Bojitu dookun boisrael
14
NYEEK jak Moises: 2 "Zuupun bowk Israel bokak kfez bo zoo zurun Pi-Hairoti, ze psoof Migdol na krik, zurun; zurun zolo nde ka pzoñnor ze kwaŋ krik. 3 Ka Faro opja: Bowk Israel o ze phyaanz oatat zosaak, olaal dis waka. 4 Njo pzu ujuuns Faro utambz, antom adookun boko, Ka njo pzaho ze Faro na bogutun lo uzuuz; Bojitu o pme pja nji njoun NYEEK. Hunkran Boisraelita dodun.5 Kero nliin Ejitu zuupo ja baña Israel ze muulo, alo na boyeek bogutun lo ijuuns boko huglar bopugi, antom ka bo jaa: Oyee nja dolink, antom zu boisraelita ka bo hutun ptihunar nja? 6 Ka Faro bamun okaru lo antom jek bopugi lo; 7 Ka pot sa jek uz nkaru 600 ŋndatoŋi na nkaru uzuuz ŋnsi Ejitu na boyeek bogutun bonhoki duzu ŋolo. 8 Zonkont NYEEK zu ujuuns Faro ka utaambzi, nliin Ejitu, antom adookun bowk Israel bo hilki ze yaanz na kziu ze ya na urun. 9 Ka baña Ejitu dookun boko, ŋnsumpliz na nkaru uzuuz ŋnsi Faro, na bozinzin ŋnsumpliz na bogutun lo, ka bo bup boko kero bo zoñnor ze kwaŋ krik, ze pñog Pi-Hairoti, zurun Baal-Zefoŋ.
10 Kero Faro jawi, bowk Israel deeŋ ikil, iin bojitu kabi ze kfez boko, ka bo liink maakrin; kiikr NYEEK. 11 Ka bo jak Moises: Ohaŋro, ngune ze Ejitu, kaun ka upunun ndo zolo, antom ndo bi kez zolaal ondai? Oyezi kaa, ka udondo jeink, punun ndo ze Ejitu? 12 Ka mbaza un ominzi ol ndo hilun jaku ze Ejitu: Uhutun ndo antom ndo tihunar bojitu? O hil pe pnuro ndo tihunar bojitu te ndo kez zolaal. 13 Ka Moises seemb bopugi: Nde ika liinki; nde tanun kziu, nde pten mi NYEEK oi pburburun nde, un aiplemp nde hankri; zonkont bojitu nde khinink hankri, ndezi poto phin baka. 14 NYEEK o pgutnar nde, nde joun kjou.
Bopugi Israel haño krik kjeenkle
15 NYEEK jak Moises: Oyezi kaa ka uka hudarin? Jakun bowk Israel bo yana urun. 16 Deeŋun plaŋra nu, usolun kñen duzu krik, whai kolo, antom bowk Israel hilun pzip ze psoof kolo zozee onkai. 17 Njo pzu ijuuns bojitu itaambz, antom bo dookun nde, boneej ze krik; Njo pzaho ze Faro na bo gutun lo uzuuz , nkaaru lo na bozinzin ŋnsumpliz lo. 18 Bojitu opme pja, nji, njoun NYEEK, zoyaarin anzaho ze Faro, nkaaru lo na bozinzin ŋnsumpliz lo.
19 Hunkran Oiili Uzi, onhili o zurun bopugi Israel, o pun kak ze kfez boko; knzoŋ ksi knzun uz pun zurun boko, kak ze kfez boko, 20 kneej ze psoof uzoñnor usi bojitu na uzoñnor usi baña Israel; Knzun kminzkun oko urim ze bojitu, ze boisrael kho ko knfasi zurim. Hunkran zurim uminzun baña Ejitu uzuuz bozi hilun pñogro.
21 Hunkran Moises solnun kñene duzu krik, ka NYEEK, zu oyook omagi ompuni ze pmair onu onfuuzi zurim uminzun uzuuz, zu Krik ka kai kisro ŋnjir 2. 22 Bowk Israel yaanz ze psoof krik, zozee onkai. Mnzup huglo injaka omur zojir boko orei na ojir omai. 23 Bojitu ya ze kfez boko, na ŋnsumpliz uzuuz ŋnsi Faro, nkaru lo na boiinz lo bozinzin ŋnsumpliz, anjau ze psoof krik. 24 Kero onu ñog pjiinz, NYEEK anhili o ze knzun uroo na knzoŋ ksi knzun, a ten ze bogutun bosi Ejitu zu boko zoatat. 25 NYEEK zu iroda nkaaru boko ka ilori, ka boka nor ze phyaanz. Bojitu jaa: Nja zi boko, zonkont NYEEK ze gutnar Israel zogut boko na bojitu.
Bojitu meei ze mnzup
26 NYEEK jak Moises: ''Solnan kñen nu duzu krik, antom mnzup kak ze zun molo, mler bojitu nkaaru boko na bozinzin ŋnsumpliz.'' 27 Hunkran Moises solnun kñen duzu krik. Kero onu ka jiinz, mnzup kak ze zun molo. Ka bojitu kazi antom pbur jik na mnzup, ka NYEEK yorun boko ze psoof krik. 28 Hunkran mnzup kakmun ler nkaaru, bozinzin ŋnsumpliz na bogutun uzuuz bosi Faro, bo hili ze dookun boko ze krik; ka nin ñaloŋ ze boko azi buri. 29 Ka bowk Israel yaanz ze psoof krik zozee onkai. Mnzup huglo ze baka injaka ŋmur zojir boko orei na ojir omai.