onaamzan na yee ze nde? 27 Nde kseemb boko: Oko wojun Paaskwa NYEEK, anzipi duzu iku bowk Israel ze Ejitu, kero ka fiŋ bojitu antom burburun iku ndo. Hunkran bopugi juuzdun zah Uzi.
28 Ka bowk Israel soli, ya do jaunk; ze mi NYEEK jakmunk Moises na Aroŋ, hunkran bododun.
Khuzin Pkez boseke Ejitu
29 Hunkran ze psoof ujuuŋ, NYEEK fiŋ bopoz boseke, uzuuz, zosaak Ejitu, ptep ze nnsek Faro, anzori ze pzoori lo anjau nnseke nnjuuk anhoi ze kalauz, na ŋnseke ŋnsaam uzuuz . 30 Faro nazo na boyeek bogutun lo uzuuz na bojitu uzuuz; ko bi o ihur yeek ze Ejitu, zonkont ozi ka mez daani pka puma. 31 Zurim uminzun, Faro du Moises na Aroŋ jak boko: Nde nazoon, nde pun ze psoof bopugi ni, nde na bowk Israel; Nde solun nde ya do wojun NYEEK, ze mi nde jakmunk. 32 Nde solun uz na ŋmpalalu na ŋiit nde, ze mi nde jakmunk; nde ñauna mnjona NYEEK ze nji uz. 33 Ka bojitu kilo boisraelita pun zosaak osaro sar: zonkont bo jaa: Bo pkez uzuuz .
34 Bopugi jek ifor boko, yanunk pho zwo iferment, na isya inaghi opoŋ intanohi nombulju, yun itiimo, kuŋo yolo zisak boko. 35 Ka bowk Israel do ze mi Moises jakmunk boko, boñaun bojitu ŋun ŋnsi praata, mhuru na yun itiimo. 36 Ka NYEEK zu bopugi lo ka boiin kñago zojir bojitu ze mi bohulmi boko un boñauni. Ka bohul boko ŋun boñauni. Hunkran bosoldun na priz bojitu.
Boisrelita pun ze Ejitu
37 Hunkran Bowk Israel pundun ze Ramses phya Sukote, bo hilun pho baña 600.000 bonsolki na izim, bofin ze boiinz, bozi fin bohaz na bopoz. 38 Bo sol na baña bonsumki bosi ŋnrasa ŋnloŋo, na ŋmpalalu na ŋiit, na ŋnsaam ŋnsumŋi. 39 Bolemp obulu onhani pka iferment ze mi bo punomunk osar osar ze Ejitu; bozi hul baka ontempu bo pun bolemp ŋun ŋnde.
40 Ŋnlur bowk Israel oŋi ze Ejitu o ŋnlur 430. 41 Kero kozip ŋnlur 430 zonu ominzu bopugi NYEEK uzuuz bopun zosaak Ejitu. 42 Zurim uminzwi NYEEK ze yeeŋ antom punun bowk Israel ze Ejitu; urim uminzun o usi NYEEK, bowk Israel ka baap un ominzi ze iiñ boko. 43 NYEEK pot jak Moises na Aroŋ: Uni oun ilul isi Paaskwa: Ka nin nya aloŋ azo pde oyemz osi Paskwa. 44 Nnjuuk uganzi nonsaam nu osi praata, anhatoi pleke, ahilun pdea. 45 Nya na ntihun ukluki bozo pdea. 46 Owk ompalalu opdeno ze mez ze minzmun, ozo puno zuri. Ka ndezo pkita imoon. 47 Hunkran uzoñnor Israel uzuuz oun pdo. 48 Ze nya o ze mez nu jeu pmatir ze Paaskwa NYEEK, boiinz uzuuz ze mez lo khato pleke. Antom ahilun pho na nde a hulo kfah ze Paaskwa, antom a o injaka nmbukno osaak, ña ani phato pleke azo pdea. 49 Oiimna ominzun o pho ze nmbukno osaak injaka nya ze psoof nde. 50 Hunkran bowk Israel uzuuz dodun; injaka mi NYEEK jakmunk Moises na Aroŋ. 51 Onu ominzun NYEEK punun bowk Israel uzuuz ze Ejitu, ze mi bo omi ze iiñ boko.