Kɔ̀dɛ́ńtìpa Pɔkàdɛ́ɛ̀ta 11

Pɔ́dì nà tɔntɔndikpákpààpa.

¹ N kó wɛɛ́-sà wɔ̀nì mɛnì yòǹ fìhikú kpɛ́ɛsá-dà, n mɛ̀ɛ nɛ cɔɔ̀hu è yɔ̀ yè dá nɛ kɔkapa. À̰à̰, nɛ dá hédá n kó wɛɛ́-sa k'yé nɛ kɔkapa . ² N nɛ dɔ́sí-ma k'yé ha̰tá, k'yé n'tee-nà kà n pú n'kpɛ̀i nà nìi tí nɔ̀hì nɛ hḭ́ǹka. Ye dɔ́kàma mɛ̀ɛ péé-nà-ní Weèdi pesá-dà. N nɛ pḭà̰ dɔɔ̀o òcɔ̰́-dà, mɛnń-dà héé Kídísì. N mɛ̀ɛ kpɛ̀i é wáńtá nɛ tanà o pesá kà nɛ weni-í-ma, è yònà bíipohí mɛ̀ǹhì cɛ̰ɛ̰́-hi hi cɔ̰́ɔ̰̀di è pú yá̰á̰ daapá. ³ Nɛ́ deǹta wàfa^ade yehènà-ma kú bookú Ɛ́fù nà nuǹhetí. N mɛ̀ɛ té wani-í-ma pà kó dúùu-má nɛ yam̀màhàka mɛhɛká yam̀màhàkpákpààka, ye wɔ̀ni é nɛ náhìna-nà Kídísì kà nɛ koò p'óò n'tṵ̀n cóńcodí nà yàma màcɔ̰́. ⁴ N wani mìì tee-sá, kà biɔhànakó òcɔ̰́ǹ tɛ̀ni è nɛ cakáà Sèsíì tɔɔ̀o òcɔ̰́ǹ kú kpɛ́mú, bá k'ò ceń nà ti nɛ cakáà-kò, nɛ hɔ̰́ ò besí-ma. Yoo, k'ò tɛ̀ni è nɛ cakáà sèdi tɔɔ̀di nìcɔ̰́nì kú wɛmá, kà nì ceń-nà nɛ de dɛ́tà-di, nɛ hɔ̰́ ò besí-ma. Yoo, k'ò tɛ̀ni è nɛ cakáà wɛnaamá tɔɔ̀ma, kà mà ceń-nà nɛ de teháà-ma, nɛ hɔ̰́ ò besí-ma.

⁵ N há̰ pú maàhaà è yɔ̀ nɛ tóńkú-pà è yɔ̀ pà yòǹ tɔntɔndisàpa, pà n ha̰tà yècḭ́ḭ̀. ⁶ K'yè púdí n pú nɔn wɛmá è yònà mɛmpá, àmá mìì héé-sa yá̰á̰ma Weèdi hḭ́ǹka, n káá-ma mɛma. Ti mɛ̀ɛ mà nɛ bɛkáà-á-dà tenten cɛ̰má dɔ́ɔ́di niìi wɛǹni mɛhɛká.

⁷ N de nɛ cakáà tḭ́ń wɔ̀ni Weèdi wɛnaamá, n de pú nɛ békáà è yɔ̀ nɛ́ n bodá yècḭ́ḭ̀. N múńtà de yakadà n cɔ̰́ɔ̰̀di-dà è kpɛ̀i kà nɛ́na é kpɛ̰́ń. N yetádi de péé ya-dà ye pesà-ní? ⁸ N de dehú nɛ kpɛ́mú, kà weèdɔɔ̀-hòǹhòka tɔɔ̀ka-dà n bopù. Ka kú dící-dà n de kokù-ma è dehú-nà nɛ kpɛ́mú. ⁹ N mɛ̀ɛ de péé-ku nɛ hɔ̰́ɔ̰́hí, k'yècḭ́ḭ̀ n dóńtà, n de pú hɔ̰́ yè béka n'ɔɔ̀cɔ̰́ǹ, è yá̰á̰ ti kúcàpa, mɛ̀m̀pà de tɛ̀ni-pá-ní nà Màsèdɔ́nì, pà de n toó-ma-ní yè de n békú-sa wɛǹni. N de pú teháà è kó nɛ n'yòǹ totodí, n mɛ̀ɛ pú cédí é mà hḭn daadí yènì. ¹⁰ Yè n naa-á-ma nà n de pú ta̰ǹni-má yècḭ́ḭ̀ nɛ pesá, òcɔ̰́ǹ mɛ̀ɛ pú kó nɛɛ́ n kpaná n kó wá̰káná-ma ye hḭ́ǹka Àkàyíì tempáàku wɛǹni mɛhɛká. N wɛì mɛma, nà Kídísì mɛ̀ǹǹ péé-ko n mɛhɛká kú wɛbeèdi kpɛ́mú-dà. ¹¹ Baà tee kà n wɛì mɛma? N pú nɛ dɔ́sí-ma kpɛ́mú-dà tee? Weèdi mɔ́nní yá̰á̰-ma è yɔ̀ n nɛ dɔ́sí.

¹² N hɔ̰mpù-ní, n baà kó n'sɔ̰ncí è hɔ̰mpú-dà, k'yé teha kà mɛ̀m̀pà pɛnti-pá é dɛ́tá yècḭ́ḭ̀, pà kó yɛ̰̀ḭ-sá kú hḭ́ǹka é wá̰káná è yɔ̀ tḭ́ńti nà mɛmpá ti sá̰á̰-ma, kà pà dá yè dɛ́tá-ma. ¹³ Ye kú nìpà kú bookù pú yòǹ Sèsíì tɔntɔndipá mɔ́mpá, pà báńtí nìpa-dà pa tɔná mɛhɛká. Pà pa̰kú è yònà pà yòǹ-ma-dà Sèsíì tɔntɔndipá mɔ́mpá. ¹⁴ Miya̰ pú yònà é dii nìdo. Wɔ̀ni yènì, Wɛɛ̀kupá wódo mɔ́nń hɔ̰́ pa̰á̰ é n'yònà ò yòǹ-ma-dà tɔntɔndikó mɛ̀ǹǹ péé-ko wenikú mɛhɛká. ¹⁵ K'ò hɔ̰n mɛma, yè dá nɛ dii n'ɔ̀ɔ dapàm̀ma mɛ̀ɛ té kó nɛɛ́-ma é m'pa̰kú è yònà pà yòǹ-ma nìpa mɛ̀m̀pà dehú-pa coóma kpɛ́mú. Pà kó wáńtá deǹta-nà-sa kó n'nɔɔ̀nà tɔná pà pa̰à̰-na-dà.

Náńcí Pɔ́dì dii-cí.

¹⁶ N tṵ́mà wɛì-í-ma: Òcɔ̰́ǹ dá yetá nà n dìi fìko. Kà nɛ mɛ̀ɛ n dìi mɛmá-dà, kà nɛ́ cemá n teha nà n fìhikú, k'yé teha kà n mɛ̀ɛ té fóń cɛ̰́ma. ¹⁷ N kpɛ̀i é caka-sà miì, n pú k'éè caka Teó de kpɛ̀kaàma kú bookú, àmá n k'éè caka è yònà n fikadà-ma-dà. N mɔ́ńǹ mɛ̀ɛ té káá-ma n kó nɛɛ́ wá̰káná-nà-sa kú hḭ́ǹka. ¹⁸ É n'yònà nìpa dɔ́ɔ́di wá̰kánì-ma nà niìfòùpa kpɛ́ɛsá hḭ́ǹka, mmí mɛ̀ɛtékà, n mɛ̀ɛ té kó wá̰káná-ma. ¹⁹ Nɛ́na mɛ̀m̀pà hḭ́n-pá nɛ káá yaǹfòùma, nɛ dìi-pá è yɔ̀ pà fikadà, pa pa̰á̰ma pú hɔ̰́ nɛ kɔkapa pépédí. ²⁰ Yè mɛ̀ɛ pú hɔ̰́ nɛ kɔkapa, kà pà nɛ núńtí, è nɛ yon, è fèùdì nɛ kpɛ́ɛsá, è nɛ wɛì pà̰pà̰hì, è nɛ poò wencí. ²¹ Yè n yòǹ fɛ̀ci-dà kà n mà wɛì. Yè yònà tḭ́ńti de kɔ́ɔ́-ma-dà kpeèti è kó nɛɛ́ éè nɛ pa̰ná.

Há̰kà, nìdo kó nɛɛ́ potá kṵnnɔ̀ǹfa é wá̰káná-nà-sa kú hḭ́ǹka, n mɛ̀ɛ té kó nɛɛ́ wá̰káná-ma ye hḭ́ǹka, bá kà n wɛì è yònà n fikadà-ma. ²² Pà yòǹ hèbùdéèpa bookú-dà? N mɛ̀ɛ té yòm̀pu-dà. Pà yòǹ Ìsìdàyɛ́ɛ̀pa-dà? N mɛ̀ɛ té yòm̀pu-dà. Pà yòǹ Àbààhám̀ yaàbíiká-dà? N mɛ̀ɛ té yòm̀pu-dà. ²³ Pà yòǹ Kídísì dehèpa-dà? N mà yòǹ-ń-ma é múńtá pà ha̰tá. N wɛì miì è yònà n yíńtà-ma-dà. N ká̰tà wìku-dà é pà ha̰tá-nà, é dúú kódedí é pà ha̰tá-nà, kà pá n podí é pà ha̰tá-nà, cɛ̰má dɔ́ɔ́di ká n fa̰hà kṵ́mú nɔ́kú é pà ha̰tá-nà. ²⁴ Cɔ̀ku mànùm̀, kà Sùwífùpa é n poó dáàfa, ye poóma bá mɛ̀mà dɛ̀ɛ̀-ma, dáàfa púta̰a̰ nà màwɔ́ì. ²⁵ É yídá kà Hɔ̀dɔ́m̀pa mɛ̀ɛ té n podí dɔ̀ɔ̀di cɔ̀ku màta̰a̰, kà nìpa é n ká̰mu tá̰à̰ka cɔ̀ku màcɔ̰́, kà nɛ́ɛmá dawɛ́ɛ̀ku é n dɔɔ-nà cɔ̀ku màta̰a̰, ká n pa̰á̰ nɛ́ɛmá cɔhɔ̀ka, weǹtṵ́ṵní nìcɔ̰́ nà yèǹka kàcɔ̰́. ²⁶ N cà̰ǹci dɔ́ɔ́di mɛhɛká, ká n màa-nà kóńcí sṵ́náma, yoo túùpa, é yídá é màa-nà n kpɛ́ɛpá Sùwífùpa, nà mɛ̀m̀pà pú yòǹ-pa Sùwífùpa, é dii náńkú yɔtí mɛhɛká, nà foòka mɛhɛká, nà dàmɛ́dì hḭ́ǹka, é dii náńkú nà mɛ̀m̀pà hḭ́n-pá pà yòǹ ti kúcàpa è há̰ pú mà yòǹ. ²⁷ N ká̰tà wìku-dà tenten n tɔná mɛhɛká, bá wɔ̀ka dɔ́ɔ́di mɛhɛká, kà n té mɔ́ńka nuǹdɔmú. Kà kòni nà nɛ́ɛyà̰hakú té n cɛ̰dí, wɔ̀ni yènì ká n bowá nùdi nà n yàà dɔɔ. Kà sémú n kɔ̀ù, ká n mɔ́ńka báatí. ²⁸ N kó hédá-ma tɔɔ̀sa n pú k'éè kɛ̀da. Àmá n pú dɔɔ̀-sa kú hḭ́ǹka daàka wɛǹni, mií-dà héé yam̀màhàka n káá-ka weèdɔɔ̀-hòǹhòka wɛǹni hḭ́ǹka. ²⁹ Kà nìdo pú kpenì Weèdi cɔ̀ku mɛhɛká, n mɔ́ń-mɔ́ńǹ pú hɔ̰́ kpenì. Kà nìi mɛ̀ɛ dɔdi sḭ̀ḭ̀ma mɛhɛká, yè hɔ̰́ n tɔ̰dí-ma sàma.

³⁰ K'yè békú n wá̰káná, n kó wá̰káná nà n kɔ́ɔ́-sa kú mɛhɛká-dà kpeèti. ³¹ Weèdi mɛ̀nì yòǹ-di Teó Sèsíì Báàa, mɛní pà baà kó n'duǹti-dí k'yé n'kɔ́ɔ́ yɔ̀ɔmá, nì yá̰á̰-ma è yɔ̀ n pú báńtí. ³² Dàmásì yɔtí mɛhɛká, tempáàku yìkàǹyìdo mɛ̀ǹǹ de dehú-ko wódo pà toò-ko Àdètásì kpɛ́mú, de ceà nìpa-dà ye yɔtí há̰ńnùka è yɔ̀ pá n cɛ̰dí. ³³ Àmá kà weèdɔɔ̀pa é n taàa kóndúkédi mɛhɛká, é n deèna nà fùnɛ́tì, é n cúhìna nà wɛ̰̀ci è n hɔ̀dì-nà ye yɔtí bonkú. Mɛmá-dà kà n de fḭ́tá, ò pú n cɛ̰dí.