Kàdátìpa i

Pɔ̀kàta Pɔ́dì wà̰haà-ta Kàdátìpa

Cetá Kam̀má

Pɔ́dì-dà wa̰à̰haà ye pɔ̀kàta é tà kɔ̰́ɔ̰́-hɔ̰ Kàdàsíì teǹka weèdɔɔ̀-nàmɔ̀ka, è yɔ̀ pá tà kàn páàti wɛǹni. Ka mɛhɛká, weèdɔɔ̀pa sàpa de pú yòǹ Sùwífùpa, àmá kà tɔɔ̀pa yòǹ. Pɔ́dì de cetà ye weèdɔɔ̀-nàmɔ̀kà, o de centì tḭ́ń wɔ̀ni-dà è cakú Kídísì wɛnaamá páàti wɛǹni. Ò de kà cetà é ka̰há, kà niìkpákpààpa-dà é tɛ̀ni, è yòǹ Sùwífùpa bookú, è cakú è yɔ̀ Pɔ́dì pú yòǹ Kídísì tɔntɔndikó mɔ́nń. Ò cakú-mà wɛmà pú pɛ́ɛ́-nà sukú Kídísì tɔntɔndipá kpɛ́ɛmá, pà múńtà p'óò yá̰á̰. Pà de tṵ́mà cakú è yɔ̀ weèdɔɔ̀o mɔ́nń yònà ó héé kà p'óò ca̰ntá-ma, ò yònà é n'tṵ̀n sukú Mɔ̀yísì kpɛ̰́ńtìnùka-dà, é n'yá̰á̰-nà Sùwífùpa kúuya̰nkàka kpɛ́mú.

Wɛkú tɔkú mɛ̀ǹkù de cɛ̰́ńkù-ku Kàdàsíì weèdɔɔ̀pa pemá-dà héé, pa pàcɔ̰́ de pú yeèkaà sukú wɛnɔ̀di mɛ̀nì toò-di, « kà Kídísì àà fḭ́hínà a kó n'tee a cɔ̰́ɔ̰̀di-dà sukú», ye wɔ̀ni è fòù pà yàma kpɛ̀kaàma. Pɔ́dì pà wà̰hu ye pɔ̀kàtà mɛntà è kpɛ̀i é dɔ̀hà-sa wɛǹni-dà.

Ǹtɛ ye pɔ̀kàtà wɛmá tṵǹ-tṵ̀ǹkaàma ma tɔɔ̀ma:

Kàd 1.1-5 : Dɔɔ̀mu.

Kàd 1.6-24 : Weèdi-dà kɔ̰́ɔ̰̀ Pɔ́dì wɛnaamá ò cakú-ma, nìdo dɔ.

Kàd 2.1-10 : Weèdɔɔ̀-nàmɔ̀ni kpɛ̰́m̀ma teháà è yɔ̀ wɛnaamá Pɔ́dì cakú-ma yòǹ bemú-dà.

Kàd 2.11-21 : Pɔ́dì yedáà o wɛnaamá kpɛ́mú Píyɛ́ɛ̀ yìhìka À̰ǹtíyɔ́sì yɔtí mɛhɛká.

Kàd 3.1-14 : Nìi dandaní kpɛ́mú-dà kó n'tee kà Weèdi óò dìda niìcoóko ni yìhìka, yè pú yòǹ kpɛ̰́ńtìnùka.

Kàd 3.15-4.11 : Kpɛ̰́ńtìnùka nà dandaní, mìì ka̰hà-sa ye tɔɔ̀sa.

Kàd 4:12-20 : Pɔ́dì cɔ̀hu Kàdátìpa è yɔ̀ pá n'fòù dandaní mɛhɛká.

Kàd 4.21-31 : Múnákpɛ̰́m̀ma bííhí nà múnápààma kpɛ́hí.

Kàd 5.1-12 : Sùwífùpa bookú kákamú pa̰á̰ma pú héé.

Kàd 5.13-25 : Cɔ̰́ɔ̰̀di teemá mɔ́mmá-dà héé, á héé kà Weèdi Sèdi é n'àà n'túdí.

Kàd 5.26-6.10 : Ti yònà é n'fòù-ma kú bookú ti cɔ̰́ɔ̰̀di teemá weèdɔɔ̀pa tɔɔ̀pa cɔhɔ̀ka.

Kàd 6.11-18 : Wɛmá kɔ̀ùdi.