Phimna bopoz boseke
13
NYEEK jak Moises: 2 Ditnan bopoz boseke boiinz uzuuz bombukoki urun ze zipu boniin boko ze psoof bowk Israel, baña na ŋnsaam bo o bosinin.3 Moises jak bopugi: Nde duka lel onu ondai nde puni zosaak Ejitu, ze pjuuk; zonkont NYEEK puni nde na kñen kndiizki; un ominzi kaun ndezi ka pde opoŋ onkai iferment. 4 Hankri, ze pli Abibe nde kpundun ze Ejitu. 5 Zoyaar NYEEK aneejun nde zosaak bokananeu, boeteu, boamoreu, boeveu na bosebuseu, abisroi boliin nde, ja aphul nde, osaak onkai mntau na pnou, nde dolun onah ominzi ze pli pminzpi. 6 Ŋnu 7 nde pde opoŋ onhani pka iferment. Zonu ojaandu nde pka onah NYEEK. 7 Ŋnu 7 nde pde opoŋ onhani pka iferment. Ka ifor ikntajhi yozo phino zun woonzi, ka iferment, yozo phino ze psoof nde, nin zosaak uzuuz . 8 Zonu ominzun wo pzuup bowku, ujak boko: Njo pdo un ominzi zonkont un NYEEK doli nji, kero nji pun ze Ejitu. 9 Uni oun mnjaaŋzin antom utan ze kñene, osa o mnlelnin ze ikil nu; antom oiimna NYEEK o ze mntum nu; zonkont NYEEK puni wi zosaak Ejitu na kñen kndiizki. 10 Nde ka pbaap oiimn ominzi ze kana nkil ze mi nde kdomi olo kana olura.
11 Zoyaar NYEEK ambi neejnu zosaak bokananeu, hulu olo, ze mi abisromi wi, na boliin nde, zoyaar lo anhul nde olo, 12 wo phul NYEEK bopoz boseke boiinz bombukoki uzuuz. Usa o phul uz, ŋnsaam ŋnseke uzuuz ŋnsi nde kaŋi, ŋiinz opho ŋnsi NYEEK. 13 Ka owk ohuru oseke wo pzimlan na na owk ompalalu; ze wampzimlan nolo wo pkita kzuuz; ka nnseke, ñiinz ze psoof bowku uzuuz wo pzimlan naa. 14 Zoyaar awku anhyepu faan: Oyelin ka? Ukseemb lo: NYEEK punun ndo na kñen kndiizki zosak Ejitu, kero ndo o ze pjuuk. 15 Kero Faro bi pezni taambz ujuuns yeel phutun ndo, ndo pun, NYEEK fiŋ boseke baña uzuuz zosaak Ejitu, ptep ze boseke boiinz anjau ze ŋnseke ŋnsaam; Un ominzi kaun ka nji do wojun NYEEK na ŋnsaam ŋiinz uzuuz ŋmbukoŋi urun; Ka bosek bopoz boiinz bosi bowkin njo pzimlan baka. 16 Opho mnjaaŋzin antom utan ze kñene, na pjuk ze psoof kil nu; plelnu ja NYEEK punun nja zosaak Ejitu na kñen kndiizki.
Uzi zoŋ bopugi ze book
17 Kero Faro hutun bopugi bo sol, Uzi bozi yana baka ze book uñogbi unhyabi zosaak bofilisteu zonkont Uzi jaa: "Ze bopugi ki jik na ogut, ŋnzaafu boko hilun phuglo bokak Ejitu" 18 Hunkran Uzi zudun bopugi antom bofoyo ze book olaal plewo ze krik kjeenkle. Bowk Israel pun ze Ejitu sagnor igutnin. 19 Moises jek imoon Jose, sol na yolo, zonkont Jose hil zu bowk Israel ka bo bisro, jaa: Nji me zowadadi Uzi o bi pten nde zunzi. Nde solun na imoon ni. 20 Hunkran bo pundun ze Sukoti, zoñnor ze Etaŋ, pneej zolaal. 21 NYEEK hil a kya zurun baka, ze pnak, ze knzoŋ knzun, antom pzoŋ boko ze book; zurim akhyana baka ze knzoŋ uroo, antom pfiiz boko, antom boyaanz ze pnak na urim. 22 Knzoŋ ksi knzun kozi ñal baka ze pnak, ka knzoŋ ksi uroo kozi ñal baka zurim.