36
Hunkran Bezaleel na Aoliabi, na boiinz uzuuz bonlipki bosi NYEEK huli ulipl antom bohilun plemp utihun usi zun ze iimna, bo ka plemp utihun uzuuz ze mi NYEEK jakmi boko.Un onhaaloi osi bopugi
2 Moises du Bezaleel na Aoliabi, na boiinz uzuuz bonlipki bosi Uzi hul ki ulipl, bo hutnori ze ijuuns boko bi plemp utihun uminzun. 3 Bo pseh ze kñen Moises un onhaaloi osi bowk Israel bini zun ze iimna. Bopugi ka pbina un onhaaloi kana ŋnu ze nfa ze mi bojeumi. 4 Hunkran boiinz uzuuz bonlipki kana ña akhutun utihun lo, bo bi uzuuz ŋou na utihun zun ze iimna. 5 ka bo jak Moises: Baña bina ŋun ŋhaaloŋi ŋnsumŋi ampe utihun NYEEK jaki udolo. 6 Hunkran Moises hilandun phul nkuni zun uzoñnor, nin ñiinz o ñaaz azi poto phul un onhaloi plemp zun ze iimna. 7 Zonkont oka ŋun utihun bo kaŋi ŋnsumi ampe utihun bo hili ka plemp an ŋmpot ŋnduklo.
Inoŋnt oku
8 Boiinz uzuuz bonlipki ze psoof bokndokunk utihun plemp oku na inoŋnt 10 isi mmuz miknjilmi mnlahomi, na mmuz nfulamul, purpura na karmesin, na nkirubiŋ ŋmarkarŋi zojir ŋolo ze ñiinz anhili plemp utihun uminzun. 9 Kana knoŋt zokañr kolo ka ŋmetru 12.3, ohanr ka ometru 1,75 inoŋnt uzuuz iliŋ zojaaur.
10 Boduŋlan inoŋnt 5 ze isiinz yolo; ka inoŋnt 5 indaayun sa pot duŋlan na isiinz yolo. 11 Bo lemp isulnin ifulamul ze ptoomi inoŋnt 5 indaayun induŋlayunk, sa pot do ze mizmun ze ptoomi inoŋnt impotunk sa duuŋlani. 12 Bolemp isulnin 50 ze knoŋt kloŋ, na isulnin 50 ze ptoomi knoŋt kloŋ inliŋhi. 13 Bo lemp ihuuz 50 isi mhuru, bo zuya antom pkoulan inoŋnt ze isiinz yolo; Hunkran obilun o zoku oloŋ.
14 Bo sa lemp uz inoŋnt 11 isi ifal opi injaka kleri oku. 15 Bo lemp ya uzuuz ze ijaawi inliŋhi: Ŋmetru 13,2 ŋnsi okañr na ometru 1,75 ohanr. 16 Bo koulan inoŋnt 5 mpaz, sa koulan inoŋnt 6 indaayun uz. 17 Bo lemp isulnin 50 ze ptoomi knoŋt kñenzan inkoulayunk; bo sa lemp uz isulnin 50 ze ptoomi knoŋt ze inoŋnt 6 inkoulayunk. 18 Bo lemp uz ihuuz 50 isi kobre antom pkoulan ileri yo ze kloŋ. 19 Bo lemp uz kleri na injand ŋmpalalu ŋinz, inowohi ijenkle. Duzu yolo bozu kleri injand ŋgoñar ŋnsi mnzup.
Kleri ksi injand na Itaagwa
20 Bolemp isap oku, isi mndera akasya. 21 Kana psap hil ka ŋmetru 4,4 okañr na ŋnsentimetru 70 ŋnsi ohanr. 22 Kana psap hil ka yun 2 zojir onkoulani polo na psinz polo. Hunkran bolempdun zisap oku uzuuz . 23 Bolemp itaagwa 20 zojir zeu oku. 24 Bolemp iluzi 40 uz isi prat zu zeu isap 20: iluzi 2 zeu psap ploŋ phya ze iluzi 2 zeu psap ze iluzi polo 2. 25 Bo sa lemp uz isap 20 zojir zeu oku. 26 Na iluzi 40 isi prat: iluzi 2 zeu kana psap; 27 zojir oku ze phyour onu bolemp isap 6. 28 Bolemp isap uz ze ŋnjir 2 isi oku. 29 Isap 2 iminzyun zekjok ilempoo naami. Ptep zeu ampjau duzu ikoulor ze knsawaŋ kloŋ. 30 Hunkran hilun ka isap 8 na iluzi 16 isi prat, yolo 2 kana psap.
31 Bo sa lemp uz ilaankun isi mndera akasya, kana psap ka klaankun 5 zojir oku, 32 isap 5 isi ojir oloŋ osi oku, na isap 5 isi kfez oku zojir phyour. 33 Bolemp ilaankun isi psoof antom izip ze psoof isap zojir ptoomi oku na osinz olo. 34 Bo ler isap na mhuru, lemp insawaŋ isi mhuru isi ilaankun oi pzipna. Bo sa ler ilaankun uz na mhuru.
Inoŋnt na Isap
35 Bo lempun uz inoŋnt isi mmuz nfulamul, purpura na karmesin na mmuz miknjilmi laho, markar na nkerubin isi ñiinz ankai ulipl pdol utihun uminzun. 36 Bo lemp isap isi inoŋnt isi isap 4 isi mndera mnsi akasya, inlerohi na mhuru, na ihuuz isi mhuru na iluzi 4 isi prat. 37 Ze plumun psi oku bo lemp inoŋnt iloŋ isi mmuz nfulamul, purpura, karmesin, na mmuz miknjilmi laho markaro ze ña anhili utihun uminzun, 38 na isap 5, na ihuuz yolo; ze yeen yolo na mnjaŋzin yolo bolerma ya mhuru, ka iluzi 5 hil oko isi bronsi.