Kɔ̀dɛ́ńtìpa Pɔkàdɛ́ɛ̀ta 13

Tencí dèǹdèǹci nà cɔɔ̀ma.

¹ Ta̰á̰ma-dà mɛmà n kɔ́ɔ́-ma nɛ hɔ̰́ɔ̰́hí. K'yé n'yònà pà wà̰tà-ma Weèdi pɔ̀kàta mɛhɛká è yɔ̀: Wɛmá wɛǹni nɛ kó sída-má, nɛ yònà è té besí pṵ́tápa pàdɛ́ɛ́ yoo pàta̰a̰-dà é nɛɛ́ mà dɔ̀hà. ² N de yɔ̀ɔ cakàpu-dà n tɛ̀mmá dɛ́ɛ̀ma, mɛ̀m̀pà de pa̰à̰-pa sḭ̀ḭ̀ma nà tɔɔ̀pa wɛǹni, k'yèe kú niì sɔ̰ncí n kó hḭmpú. N pú nɛ péé-nà yenì, àmá n há̰ tṵ́mà cakú-ma ye kú yammà è mun pú tɛ̀i-ho, è yɔ̀: N kó tón tḭ́ń daadí nɛ hɔ̰́ɔ̰́hí, n pú kó tɛ̀i é baàta p'oòcɔ̰́ǹ. ³ N toò nɛ kpɛ̀i é dɛ́há mìì bɛkú-sa-dà è yɔ̀ n wɛì nà Kídísì yèdi-dè? Nɛ k'éè dɛ́há! Kídísì pú sɔ̰̀ǹ nɛ kpɛ́mú, ò múńtà bɛkú o kpeèti-dà nɛ cɔhɔ̀ka. ⁴ Bemú-dà, p'òò kpɛ̰́ḭ́-ma kpíidɔkú hḭ́ǹka n'ɔ̀ɔ sɔ̰̀ǹdìdi kpɛ́mú, àmá ò fòù nà Weèdi kpeèti kpɛ́mú-dà. Tḭ́ńti mɛ̀ɛtékà, ti sɔ̰̀ǹ nà ti múń-nà-ma Kídísì kpɛ́mú-dà. Àmá kà ti tɛ̀i-ho nɛ pesá, ti kó nɛ bɛka-á-ma è yɔ̀ ti fòù nà mɛnń, nà Weèdi kpeèti ti kó deha-nà-ti.

⁵ Nɛ́ cɔ́dí sukú nɛ mɔ́mpá, é béka nɛ cɔ̰́ɔ̰̀di é dɛ́há kà nɛ péé dandaní cɔ̀ku. Nɛ mɛ̀ɛ yá̰á̰-dà-ma sukú è yɔ̀ Sèsí-Kídísì péé nɛ cɔhɔ̀ka, n'aa cɔ́dí-ma bààsí nɛ cɔ̰́ɔ̰̀di ye kú hḭ́ńkà-ní é n'hɔ̰́tà nɛ́na-dà káá hɛ̰kàma . ⁶ Àmá tḭ́ńti ye kú hḭ́ńkà-ní, ti pú káá hɛ̰kàma màcɔ̰́mà. N mɛ̀ɛ dań-ma è yɔ̀ nɛ kó dɛ́há mɛma. ⁷ Há̰kà, ti cɔɔ̀hu Weèdi è yɔ̀ nɛ dá pa̰á̰ kpákpààma màcɔ̰́mà. Ti pú kpɛ̀i é bɛka ye pesà-ní ti nɛdáma, àmá ti kpɛ̀i nɛ́ m'pa̰kú suumá-dà, bá k'yè yònà ti káá-ma hɛ̰kàma. ⁸ Ti wɛì mɛma mìì tee-sá, ti pú káá nɔɔ̀ti è kó nɛɛ́ wɔ̰ná wɛbeèdi, ti tì káá è kó nì caka-á-ma sá̰à̰di. ⁹ Yè hɔ̰́ ti n'yòǹ-nà wɛ̀ɛ̀di-dà, kà nɛ́na kpenì Weèdi cɔ̀ku mɛhɛká kà tḭ́ńti sɔ̰̀ǹ. Ti mɛ̀ɛ cɔɔ̀hu-sá nɛ kpɛ́mú ti weèdɔɔ̀pu mɛhɛká, mií-dà héé Weèdi hédá kà nɛ́ kpɛ̰́ń ni cɔ̀ku mɛhɛká. ¹⁰ Ǹtɛ mìì tee-sá kà n nɛ wa̰à̰hu miì kú wɛnnì è káà nɛ dɛu-nà. N pú kpɛ̀i tɛ̀i-ho nɛ pesá, k'yé béka ń nɛ kɛ̰̀ḭ-nà sàma. Weèdi n kɔ̰́ɔ̰̀ kpɛ̰́ǹti è yɔ̀ ń yíkàna nɛ weèdɔɔ̀-hòǹhòni-dà, nì pú tì nà n kɔ̰́ɔ̰̀ è yɔ̀ ń nì pɔ́dá.

¹¹ N nɛ cɔń-ma sá̰mà n kúcàpa nà n potɔ̰ɔ̰̀pa-nà. Nɛ́ m'péé yaǹnaakú mɛhɛká. Nɛ́ m'pɛnti nɛ kó hḭmá é kpɛ̰́ń Weèdi cɔ̀ku mɛhɛká. Nɛ́ n'yahikànì nɛ tɔɔ̀pa wɔ̰̀ǹti, é n'you-nà nɛ tɔɔ̀pa. Nɛ́ n'fòù wɛ̀ɛ̀di mɛhɛká, mɛma Weèdi mɛ̀nì yòǹ-di dɔ́kàma nà wɛ̀ɛ̀di Weèdi kó nɛ m'péé-nà-á-ma. ¹² Nɛ́ dɔa-ho nɛ tɔɔ̀pa sukú nà yàma màcɔ̰́. Mɛ̀m̀pà kú wɛǹni yòǹ-pa Weèdi kpɛ́ɛpá miì nɛ dɔń-hɔ̰. ¹³ Teó Sèsí-Kídísì pa̰á̰suumá, nà Weèdi dɔ́kàma, nà Weèdi sèdi múnáma é nɛ m'péé-nà nɛ wɛǹni!