Kɔ̀dɛ́ńtìpa Pɔkàdɛ́ɛ̀ta 12

Teó de bɛkáà-sa Pɔ́dì dɔhàti mɛhɛká.

¹ Yè békú ń wá̰káná-dà? Miya̰ pú sudi. Wɔ̀nì-ní há̰kà, n kó wɛɛ́ Teó n bɛkáà-sa-dà dɔhàti mɛhɛká n'ɔ̀ɔ̀ n wekanà-sa. ² N yá̰á̰-ma dɔɔ̀o òcɔ̰́ǹ k'ò yòǹ Kídísì kóoó, nà Weèdi ò hɛ̀dà-ma óò dìkàna háá hḭ́ǹka sàka mɔ́nká mɛhɛká, yè yɔ̀ɔ-ɔ́-ma beeká píì-kànàhì sá̰mà. Dɔhàti mɛhɛká-dà nì de ò hɛ̀dà-ma óò dìka-à, n pú yá̰á̰. Nì de ò hɛ̀dà mɔ́-mɔ́masí-dà óò dìka-à, n pú yá̰á̰. Weèdi cɔ̰́ɔ̰̀di-dà yá̰á̰. ^3-4 N yá̰á̰-sa sá̰à̰di-dà héé, Weèdi de hɛdà ye yaǹn óò dìka háá ni hɔ̰́ɔ̰̀ta mɛhɛká. Nì de hɛdà o mɔ́-mɔ́nń-dà óò dìka-à, nì de ò hɛ̀dà dɔhàti mɛhɛká-dà óò dìka-à, n pú yá̰á̰ miya̰, mɛní cɔ̰́ɔ̰̀di-dà yá̰á̰. Ye pesá, ò tɛ̀i é yekà-ma wɛmá, nìpa boocí wɛmá kɔ́ɔ́ ye kú wɛnɔ̀ka è kó nɛɛ́ mà wɛdá, pà mɛ̀ɛ pú pɛ̰ḭ nùdi niìfòùo òcɔ̰́ǹ è yɔ̀ ó mà wɛdá. ⁵ N'ɛ̀ɛ kú dɔɔɔ̀ kpɛ́mù-ní, n kó nɛɛ́-ma é wá̰káná. Àmá k'yè sɔ̰́ńtà n mɔ́nń kú hḭ́ǹka-dà, n pú kó nɛɛ́ é wá̰káná nà yècḭ́ḭ̀ k'yè pú yòǹ n sɔ̰̀ǹdìdi. ⁶ Kà n de kpɛ̀i é wá̰káná, yè pú kó n'yònà n fikadà-ma-dà è mà hɔ̰n, è yá̰á̰ n kó caka wɛbeèdi-dà. Há̰kà n pú mà hɔ̰n, mìì tee-sá n pú kpɛ̀i k'òòcɔ̰́ǹ-dà é n tódá niìsào k'yé ha̰tá-nà ò n dìi kà n pa̰kú-sa yoo ò you kà n wɛì-sa.

⁷ Weèdi n bɛkáà niìi sàsa-dà kà n de kó nɛɛ́ wá̰káná n'ɛ̀ɛ hḭ́ǹka. Nì há̰ de pú kpɛ̀i-má mɛma tá, kà ní taàa n wɔ̰̀ǹti mɛhɛká niìya̰ yècḭ́ḭ̀ k'yè tì wéhèǹta. Nì hédà kà Wɛɛ̀kupá wódo tɔntɔndikó-dà é tɛ̀ni é n potá, é n kpaná n kó sṵ́ná-ma wá̰kánáma. ⁸ Cɔ̀ku màta̰a̰, ká n sɛ́úka Teó è yɔ̀ ó yè nà n dèda, ⁹ àmá k'ó n tɛ̰́ná è yɔ̀: N pa̰á̰suumá a sàà-á-ma, è yá̰á̰ n kpeèti bɛkú ti cɔ̰́ɔ̰̀di dɛ́dɛ́í a sɔ̰̀ǹdìdi mɛhɛká-dà. Kà mɛmá-dà n kó wá̰káná-ma tenten nà n sɔ̰̀ǹ-ma kpɛ́mú, k'yé teha kà Kídísì kpeèti é m'péé n hḭ́ǹka. ¹⁰ Ye kú kpɛ́mú-dà tee, n toó-ma nà yaǹnaakú, mìì héé-sa sɔ̰̀ɔ̰̀ǹti, nà cɔ̀ka, nà fá̰kápàma, nà náńkú, nà bɔɔ̀pùukú kpɛ́ɛsá. Mii kú wɛnnì n hɔ̰́ɔ̰́kú-ní nà Kídísì kpɛ́mú-dà. Mɔ́ma-dà, n sɔ̰̀ǹ tḭ́ń wɔ̀ni, ye wɔ̀ni-dà n kpenì-ma tenten.

Pɔ́dì bɔ̀ti pudì nà kɔ̀dɛ́ńtì weèdɔɔ̀pa kpɛ́mú.

¹¹ N wɛì è yònà fìko-dà, nɛ́na-dà mɛ̀ɛ tee kà n wɛì mɛma. Nɛ́na-dà de yònà é yee n kpɛ́mú. Bá kà n pú yòǹ yècḭ́ḭ̀, nɛ yún-pá Sèsíì tɔntɔndisàpa pú n ha̰tà yècḭ́ḭ̀. ¹² N de péé-ku nɛ hɔ̰́ɔ̰́hí, n de deháà-á-ma nà mùyɔ̰ sào fá̰kápàma wɛǹni mɛhɛká, kà Weèdi mɛ̀ɛ pa̰á̰ nɛ cɔhɔ̀ka pɔ́ńtáyḭ́ḭ́pa, nà pɔ́ńtápa̰á̰ma, nà pa̰á̰sàma, ye wɛǹni k'yè bɛkú è yɔ̀ n yòǹ Sèsíì tɔntɔndikó-dà. ¹³ M̀mɔ́ńya̰-dà n pa̰à̰-ma weèdɔɔ̀-hòǹhòka tɔɔ̀ka è p'éè nɛ pa̰nà? Niìya̰ yècɔ̰́ sá̰à̰di-dà n pú nɛ békáà-ma, mií-dà héé nɛ́ n púsí n dipú hḭ́ǹka. Nɛ dìi è yɔ̀ n hḭmpù pú coó-dà nkɛ́ɛ̀? Toò, kà nɛ́ bútá-ho miya̰.

¹⁴ Ǹtɛ kà n sɔ̀do bii kà n kɔ́dí nɛ hɔ̰́ɔ̰́hí cɔ̀kumá ta̰á̰ma. É n'yònà n cà̰ǹci tɔɔcí, n pú kpɛ̀i é taá n'yɛ̰̀ḭ n'ɔɔ̀cɔ̰́ǹ, mìì tee-sá n pú pɛnti n'ɛɛ̀cḭ́ḭ̀, àmá n pɛnti nɛ mɔ́mpá-dà. Yè pú yòǹ bííhí-dà hɔ̰́ pɛha kááma hi báàpa kpɛ́mú, àmá báàpa-dà hɔ̰́ mà pɛha pa bííhí kpɛ́mú. ¹⁵ Mmí kú pesá, yè pú n dɔǹ-nà n kó cɔ̰ha-má n kpɛ́ɛsá wɛǹni, bá é múńtá é pa̰a̰ n kpɛ́ɛtí nɛ kpɛ́mú. Kà n nɛ dɔ́sí sàma ma kú bookù-ní, nɛ́na yònà é nà n dɔ́sí cɛ̰́ma-dà?

¹⁶ Nɛ tehéè è yɔ̀ n de pú yòǹ totodí n'ɔɔ̀cɔ̰́ǹ-ḭ̀? Nɛ pàcɔ̰́ há̰ cakú è toò: N bii yàma-dà è nɛ báńtí è tà̰ni nɛ kpɛ́ɛsá. ¹⁷ Ntɛ́ n nɛ dii-mà kú bodú-dà? N nɛ dii nà nìpa n nɛ tɔn-pá-ho, p'oòcɔ̰́ǹ-dà? ¹⁸ Mmí-dà sɛ́úkáà Títì óò tɔn-hɔ̰ nɛ hɔ̰́ɔ̰́hí. Nà mɛnń ká n ò nɔɔ́-nà-hɔ̰ ti kúcàa n nɛ cakáà-ko kú wɛmá. Títì há̰ nɛ báńtáà-á-ma é nɛ dii-a? Mmí nà mɛnń, ti yam̀màhàdi yòǹ nìcɔ̰́-dà, kà ti pa̰á̰ma yòǹ màcɔ̰́?

¹⁹ K'yè púdí, nɛ́na nɛ maàhu k'yè dɛu è toò ti nɛ wa̰à̰hu miì kú wɛnnì è pɛnti é yeda ti cɔ̰́ɔ̰̀di kpɛ́mú-dà nɛ yìhìka. Mɛma há̰ dɔ. Weèdi yìhìka, ti wɛì Kídísì kpɛ̀kaàma-dà. Ti mɛ̀ɛ cakú miì kú wɛnnì n dóbòbɔ̀ɔ̀ka-nà, è kpɛ̀i é nɛ tempanà kà nɛ dandaní-dà é kpɛ̰́ń. ²⁰ N wani n kó ta̰ntá-ma-dà-ho nɛ hɔ̰́ɔ̰́hí, é tɛ̀i é n'hɔ̰́tà nɛ koò pú yòǹ n de kpɛ̀i kà nɛ́ n'yòm̀pu, é yídá nɛ mɔ́mpá, kà nɛ́ n'hɔ̰́tà n mɛ̀ɛ té koò pú yòǹ nɛ de kpɛ̀i kà n ní n'yòm̀pu. N wani n kó tɛ̀i-má-dà-ho, é hɔ̰́tá nɛ cɔhɔ̀ka, kɔ̰ɔ̰̀ka, nà dɔ́kàkpákpààma nɛ tɔɔ̀pa kpɛ́ɛsá hḭ́ǹka, nà fɔ̰́ɔ̰̀ka, nà nìpa kó n'nɔ̀hu-ma nà pa tɔɔ̀pa, nà tɔɔ̀pa yèka cɔ̰hàma, nà wɛpà̰pà̰hìma, nà fóńfóǹti, nà yákìyákìma pa̰á̰ma. ²¹ N wani n kó ta̰ntá-ma-dà-ho nɛ hɔ̰́ɔ̰́hí, é tɛ̀i é n'hɔ̰́tà Weèdi tṵ́mà n ceí-nà fɛ̀ci kpɛ́ɛsá nɛ cɔhɔ̀ka. N wani n kó tɛ̀i é n'hɔ̰́tà-ma-dà nɛ sààpa pú wɛ́i sḭ̀ḭ̀ma pà de pa̰kú-ma, è káà sɔ̰ncí yɔ́humú pa̰á̰ma, nà yáyámú, nà sɔ̀kací pa̰á̰ma. Kà n tɛ̀i è hɔ̰́tà miya̰, n kó kɔń-ma ye kú yammà kpɛ́mú.