Inoŋnt oku
26
NYEEK jak Moises: lempun oku osi ibuur oi pka inoŋnt 10 isi mmuz miknjilmi mnlahomi na mmuz mntap nfulamul, mbau na miknjilmi, purpura, karmesin; ŋnlempo uzuuz na nkerubin ŋñigoŋi zolo, ze ñiinz anhili olemp ominzun. 2 Inoŋnt uzuuz opka kjawi kloŋ, kana knoŋt ka pka ŋmetru 12 ŋnsi ohalr na ometru 1,75 osi ohandr. 3 Inoŋnt 5 yo pkoulan na isiinz yolo inoŋnt 5 indaayun uz ika pkoulan na iloŋo uzuuz . 4 Lempun zun zipi ze fulamul ze ptoomi inoŋnt 5 inkoulayunk ze minzmun hunkran usaun o plemp ze ptoomi inoŋnt 5 indaayun inkoulayunk. 5 Wo plemp zun ze sulnin 50 ze knoŋt kloŋ, usa pot ulemp iloŋ 50 ijaan na isiinz yolo. 6 Lempun ihami 50 isi mhuru ubuplan inoŋnt ze isiinz yolo antom oku hilun pho oloŋ.7 Lempun uz inoŋnt 11 isi injand opi antom pler inoŋnt indaayun isi oku. 8 Inoŋnt 11 iminzyun yo pka kjawi kloŋ, pka ŋmetru 13,20 ŋnsi okañr na ometru 1,75 ohandr. 9 Koulan na inoŋnt 5 ze isiinz yolo; zoñna uz inoŋnt 6 ze isiinz yolo. Kpaajun kun wo pŋuj ka zurun oku. 10 Lempun zun ze sulnin 50 ze ptoomi psi inoŋnt 5 ze ptoomi inoŋnt 5 inkoulahi, na 50 ze ptoopmi inoŋnt 6 inkoulahi. 11 Lempun uz ihami 50 isi bronsi ubuplan yolo ze zun zipi antom pkoulan kleri khilun pho ze kloŋ. 12 Psoof knduklokunk ko phakno zojir kfez oku. 13 Ometru onduklounk ze ŋnlik 2, psoof opjet zojir oloŋ, psoof pdapun kjet zojir oloŋ, antom pler olo.
Kleri injand na itaagwa
14 Lempun knsond uz ksi injand isi ŋmpalalu nkal knowoki na mbau mnjekle, na knsond kloŋ ksi oku na knsond kloŋ ksi injand infulhi.
15 Lempun isap uz isi mndera mnsi akasya mnsi oku, yoi pjipo pnazno. 16 Kana psap o pka ŋmeru 4,4 okañr na ŋnsentimetru 66 ohandr. 17 Kana psap psi oku o pka ksap 2 ze ŋnjira yoi ptandlan yolo na isiinz yolo. 18 lempun isap 20 zojir onhoi zojir zeu oku. 19 Lempun isap 40 uz isi prat pzu zeu iluzi 20; iluzi 2 opzwo zeu psap ploŋ na iluzi 2 ze ŋnjir 2. 20 Zojir duzu oku wo plemp uz isap 20, 21 na iluzi olo 40 isi prat; iluzi 2 zeu ktaagwa kloŋ 2 ze kloŋ uz. 22 Lempun uz ze kfez itaagwa 6 zojir phyour onu, 23 lempun uz itaagwa 2 ze ijok ifez; 24 zeu yolo, yo ptaaslor, duzu yo pliŋnor na knsawaŋ kseke; hunkran woun plemp itaagwa 2; yo phonan 2 kana kjok. 25 Hunkran youn pka itaagwa 8 na iluzi yolo isi prat, iluzi 16: iluzi 2 ze ktaagwa kloŋ, 2 zeu ktaagwa kloŋ uz.
26 Lempun ilaankun isi mndera mnsi akasya; itaagwa 5 zojir oloŋ osi oku, 27 na itaagwa 5 zojir oloŋ osi oku na itaagwa 5 zojir ofez ondeki ze phyour onu. 28 Plaankun psoof po pzip ze psoof itaagwa zojir oloŋ ampjau zoloŋ. 29 Wo pler itaagwa na mhuru, zoloŋ uz wo plemp insawaŋ isi mhuru zun ilaankun oi pzipnan; usa ler ilaankun uz na mhuru. 30 Naznan oku ze mi ujaaŋomunk mnamzin olo zonkuŋ.
Inoŋnt Zun ze iimna
31 Lempun uz knoŋt ksi mmuz mntap nfulamul, na iloŋ ikndwoi purpura, karmesin na mmuz miknjilmi mlahomi; na nkirubin, wo plemp ya ze ña ankai ulipl uminzun. 32 Haknan ya duzu ihaknin 4 isi mndera mnsi akasya, inlerohi na mhuru; ihaknin yolo o pho isi mhuru duzu iluzi 4 isi prat. 33 Haknan knoŋt zeu ihami antom ubina ukau isi Phuuz, ze mezu knoŋt; knoŋt ko ploran nde na Zun ze Njinzi na zun ze mpezi Pjinz.
34 Wo pzu kleri ksi pjour pjwa duzu ukau usi Phuz Zun ze mpezi Pjinz. 35 Wo pzu omes na okandel zojirun knoŋt, zurun omes, wo pzwa zojir zeu oku; wo pzu omes zojir duzu oku.