Kɔ̀dɛ́ńtìpa Pɔkàdɛ́ɛ̀ta 9

Díitɔ́hɔ́kàma é tempanà weèdɔɔ̀pa mɛ̀m̀pà péé-pa Sùdéè tempáàku.

¹ Mìì héé-sa tempàma nɛ kpɛ̀i é pa̰á̰-ma Weèdi kpɛ́ɛpá mɛ̀m̀pà péé-pa Sèdìsàdɛ́m̀ yɔtí mɛhɛká, yè de koò pú békú è yɔ̀ ń nɛ wa̰hà-hɔ̰ pɔ̀kàta ye kú hḭ́ǹka. ² N yá̰á̰-ma dɛ́dɛ́í è yɔ̀ nɛ naanà é pa̰á̰ ye kú niiyà̰. N mɛ̀ɛ nɛ cóńtí-sa kú hḭ́ǹka-dà Màsèdɔ́m̀pa yìhìka. N de pà cakáà è yɔ̀: Àkàyíì tempáàku weèdɔɔ̀pa sɔ̀do bii-í-ma nà ndɛ̀di kà pà kó kɔ̰́ɔ̰́ pa tempàma. Pà yèkaà wɔ̰ǹyahití nɛ káá-ti-dà tempàma hḭ́ǹka, k'yè mɛ̀ɛ té síkápa pa sààpa. ³ N há̰ nɛ tɔnti-ho ti kúcàpa, è kpɛ̀i kà nɛ sɔ̀do-dà é m'bii, é n'yònà n cakáà-sa nìpa. N pú kpɛ̀i ye kú pa̰á̰mà mɛmà kú mɛhɛká, kà cóńdàma n cakáà-ma nɛ hḭ́ǹka é yɛ̀ɛ̀ hécí. ⁴ Kà mɛma dɔ, kà Màsèdɔ́m̀pa n nɛntà è tɛ̀ni nɛ hɔ̰́ɔ̰́hí, è tɛ̀i è hɔ̰́tà nɛ sɔ̀do pú bii, n dań-mà kú bookù nɛ hḭ́ǹka, fɛ̀ci-dà kó n kɔ̀ù, ye fɛ̀ci mɛ̀ɛ kó n'yòǹ nɛ kpɛ́cí-dà. ⁵ Ye kú kpɛ́mú-dà tee, n cɔ́ɔ́-ma é n'hɔ̰́tà yè suu-ú-ma è yɔ̀ ń cɔhà ye kúcàpà mɛmpà-ní, kà pá nihí nɛ hɔ̰́ɔ̰́hí, é tɛ̀i wisí pa̰ká nɛ hḭ́n nɛ kó kɔ̰́ɔ̰́-ka nà nɛ yàma wɛǹni. Mɛma, n kó n'kó tɛ̀ni kà ka sɔ̀do bii-í-ma. Mií-dà mɛ̀ɛ kó m'bɛkú è yɔ̀ nɛ pɔ̰n nà yàma màcɔ̰́-dà, nɛ pú pɔ̰n nà yɛ̰̀ɛ̰́yɛ̰ɛ̰dí.

⁶ Nɛ́ n'yá̰á̰ è yɔ̀: Kà nìi bɔɔ́ cɛ̰́ma, ò kó kɔ̰ṵ cɛ̰́ma-dà. Kà nìi mɛ̀ɛ bɔɔ́ sàma, ò kó kɔ̰ṵ sàma-dà ⁷ Bá nɛ mɛ̀ǹǹ dɛ̀ɛ̀-ko té pa̰a̰ ò ta̰kadà-ma kú bookú o yàma mɛhɛká. Ò mɛ̀ɛ dá pa̰a̰ é tṵ́má yɔ̀ɔ n'tonà kà n de yá̰á̰, yoo é pa̰a̰ é n'yònà p'òò pa̰à̰-ma nà kpeèti. Weèdi naanà mɛ̀ǹǹ hɔ̰́ pa̰a̰-kó-dà nà yaǹnaakú. ⁸ Weèdi káá-ma nɔɔ̀ti è kó nɛɛ́ nɛ pa̰a̰ kááma wɛǹni, k'yé teha kà nɛ́ n'káá wɔ̀ka wɛǹni yè nɛ békú-sa wɛǹni, é tṵ́má é n'káá sàma é pa̰á̰-nà tɔnsuumú wɛǹni, ⁹ é n'yònà pà wà̰tà-ma Weèdi pɔ̀kàhi mɛhɛká mɛ̀ǹǹ pɔ̰n-kó hḭ́ǹka è yɔ̀:

O nɔ̀ku piìni-í-ma dɛ́dɛ́í,

k'ò pɔ̰n pɛ́íhí,

O nììma baà kó m'péé-ma,

k'yé n'kɔ́ɔ́ yɔ̀ɔmá.

¹⁰ Weèdi mɛ̀nì hɔ̰́ pa̰a̰-dí nìpa dibɔɔ̀ti kà pá bɔdí, é pà pa̰a̰ dití kà pá dii, nì mɛ̀ɛ té kó nɛ pa̰a̰-á̰-ma nà yàma màcɔ̰́, dibɔɔ̀ti yè nɛ békú-ti, é tṵ́má hédá kà tí kpɛ̰́ń. Mɛma, nɛ kó dɔ̀hà é m'pa̰kú-ma nììma sàma. ¹¹ Weèdi kó hédá-ma kà nɛ́ n'káá kááma niìi wɛǹni mɛhɛká, k'yé teha kà nɛ́ dɔ̀hà é m'pɔ̰n nà yàma màcɔ̰́. Mɛma, nìpa dɔ́ɔ́di kó sɛda-á-ma Weèdi nà pa̰ká ti kó pà kɔ̰́ɔ̰́-ka nà nɛ yèdi. ¹² Ye pa̰kà pú kó tempanà weèdɔɔ̀pa pà kɔ́ɔ́-sa kú hḭ́ǹka cɔ̰́ɔ̰̀di, àmá kà kó tṵ́má hédá-ma kà nìpa dɔ́ɔ́di é tɔná Weèdi sàma. ¹³ Pà kó dɛ́há tɔmú nɛ pa̰à̰-pu wɛhimú sá̰á̰ma-dà, ye wɔ̀ni é duntà Weèdi nà nɛ tṵ̀n-má Kídísì wɛnaamá hḭ́mpú, é yídá nì dùǹtà nà nɛ tookú-ma nɛ kááma nà mɛmpá, nà nìpa wɛǹni. ¹⁴ Pà kó nɛ bɛka-á-ma pa dɔ́kàma, é n'cɔɔ̀hu Weèdi nɛ kpɛ́mú, nà pa̰á̰suumá sàma Weèdi nɛ pa̰à̰-ma kpɛ́mú. ¹⁵ Weèdi yèdi é wɛhika, nà pa̰dí nì ti pɛ̰ḭ-dí kà nì kɔ́ɔ́ tɔɔ̀di.