Uzi hul boisraelita ŋun ŋnde
16
Knzoŋ bowk Israel uzuuz pun ze Eliŋ, ŋnu 15 ze pli pugzan kero ka bo toom pun ze Ejitu duko zolaal osi Siŋ, onhoi ze psoof Eliŋ na Sinai. 2 Zolaal zolo knzoŋ bopugi Boisraelita uzuuz kulum Moises na Aroŋ, 3 bo jaa: O hil o na mnjona ze NYEEK fiŋ ndo ze Ejitu, zun ndo hili akzoon ze kwaŋ ifuutu isi oyemz ndo hil a kde opoŋ ankint khyok. Ka nde punun ndo zolo bi na ndo zolaal ondai antom pfiŋ knzoŋ baña bondaaki uzuuz !4 NYEEK jak Moises: Njo pzu ŋun ŋnde ŋhor duzu, baña o pdoka pun kana onu, antom psinz ŋhoŋi pzink boko pten men bo pte un nji jaki boko ka men bo sa o pdilum. 5 Zonu opaajun bo psinz ŋhyas 2 ze ŋnsi bo jai ka sinz zonu bo pbamun ŋa. 6 Ka Moises na Aroŋ jak bowk Israel uzuuz : Ze mitmit onu nde pme pja NYEEK punun nde zozee Ejitu. 7 Faan nde piin ulujul usi NYEEK, zonkont ate mi nde kulumunk lo. Ka ndo oko noon, antom nde kulum ndo? 8 Moises pot jaa: ''Nde pme zoyar NYEEK anhul nde oyemz antom nde de ze montna, ze nfa a hul nde opoŋ uzuuz osi nde hilni pde, zonkont NYEEK te nde ka kulum lo. Ka ndo oko noon? Nde ze kulum ndo, NYEEK nde kulumun. 9 Ka Moises jak Aroŋ: Zuupun bowk Israel uzuuz zuzoñnor boko: Nde ñogun zurun NYEEK, zonkont NYEEK te kulum nde. 10 Kero ka Aroŋ ka lado na bowk Israel uzuuz zuzoñnor boko, bo huglo ten zolaal, bo iin knfasi ksi NYEEK ka jiil ze inzun.
Uzi hilan ŋnjiku
11 Ka NYEEK jak Moises: 12 ''Nji te kulum bowk Israel; Jakun baka ze mitmit onu, nde pde oyemz, ze nfa, nde phyok opoŋ. Nde pme pja nji njoun NYEEK, Uzi nde.'' 13 Ze mitmit onu, ŋnjiku yeto, antom ler zun uzoñnor, ze nfa opool iinoo ze kwaŋ zun uzoñnor. 14 Kero opool meei zozee olaal, o hil o za un oloŋ onjiili ofasla nam na ipeptar, onjiili injaka ojelu. 15 Kero bowk Israel iin olo dodo uyepro: Oyei? ''Zonkont bozi hil o me un onhoi. Moises jak boko: Uni oko kre ksi NYEEK huli nde antom nde de. 16 Uni oko un NYEEK jaki nde antom nde do: Nde sinzan ze mi kana ña hilni pde, ze mi nde omi ze mez nde; kana ña ksinz ze ŋnumru a kaŋi zokulo. 17 Hunkran bowk Israel lempdun; boloŋ sinz maakrin, ka boloŋ sinz mpozmi. 18 Zo jaur boko olo na kjawi ksi ŋlitru 2, oza kduklo ze ña nsinzi maakrin, ka moze sa akzaankl ña sinzi mpozmi, zonkont ba ksinz ze mi ña hilni pde. 19 Moises jak boko ika ña duklan mnloŋ mya faan. 20 Ka boloŋ bozi zu kwaz zolado Moises; bo duklan mana anjau zonu oloŋ mbi ka nkus ñel un onjozi. Hunkran Moises deuzarun boko. 21 Ze nfa ña ksinz mnsi ahilni pde. Zoyar onu anzeiik mana mnduklomi uzuuz akhyalo.
Bopugi Israel sinz mana
22 Zonu opaajun bosinz ampempen osi bo joni ze sinz, oi ŋnlitru 4 kana ña. Boyeek bosi knzoŋ uzuuz ya zuup Moises un bo doli. 23 Ka Moises seemb boko: Uni o un NYEEK jaki: Faan o onu osi phyoŋ, onhiimnani ze NYEEK; un nde jewi psou zonfurnu nde sou na, Osi nde jewi pjuŋ nde juŋna. Ondukloi, nde baanun na nde bi de faan. 24 Hunkran bo baanun olo anjau ze nfa, injaka ze mi Moises jakmi; ka ozi ñel un onjozi ka ozi ka nkus. 25 Ka Moises jak boko: Nde deen ma hankri, zonkont hankri o onu ksaaudu ksi NYEEK. Ndezo piima hankri zozee. 26 ŋnu 6 nde ŋun psinz molo, konu ojaandun o ksaaudu; mozo pho zonu ominzun. 27 Konu ojaandun boloŋ ya psinz ma ka bozi iima. 28 Ka NYEEK jak Moises: ''Ampjau zonu on ndeu phyeel pte ŋiimna ni? 29 Nde tenun, nde ika zimlo ja NYEEK hul nde onu oloŋ osi ksaaudu. Hunkran zonu opaajun a phul nde opoŋ osi ndei pde ŋnu 2; kana ña kduko zun a onze, ñazi ka pun zun a onze zonu ojaandun.'' 30 Hunkran bopugi yoŋdun zonu ojaandun.
31 Bopugi Israel du kre kminzkun Mana; mi hil oko injaka osep ontik, ofasla. Kliili molo oko injaka obulu osi pnou. 32 Moises jaa: Uni oko prim psi NYEEK jakpi nde, nde do: Jekun ŋlitru 2 ŋnsi Mana, ubaan ŋolo antom iiñ nde hilun piin ode nde dei zolaal kero nji punun nde ze Ejitu. 33 Hunkran Moises jakdun Aroŋ uz: Jekun fuutu usumun ŋkilu 2 ŋnsi mana antom uzu molo zurun NYEEK, antom ubaap molo zonkont iiñ nde zurun. 34 Aroŋ do ze mi NYEEK hilmunk Moises, sumun mana minzmun zurun ukau usi phuuz antom baap molo. 35 Bowk Israel de mana ŋlur 40, anjau zosaak osi boi phona; bo de mana ankint jau ze klil ksi kanaan. 36 ŋlitru 2 ŋnsi ojaawi ondisiñene zojir osi efa oi ŋlitru 20.