Mnzup pun zonkuŋ
17
Ka bopugi Israel pun uzuuz zolaal osi siŋ, bo yaanz ze ŋnjir ŋnsumŋi ze mi NYEEK hili ze zoŋ boko. Bo ya zoñnor ze Refidiŋ, zun mnzup ani pho antom bopugi hilun pdaan. 2 Hunkran bo unsodun na Moises, jak lo: ''Hulan ndo mnzup antom ndo daan.'' Moises seemb boko: O ezi kaa, ka nde ka unso na nji? Ezi kaa, ka nde ka telman NYEEK? 3 Ze mi bopugi kamunk olof, bo kulum Moises, jaa: ezi kaa, ka upunun ndo ze Ejitu bi fiŋ ndo no lof, ndo na bowk ndo na ŋnsaam ndo?'' 4 Ka Moises du NYEEK antom yep lo: ''Oye njoun pdo bopugi bondaaki? Bo bamni antom ptapin na ilaak.'' 5 NYEEK jak Moises: '' Zipun zurun bopugi, Jekun boyeek boloŋ bosi bowk Israel, ujek plaŋra psi uhilunk kobn mnzup mnsi krik antom usol. 6 Njo pho zurun nu zonkuŋ Horeb; wo pkob onkuŋ, mnzup o pun za, antom bopugi daan. Hunkran Moises dodun zurun boyeek Israel. 7 Ka du zun ze minzun ktiim Masa na Meriba, zonkont khunso bowk Israel ze mi bo telmani NYEEK, antom jaa: NYEEK o ze psoof nja o azi oo?Bomalekita gut na boisraelita
8 Ka Bomalekita bi gut na boisraelita ze Refidiŋ. 9 Ka Moises jak Joswe: Datun boiinz boloŋ ze nja wya gut na bomalekita; faan nji urini, njo pho duzu knduunslu onkuŋ, plaŋra Uzi o pho ze kñen ni. 10 Ka Joswe do ze mi Moises jakmunk lo gut na bomalekita; Moises, Aroŋ na Ur, bo payo duzu onkuŋ. 11 Zoyar Moises andeeŋ iñene, boisraelita aka kpe, anka yool kñene bomalekita hil a ka kpe. 12 Iñen Moises hil diizi; un ominzun kaun, kabo jek plaak antom luz yolo zeu, ka zoo duzu polo; Aroŋ na Hur deŋ lo iñene, aloŋ zojir oloŋ, andaun zoloŋ; hunkran iñen lo deeŋodun duzu anka o nu kint yowi. 13 Hunkran Joswe fiŋdun bogutun bomalekita na bopugi boko uzuuz na keje.