Fìdípùpa i

Pɔ̀kàta Pɔ́dì wà̰haà-ta Fìdípùpa

Cetá Kam̀má

Pɔ́dì-dà wà̰haà pɔ̀kàtà mɛntà-ní Fìdípù yɔtí weèdɔɔ̀pa, è péé kódeedí mɛhɛká Hɔ̀dɔ́m̀ yɔtí. Mɛnń-dà de cetà ye weèdɔɔ̀-hòǹhònì-ní. O Weèdi wɛmá cakàma cà̰ǹku dɛ́ɛkú mɛhɛká-dà ò de nì cetà-ma (dentá Tɔná 16.11-40). Ye pɔ̀kàtà bɛkú, mɛnń nà mɛmpá pa múnáma de yòm̀pu-dà.

Ò de pà wà̰haà ye pɔ̀kàtà-ní, è kpɛ̀i pá yá̰dá è yɔ̀ Weèdi don nìpa, nà dandaní pà káá-di kpɛ́mú-dà Kídísì hḭ́ǹka, nì pú pà don nà pa bokupa̰á̰ma kpɛ́ɛsá kpɛ́mú. Ye kú kpɛ́mú, pà pú yònà é besí biɔhàkpákpààma Sùwífùpa de biɔhànì-ma. Ò de kpɛ̀i pá pɛ́ɛ́ óò màa-nà-á-ma, é yeda Kídísì wɛnaamá kpɛ́mú. Ò tṵ́mà de kpɛ̀i é pà tɔná, n'ɔ̀ɔ de péé-ma-dà kódeedí mɛhɛká, kà pá pa̰á̰ tɔ́hɔ́kàdi, óò tempanà. Tɔɔ̀sa mìì de tee-sá k'ó pà wà̰hà, mií-dà héé: ó pà caka y'òò yòm̀pu ka bɛ́ka, pá n'tṵḿ tenten kídísì hḭ́ǹka fá̰kápàma wɛǹni mɛhɛká, pá n'yakù pa cɔ̰́ɔ̰̀di é m'múń nùdi nìcɔ̰́, pá codá sukú o dehàtɔ̀pa, nà tɔɔ̀sa tɔɔ̀sa.

Ǹtɛ ye pɔ̀kàta wɛmá tṵǹ-tṵ̀ǹkaàma ma tɔɔ̀ma:

Fìdípùpa 1.1-11: Dɔɔ̀mu nà weèdɔɔ̀pu.

Fìdípùpa 1-12-30 : Pɔ́dì dìkaàma kú bookú fòùku kpɛ́ɛsá.

Fìdípùpa 2.1-18 : Tí yakàdà ti cɔ̰́ɔ̰̀di é yònà Kídísì.

Fìdípùpa 2.19-30 : Pɔ́dì dehàtɔ̀pa mɔ́mpá.

Fìdípù 3.1-4.9 : Tí n'fòù é n'yònà Pɔ́dì.

Fìdípù 4.10-20 Pɔ́dì sɛɛ́ Fìdípù weèdɔɔ̀pa nà pa pa̰ká kpɛ́mú.

Fìdípù 4.21-23 Dɔɔ̀mu dèǹdèmu.