Kɔ̀dɛ́ńtìpa Pɔkàdɛ́ɛ̀ta 8

Pɔ́dì teǹ weèdɔɔ̀pa díitɔ́hɔ́kàma hḭ́ǹka.

¹ N kúcàpa nà n potɔ̰ɔ̰̀pa-nà, ti kpɛ̀i kà nɛ́ n'yá̰á̰ Weèdi bɛkáàma kú bookú-dà ni pa̰á̰suumá Màsèdɔ́nì tempáàku weèdɔɔ̀-hòǹhòka. ² Pà dúú fá̰kápàma sàma mɛhɛká-dà, nà mɛma kà pa yaǹnaakú baà de sṵ́n. Pà de yòǹ pɛ́íhí mɔ́nhí-dà, nà mɛma baàkaà kà pá bɛka nììma é kɔ̰́ɔ̰́ dící tenten. ³ Pà kɔ̰́ɔ̰̀-ɔ̰́-ma dící bá mɛ̀ǹǹ dɛ̀ɛ̀-ko o nɔɔ̀ti sá̰á̰pu, háá é múńtá yɔ̀ɔ ha̰tá, n nɛ cakú n dɛ́hà-sa-dà. Pà mɛ̀ɛ cì kɔ̰́ɔ̰̀ nà pa cɔ̰́ɔ̰̀di kú yàma-dà. ⁴ Pà ti sɛ́úkáà-á-ma sàma è yɔ̀ tí hédá kà pa kú tempàma mɛ̀ɛ té m'péé pà kó naǹci-sá Weèdi kpɛ́ɛpá mɛ̀m̀pà péé-pa Sèdìsàdɛ́m̀ yɔtí mɛhɛká. ⁵ Pà mɛ̀ɛ pa̰à̰-á̰-ma háá é yɔ̀ɔ ha̰tá ti de ceí-sa. Pà dɛnà é kɔ̰́ɔ̰́ pa cɔ̰́ɔ̰̀di-dà Teó, é yídá teha ti hḭ́mpú Weèdi de kpɛ̀kaàma.

⁶ Ye kú kpɛ́mú-dà tee, ti cɔɔ̀haà-ma Títì è yɔ̀ ó tón nɛ hɔ̰́ɔ̰́hí, é tɛ̀i dehà ye nììma tɔmú ò de cetà-pu. ⁷ É n'yònà nɛ wɛ̰́dì-ma kú bookú è káá dandaní, è nɔn wɛmá sukú, è káá yá̰á̰ma, è wáhi niìi wɛǹni pa̰á̰ma, è káá dɔ́kàma ti hḭ́ǹka, nɛ mɛ̀ɛ té n'wɛ̰́dì nììma tɔmú pa̰á̰-ma hḭ́ǹka.

⁸ Yè pú yòǹ nùdi-dà n nɛ kɔ̰́nì-ma, àmá n nɛ cakú tɔɔ̀pa wɔ̰̀ǹti wáhi-má kú bookú, è kpɛ̀i nɛ́ dɛ́há pa pa̰á̰ma-dà è mɛ̀ɛ té bɛka nɛ kú dɔ́kàma yòǹ-ma mɔ́ma. ⁹ Nɛ yá̰á̰-ma ti Teó Sèsí-Kídísì pa̰á̰suumá sá̰á̰ma. Ò de káá-ma niìi wɛǹni, àmá nà nɛ kpɛ́mú k'ó kpáhìna o cɔ̰́ɔ̰̀di pɛ́íta, k'yé teha k'òo pɛ́íti é nɛ kɔ̰́ɔ̰́ kááma.

¹⁰ N nɛ cakú n maàhu-sá-dà ye kú hḭ́ńkà-ní. Nɛ pa̰à̰-sà-dà nɛ suu-nà. Ndɛ̀di, nɛ́na-dà de yòǹ cecepá é mahà è yɔ̀ nɛ kó tɔ́hɔka dící, nɛ́na-dà mɛ̀ɛ de tṵ́mà yòǹ cecepá é cetá ci tɔ́hɔ́kàma. ¹¹ Sá̰mà-ní, nɛ́ wɛ̰́ɛ̰́ é tempanà nà nɛ nɔɔ̀ti sá̰á̰pu é dehà ye tɔmù-ní. Nɛ́ mù pa̰ná, nà wɔ̰ǹyahití nɛ de káá-ti nɛ mù ceekú tḭ́ń wɔ̀ni. ¹² Kà nɛ pɛ̰ḭ nà yàma màcɔ̰́, Weèdi hɔ̰́ diìda nɛ káá-sa-dà é ta̰ǹta-nà nɛ pa̰a̰dí, nì pú nɛ békú nɛ pú káá-sa. ¹³ Yè pú yòǹ n bɔhɔ̀ta è kó pɛ́kàna nɛ́na, é tempanà tɔɔ̀pa. Á̰à̰, n pɛnti yè kó hḭn-má-dà kà nɛ́ sá̰dá. ¹⁴ Yè yòǹ-mà sá̰mà-ní kà nɛ́na káá k'yè wɛhi, nɛ kó nɛɛ́ tempanà-á-ma mɛ̀m̀pà kɔ́ɔ́-pa. Ye wɔ̀ni, kà nɛ mɛ̀ɛ té wáńtà kɔ́ɔ́ yècḭ́ḭ̀ kà pà káá, kà pà mɛ̀ɛ té nɛ tempanà. Mɛmá-dà sá̰dáma kó pa̰á̰-ma nɛ cɔhɔ̀ka, ¹⁵ é n'yònà pà wà̰tà-ma Weèdi pɔ̀kàhi mɛhɛká è yɔ̀:

Mɛ̀ǹǹ de ta̰nkáà-ko sàma, de pú káá k'yè ha̰tà.

Mɛ̀ǹǹ mɛ̀ɛ de ta̰nkáà-ko cɛ̰́ma, de pú mɔ́ńkú yècḭ́ḭ̀.

Pɔ́dì cɔ̀hu Kɔ̀dɛ́ńtìpa è yɔ̀ pá codá Títì sukú n'ɔ̀ɔ nɔɔ́tɔɔ̀pa.

¹⁶ Ti sɛdí Weèdi, nà nì pɛ̰ḭ-má Títì k'òo wɔ̰̀ǹti wáhi è yònà ti kpɛ́ɛtí è kpɛ̀i é nɛ tempanà. ¹⁷ Ti de ò cɔ̀haà è yɔ̀ ó tón nɛ pesá k'ó teha-á-ma, múńdìkaà nà wáhikú-dà ò de yídà-ma é ka̰há nɛ hɔ̰́ɔ̰́hí.

¹⁸ Ti pɛ́ɛ̀ óò tɔn-nà-hɔ̰ ti kúcàa òcɔ̰́ǹ-dà, weèdɔɔ̀-hòǹhòka wɛǹni cóńtí-ko n'ɔ̀ɔ̀ héù-ma kà Kídísì wɛnaamá piní. ¹⁹ Tṵ́màkaà, weèdɔɔ̀-hòǹhòka-dà ò ta̰kadà è yɔ̀ ó ti nɔɔ́-nà ye cà̰ǹkù mɛhɛkà, é tɛ̀i tempanà kà tí pa̰á̰ ye nììmà tɔmù-ní. Mù yòǹ tɔmú-dà ti yònà é pa̰á̰-pu é wɛkàna Teó yèdi, é tṵ́má bɛka ti mɔ́mpá kpɛ̀i-má tenten é tempanà tɔɔ̀pa. ²⁰ Ti bɔhɔ̀ta ti kó hḭmpú-dà é yentá nìpa kó wɛɛ́-ma kpákpààma ti hḭ́ǹka ti kó dekamá kú bookú n'ɛ̀ɛ díisàfà pà ti kɔ̰́ɔ̰̀-fà-ní. ²¹ Ti pɛnti mìì kó n'suu-sá-dà Weèdi yìhìka, nà nìpa yìhìka.

²² Nà mɛmpá, ti pɛ́ɛ̀ é tɔn-hɔ̰ ti kúcàa tɔɔ̀o-dà. Ò naanà-á-ma é deha sukú é tempanà tɔɔ̀pa. T'oò dɛ́hà-á-ma cɛ̰má dɔ́ɔ́di ò dekáàma kú bookú ye hḭ́ǹka nà wɔ̰ǹwáhití. Ye kú pa̰á̰mà mɛmà kú mɛhɛkà-ní, o wɔ̰̀ǹti dɔɔ̀haà è wáhi-í-ma sukú mìì tee-sá ò dań-ma nɛ hḭ́ǹka dɛ́dɛ́í. ²³ Títì mɛnn, ò yòǹ n nɔɔ́tɔɔ̀o-dà kà ti pɛ́ɛ̀ è dehú nɛ kpɛ́mú. Ti kúcàpà tɔɔpà mɛ̀m̀pà ò nɔɔ̀nà-pà-hɔ̰, weèdɔɔ̀-hòǹhòka-dà pà tɔn-hɔ̰, pà mɛ̀ɛ pa̰kú-sa wɛkànì Kídísì yèdi-dà. ²⁴ Nɛ́ pà bɛka è yɔ̀ nɛ pà dɔ́sí-ma nà mɔ́ma, kà weèdɔɔ̀-hòǹhòka mɛ̀ɛ dɛ́há nɛ dɔ́kàma sá̰á̰ma, é n'yá̰á̰ è yɔ̀ ti de nɛ cóńtí-mà pa pesá, è naa-á-ma.