Kɔ̀dɛ́ńtìpa Pɔkàdɛ́ɛ̀ta 10

Pɔ́dì yení n'ɔ̀ɔ cɔ̰́ɔ̰̀di o tɔmú hḭ́ǹka.

¹ Mmí Pɔ́dì, nìpa wɛì-ko kú hḭ́ǹka è yɔ̀ kà n péé nɛ cɔhɔ̀ka, n hɔ̰́ n'yòǹ-ń-dà pòpòù, àmá kà n yɔ̀ɔ nɛ nátá-nà-pu, kà n té n'daí tenten nɛ hḭ́ǹka, mmí mɔ́nń-dà nɛ kɔ̰́nì-hɔ̰ cɔhàmà mɛmà-ní. Nà yaǹyɔ̀kàm̀ma Kídísì káá-ma é yídá nà nììma ò káá-ma kpɛ́mú, ² n nɛ sɛ́úkú-ma è yɔ̀ nɛ dá hédá ká n tɛ̀i tḭ́ń daadí nɛ hɔ̰́ɔ̰́hí, yé n béka è yɔ̀ ń nɛ kɛ̰̀ḭ-nà. Nɛ mɛ̀m̀pà màhu-pá è toò ti bɔhàta nìpa bɔhàta-sá-dà, mɛmpa n kó tɛ̀i-ho tḭ́ń daadí é pà bɛka-á-ma n datí sá̰á̰pu. ³ Mɔ́masí-dà ti yòǹ-ma niìfòùpa, àmá ti pú tɔ̰ṵ ta̰à̰pu niìfòùpa tɔ̰ṵ-má kú bookú. ⁴ Ta̰nɛǹti ti tɔ̰ṵ-nà-ti pú yòǹ niìfòùpa kpɛ́ɛtí. Tì yòǹ Weèdi ta̰nɛǹti-dà, è káá kpeèti è kó nɛɛ́ fíɔ́wá mìì káá-sa kpeèti. Ti fíɔ́nì-í-ma yam̀màhàkpákpààka, ⁵ è nɛní mìì kú wɛnnì ca̰kanì-sa cɔ̀ku hḭ́ǹka, è hókánì è kpanì nìpa kó yá̰dá-ma Weèdi. Ti kpɛ̀i é peǹta nìi maàhu-sá-dà o yàma mɛhɛká, k'yé teha k'ó yekà-nà Kídísì toodí. ⁶ Ti mɛ̀ɛ kó dɛ́há tḭ́ń daadí kà nɛ you-nà toòka Kídísì, ti sɔ̀do kó m'bii-í-ma kà tí yɔ̰́ń mɛ̀m̀pà p'óò you-nà-pa toòka.

⁷ Cɔ́ɔ́-nà niìi wɛǹni yòm̀pu-ì! K'òòcɔ̰́ǹ yá̰á̰ tenten è yɔ̀ ò yòǹ Kídísì kóoó-dà, ò yònà è mɛ̀ɛ té n'yá̰á̰-ma sukú è yɔ̀: Ò yòǹ Kídísì kóoó, kà ti mɛ̀ɛ té mà yòǹ-ń-ma. ⁸ Teó ti kɔ̰́ɔ̰̀ kpɛ̰́ǹti è yɔ̀ tí yíkàna nɛ weèdɔɔ̀-hòǹhòni-dà, nì pú tì ti kɔ̰́ɔ̰̀ è yɔ̀ tí nì pɔ́dá. Yè mɛ̀ɛ pú n yònà fɛ̀ci, bá kà n tì fóń-nà sàma. ⁹ N pú kpɛ̀i k'yé nɛ n'yònà n nɛ wa̰à̰hu-má n pɔ̀kàhi è kpɛ̀i é nɛ wampàna, ¹⁰ è yá̰á̰ n you kà pà wɛì è toò: Pɔ́dì pɔ̀kàhi wɛmá-dà kpenì è tṵ́mà tohi. K'ò há̰ péé o mɔ́nń ti cɔhɔ̀ka, ò pú hɔ̰́ n'kpenì ma kú bookú, o wɛmá mɛ̀ɛ pú hɔ̰́ m'bòn. ¹¹ Mɛ̀ǹǹ wɛì-ko mɛma kú bookú, ò yònà é n'yá̰á̰-ma è yɔ̀, t'eè kɔ́ɔ́ è nɛ wa̰à̰hu ti pɔ̀kàhì kà hi kpekù yòm̀pù-ní, ti kó m'péé tḭ́ń daadí nɛ cɔhɔ̀ka, è baà é n'yòm̀pu-dà ti pa̰á̰ma mɛhɛká.

¹² Pàcɔ̰́ mɛ̀m̀pà bɛkú-pa pa cɔ̰́ɔ̰̀di nìpa yìhìka è yɔ̀ pà yòǹ niìsààpa, ti pú kó nɛɛ́ pádá kṵnnɔ̀ǹfa é n'yɔ̀ nà mɛmpá ti sá̰á̰ yoo ti pà yònà. Pa wɛhimú, pà mù beè-nà pa mɔ́mpá dìkaàma-dà pa cɔ̰́ɔ̰̀di. Pà yòǹ yaǹkɔ́ɔ̀pa-dà. ¹³ Tḭ́ńti há̰kà, ti pú kpɛ̀i wɛhikàna ti cɔ̰́ɔ̰̀di hádí é yɔ̀ɔ ha̰tá. Ti kó mà hḭn é sá̰á̰ Weèdi yɛ̀di tɔmú nùdi-dà. Ye tɔmú-dà mɛ̀ɛ tee kà tí yɔ́ ta̰ntá-ho háá nɛ hɔ̰́ɔ̰́hí. ¹⁴ Ti tɛ̀i-mà-hɔ̰ nɛ hɔ̰́ɔ̰́hí, ti pú ha̰tà Weèdi ti beé è yɔ̀ tí deha é sá̰á̰-sa. Tḭ́ńti-dà cedí tɛ̀ni nɛ hɔ̰́ɔ̰́hí é nɛ caka Kídísì wɛnaamá. ¹⁵ Ti pú wɛkànì ti cɔ̰́ɔ̰̀di é ha̰tá-ho, nà tɔmú tɔɔ̀pa pa̰à̰-pu. Àmá ti dan-ń-ma è yɔ̀ nɛ dandaní kó n'kpɛ̰́ǹ, kà ti tɔná yɛ̀di dɔɔ̀haà è pɛ̀ku-ú-ma sàma nɛ cɔhàka, há̰kà è pú n'ha̰tà ti yònà é sá̰á̰-sa. ¹⁶ Ye kú dàhàka, ti kó nɛɛ́-ma é sɔ̰kadá yìhìka, é tɛ̀i caka wɛnaamá tempáàti mɛ̀ǹtì pú tɔ́sí-nà-ti nɛ hɔ̰́ɔ̰́hí. Ti pú kpɛ̀i é wɛkàna ti cɔ̰́ɔ̰̀di nà tɔmú tɔɔ̀pa pa̰à̰-pu pa yɛ̀di mɛhɛká. ¹⁷ Pà wà̰tà Weèdi pɔ̀kàhi mɛhɛká è yɔ̀: Kà nìi kpɛ̀i é wɛkàna o cɔ̰́ɔ̰̀di, k'ó wɛkàna o cɔ̰́ɔ̰̀di nà Teó pa̰à̰-sa hḭ́ǹka. ¹⁸ Yè pú yòǹ nìi mɛ̀ǹǹ bɛkú-ko o cɔ̰́ɔ̰̀di è yɔ̀ ò yòǹ niìsào nìpa yìhìka, mɛnń-dà Teó sɛdí-ma, àmá ò cóńtí-ko-dà.