khiz ksi Moises
15
Ka Moises na bowk Israel yeh khiz kndaaki ksi NYEEK, jaa:Njo pyeh Zonkont NYEEK,
a ka kpe ba zaho duzu ŋun uzuuz ;
Alis ŋnsumpliz ze krik na bozinzin ŋolo.
2 Ka NYEEK o ofoz ni na khiz ni;
Alo abi o nlaau ni. A oun Uzi ni;
hunkran njoun pzah lo. A oun Uzi usi nliin ni; onkanu ka njo pzah lo.
3 NYEEK o ñiinz nnsi ogut;
ktiim lo o NYEEK.
4 Alis nkaaru Faro
na bogutun lo ze krik.
Ka boyeek bogutun lo
yoro ze krik kjeenkle.
5 Mnzup kndiilun ler baka; injaka plaak
boyeto anjau ze kndiilun;
6 NYEEK! Kñen nu krei kliinkun ze philun!
NYEEK! Kñen nu krei falfalun nmbir ña.
7 Ze kyeek ksi philun nu,
wat bobir nu;
uhutun oreu nu ko tur boko injaka otun.
8 Na oyook osi uhil nu mnzup huglo injaka onkuŋ.
Pziir mnzup naz injaka omur.
Kndiilun ksi mnzup huglo injaka ojelu zujuuns usi krik.
9 Nmbir ña baaj jaa:
''Njo pdook baka ankint mbup.
Njo phail priz boko;
Njo pseh ŋun uzuuz ŋnsi boko nji jeuŋi;
Njo psoot keej ni; pfiŋ boko na kñen ni.
10 Ufuuz krik na yook nu; ka ler boko.
Bo mij injaka onsumbu ze mnzup ifaja.
11 NYEEK, ze psoof ŋnzi,
noonzi o injaka wi?
Noonzi o injaka wi amagi ze knjiinzi,
akndoli ŋun ŋnliinkuŋi,
akndoli ŋun ŋhatat ŋi?
12 Usolun kñen nu krei;
ozee yor baka.
13 Wi, na mnjona nu,
uzoŋ bopugi uki bosi ulaauki.
Na ofooz nu wyana baka zun ze iimna ze si woonzi.
14 Baña boloŋ opte,
ŋnleef o pki na baka.
Baña bonhoki ze Filistya, kjoozi o pseh baka ijuuns.
15 Hunkran bohuli bosi Edoŋ oun pduko na kliinki;
bonkaki philun bosi bomoabita,
kliinki seh baka ijuuns.
Baña uzuuz bonhoki ze kanaan bo phaŋ kziu.
16 Kliinki na mnkalo o pjet duzu boko.
Zonkont ofooz nu,
bo pduko phiŋno injaka plaak,
am bopugi bosi uburburunki toom pzip.
17 Wo pneejun baka,
wo pzoorun baka zonkuŋ osi phij nu ze zun ulempzunk antom pho zolo, NYEEK,
zun ze iimna ze si iñen nu nazni, NYEEK.
18 NYEEK o pliho onzañi."
19 Kero ŋnsumpliz Faro,
nkaaru lo,
na boiinz lo bozinzin ŋnsumpliz,
bo neej ze krik,
NYEEK kakun mnzup duzu boko,
ka bowk Israel zip zun zenkaize ze psoof krik."
Khiz ksi Miryan
20 Miryan anhili o nhurun Uzi,
amak Aroŋ jek ontambur ompozi ze kñen lo.
Bohaz uzuuz duko ze kfez lo antom ze kob ŋntambur ŋmpozŋi, ze ki.
21 Miryan ka seemb boko:
Nde yehun NYEEK,
zonkont a ka kpe ba zaho duzu ŋun uzuuz;
Alis ŋnsumpliz ze krik na bozinzin ŋolo.
Mnzup mhay huglo myal
22 Ze krik kjeenkle Moises yana boisraelita zolaal osi Sur.
Boyaanz ŋnu 3 zolaal bozi iin mnzup.
23 Kero ka bo jau ze Mara,
bozi hilun pdaan mnzup minzmun
zonkont mho mnzup mhaimi.
Zonkont un ominzun kaun ka ze dwo Mara.
24 Bopugi Israel kulum Moises,
antom yep lo:
Oye ndoun pdaan?
25 Moises du NYEEK;
NYEEK jaaŋa bun uloŋ.
Ka lis bolo ze mnzup.
Ka mnzup huglo yali,
zolo NYEEK hul baka ŋiimna na ilul antom telman boko,
26 a jak baka:
Ze nde zu kwaz na mnjona antom psiink prim NYEEK,
Uzi nu, kjaki udo un onuroi zurun ikil lo,
uzu kwaz antom psiink ŋiimna lo ute un ajaki wi,
mbazo pzu duzu nu pmak ploŋ psi nji zupi duzu Ejitu,
zonkont njo NYEEK a knjuundi wi.
27 Antom ka bo bi ze Eliŋ,
zun ze nkazi ilik 12 isi mnzup na nkem 70.
Zo ze boyadun ya lemp zun boko ze si uzoñnor pñog ze mnzup.