Èfɛ́sìpa 6

Bííhí nà hi báàpa.

¹ Bííhí-nà, ní n'you-nà nɛ báàpa toòka Teó kpɛ̀kaàma, è yá̰á̰ mií-dà coó. ² Kpɛ̰́ńtìnùdi nìcɔ̰́ cakú è tonà: Ní n'cuunì a báàa n'àa màa. Mɛní-dà yòǹ cecedí Weèdi kɔ̰́ɔ̰̀-di é hḭ́ná-nà nùdi. ³ Ye nùdi-dà héé: A kó m'péé naakú mɛhɛká-dà, k'àa wɔ̰ǹni ní n'dɛu teǹka hḭ́ǹka. ⁴ Nɛ́na tá báàpa-nà, nɛ dá m'mɔkanì nɛ bííhí fɔ̰́ɔ̰̀ka, àmá nɛ́ hì n'wohú é hì n'cakú hì pa̰kú-sa k'yè pú sudi, é hì n'kɔ̰́nì tencí mɛ̀ǹcì péé-nà-ci-ní Teó pesá.

Núm̀ma nà pa dakpɛ̰́m̀ma.

⁵ Núm̀ma-nà, ní n'you-nà toòka nɛ dakpɛ̰́m̀ma tenkà mɛnkà kú hḭ́ǹka, é pà n'cùùnì, é pà n'wani, nà nɛ yàma wɛǹni, é n'yònà n'ɛɛ̀ pa̰kú-ma Kídísì. ⁶ Nɛ dá m'pa̰kú nɛ tɔná p'èè péé tḭ́ń wɔ̀ni è kpɛ̀i é nakàna pa yàma, àmá nɛ́ m'pa̰kú niìi wɛǹni é n'yònà Kídísì dehèpa mɛ̀m̀pà pa̰kú-pa Weèdi kpɛ̀i-sá nà yàma màcɔ̰́. ⁷ Nɛ́ n'dehú nɛ dakpɛ̰́m̀ma kpɛ́mú nà nɛ cɔ̰́ɔ̰̀di kú kpɛ̀imá, é n'yònà nɛ dehú-ma Teó kpɛ́mú, k'yè pú n'yònà nìpa kpɛ́mú. ⁸ Nɛ yá̰á̰-ma è yɔ̀ bá ti mɛ̀ǹǹ dɛ̀ɛ̀-ko, núǹn yoo mɛ̀ǹǹ tee-kó o cɔ̰́ɔ̰̀di, Teó kó wáńtá óò bodá-ma o pa̰à̰-sa k'yè sudi ye boutí. ⁹ Nɛ́na mɛ̀ɛkà tá dakpɛ̰́m̀ma-nà, nɛ́ m'pa̰kú ma kú bookú nɛ núm̀ma hḭ́ǹka. Nɛ́ cɛ̰ɛ̰́ nɛ cɔ̰́ɔ̰̀di nɛ dá pà n'fɛ̰́ɛ̰́kú. Nɛ́ n'yá̰á̰ è yɔ̀ nɛ́na nà mɛmpá, nɛ yòǹ Dakpɛ̰́ǹn òcɔ̰́-dà hḭ́ǹka mɛhɛká, mɛnn mɛ̀ɛ pú bahù nìpa.

Weèdɔɔ̀o ta̰nɛǹti.

¹⁰ N kó dehà n wɛmá è yɔ̀, nɛ́ n'tóńkú nɛ kpeèti Teó kpesàti mɛhɛká. ¹¹ Nɛ́ tódá Weèdi ta̰nɛǹti wɛǹni é bádí, k'yé teha kà nɛ́ yee-nà nɛ cɔ̰́ɔ̰̀di Wɛɛ̀kupá wódo seúma wɛǹni mɛhɛká, ¹² è yá̰á̰ nà mɛ̀m̀pà ti mɔù-pa, pà pú yòǹ niìtɔ̀pa. Àmá, ti mɔù-nà seèkpákpààka-dà mɛ̀ǹkà káá-ka kpeèti è káá nɔɔ̀ti, è mɔ̀ù-nà seèkpákpààka mɛ̀ǹkà tee-ká kà nìpa péé binìku mɛhɛká teǹka hḭ́ǹka, è mɔ̀ù-nà seèkpákpààka mɛ̀ǹkà péé-ka sèka fòùku mɛhɛká. ¹³ Ye kú kpɛ́mú-dà tee, nɛ yònà é tódá-ma Weèdi ta̰nɛǹti wɛǹni, k'yé teha dasḭ̀ḭ̀ni daadí, kà nɛ́ yee-nà nɛ cɔ̰́ɔ̰̀di, é màa háá é deèta, k'yèècḭ́ḭ̀ pú nɛ n'nampáà. ¹⁴ Ye kú kpɛ́mú, nɛ sɔ̀do é m'bii. Nɛ́ hɛɛ̀da wɛbeèdi é cɛ̰́ṵ́wá̰ nɛ kɔɔ̀ka kà nì ní n'yòǹ nɛ nawɔ̰̀ǹcɛ̰́ṵ́fa. Nɛ́ bádí coóma, kà má n'yòǹ nɛ nɛmpiìkatí^a. ¹⁵ Nɛ wɔ̰̀ǹti é n'wáhi Weèdi wɛmá cakàma hḭ́ǹka, mií-dà héé nɛ nɛ̀ùti nɛ kó tódá-ti é fḭ́ḭ́. ¹⁶ Nɛ́ tódá dandaní é n'toó wɔ̀ka wɛǹni, kà nì ní n'yòǹ nɛ dɔɔ̀poópìkèdi. Nà mɛni, Seúma yaǹn peǹci pú kó nɛ tɔ̀di, bá kà cì dɔ́sí kà cí n'cɔ́hú ha̰mú, nì kó mù kɔ̀ù-ú-ma. ¹⁷ Nɛ́ hɛɛ̀da fḭ́hìnamá kà má n'yòǹ nɛ wáḿpɔ̰̀ni, é hɛɛ̀da Weèdi wɛmá Weèdi Sèdi kɔ̰́ɔ̰̀-ma kà má n'yòǹ nɛ sepɛ̰ɛ̰̀dí.

¹⁸ Nɛ́ m'pa̰kú weèdɔɔ̀pu wɔ̀ka wɛǹni. Nɛ́ nì n'sɛ́úkú é nì n'cɔɔ̀hu niìi wɛǹni hḭ́ǹka kà Weèdi Sèdi nɛ túdí. Nɛ́ n'césí é n'wɛ̰́dì ye hḭ́ǹka. Nɛ́ n'dɔń Weèdi weèdɔɔ̀pa wɛǹni kpɛ́mú. ¹⁹ Nɛ́ n'dɔń Weèdi mɛ̀ɛtékà n kpɛ́mú, k'yé teha kà n hàdà tḭ́ń wɔ̀ni n nùdi è kó caka mìì sɔ̀ɔ-sá ni wɛnaamá mɛhɛká, kà ní n pa̰a̰ wɛnɔ̀ka yè békú-ka, ká n yè caka è pú n'wani. ²⁰ Ye kú wɛnaamá-dà n centì è cakú-ma, ma kú kpɛ́mú-dà mɛ̀ɛ tee kà n péé dákáti mɛhɛká. Pa̰á̰-nà weèdɔɔ̀pu ye kú kpɛ́mú, k'yé teha ká n mà caka n yònà é mà caka-má è pú n'wani.

Cɔɔ̀mu.

²¹ N kpɛ̀i nɛ mɛ̀ɛ té n'yá̰á̰ yè n yòm̀pu-dà miì, nà n pa̰kú-sa. Tìsíkì kó tɛ̀i-ho éè nɛ caka ye wɛǹni. Ò yòǹ n kúcàa-dà Weèdi cɔ̀ku mɛhɛká n dɔ́sí-ko sukú, k'ò dehú Teó kpɛ́mú nà cɔ́díma. ²² N ò tɔn-hɔ̰ nɛ pesá nɛ̀ɛ kú kpɛ́mú è kpɛ̀i ó tɛ̀i nɛ caka yè ti yòm̀pu-dà miì, é tṵ́má yahikàna nɛ wɔ̰̀ǹti. ²³ Ti Báàa Weèdi, nà ti Teó Sèsí-Kídísì é pa̰a̰ ti kúcàpa nà ti potɔ̰ɔ̰̀pa, wɛ̀ɛ̀di, nà dɔ́kàma nà dandaní. ²⁴ Weèdi pa̰á̰suumá é m'péé-nà mɛ̀m̀pà kú wɛnnì dɔ́sí-pa ti Teó Sèsí-Kídísì k'yèe dɔ́kàma pú yɔɔ̀hu.