Kɔ̀dɛ́ńtìpa Pɔkàdɛ́ɛ̀ta 7

¹ N dóópòbɔ̀ɔ̀ka-nà, ye kú nùkà wɛnnì Weèdi hḭ́nà-kà-ní yòǹ ti kpɛ́ɛká-dà. Ye kú kpɛ́mú, tí wekàna-nà ti cɔ̰́ɔ̰̀di, é wɛ́í mìì kú wɛnnì pa̰kú-sa yɔ̰́káma ti wɔ̰̀ǹku nà ti sèdi. Tí bɔhà-nà é n'weni tenten, é n'wani Weèdi.

Kɔ̀dɛ́ńtìpa bantà pa yetádi k'yé naaka Pɔ́dì.

² Ti ta̰ǹta-nà nɛ yàma mɛhɛká. Ti pú yetà-nà n'ɔɔ̀cɔ̰́ǹ, ti pú hɛ́i n'ɔɔ̀cɔ̰́ǹ Weèdi cɔ̀ku mɛhɛká, ti mɛ̀ɛ pú kodí n'ɔɔ̀cɔ̰́ǹ. ³ N pú wɛì mɛma è kpɛ̀i é dɛ́tá nɛ yetádi. É n'yònà n mà yɔ̀ɔ wɛdápu-ho, ti nɛ dɔ́sí-ma dɛ́dɛ́í ti yàma mɛhɛká, bá k'yècḭ́ḭ̀ pú kó nɛɛ́ ti yaàta-nà nɛ́na fòùmu mɛhɛká yoo kṵ́mú mɛhɛká. ⁴ N nɛ dań-ma sukú, k'yè tṵ́mà n nadi sàma nà nɛ kpɛ́mú. Ti fá̰kápàma wɛǹni mɛhɛká, n yàma hɔ̰́ dɛ́tá-ma yɔ́dàma sàma, kà yaǹnaakú té n sṵ́ná.

⁵ Nà ti ta̰ntà-ma-ní Màsèdɔ́nì tempáàku mɛhɛká, ti pú muhipáà báà cɛ̰́ma. Ti tɛ̀ni é dɔdi fḭ́ncí dɔ́ɔ́di mɛhɛká-dà: Tapaàdi kà nìpa ti kɔ̰ǹti-nà, ti mɛhɛká kà wantafɔ̰̀di ti káá. ⁶ Àmá Weèdi mɛ̀nì hɔ̰́ yɔ́da-dí nìpa pa yàma cɔ̰háà tḭ́ń wɔ̀ni, nì ti yɔ́dáà-á-ma nà Títì tɛ̀mmá-ní. ⁷ Yè mɛ̀ɛ pú yòǹ o tɛ̀mmá-ní cɔ̰́ɔ̰̀di-dà de ti kɔ̰́ɔ̰̀ ye yɔ́dàmà-ní, àmá nà nɛ de ò yɔ́dáà-ma kú bookú-dà k'ó mà ti caka. Ò de ti cakáà è yɔ̀ yè nɛ dodì-í-ma kà nɛ kpɛ̀i é n dɛ́há, é ti caka mìì yòǹ-sa nɛ yaǹcɔ̰hɔ̰̀ma kpɛ́ɛsá, nà nɛ yení-ma kú bookú n kpɛ́mú tenten. Mii kú wɛnnì-dà n tùɛ̀hà yaǹnaakú sàma.

⁸ Bá kà n pɔ̀kàta tɔɔ̀ta n de nɛ wa̰à̰haà-ta de cɔ̰háà nɛ yàma, yè pú n kɔkapú sá̰mà nà n de tà nɛ wa̰à̰haà-ma. N de kɔń nà n de tà wà̰haà-ma, mìì tee-sá n de dɛ́hà é n'hɔ̰́tà tà cɔ̰háà nɛ yàma-dà bɛ̀m̀bɛ̀ni cɛ̰́masí mɛhɛká. ⁹ Àmá sá̰mà-ní, yè n yòǹ yaǹnaakú-dà, yè pú yòǹ nà nɛ yàma de cɔ̰háà-ma kpɛ́mú, àmá nà mà de cɔ̰háà-ma é héé kà nɛ́ peǹta pa̰á̰ma. Ye kú yaǹcɔ̰hàmà de nɔɔ̀nà Weèdi kpɛ̀i-má-dà, ye kú kpɛ́mú ti de pú nɛ pa̰à̰ yetádi nìcɔ̰́nì. ¹⁰ Yaǹcɔ̰hàma mɛ̀mà nɔɔ̀nà-ma Weèdi kpɛ̀i-má hɔ̰́ héé kà nìi peǹta o pa̰á̰ma-dà, é dɛ́tá fḭ́táma. Ye kú kpɛ́mú-dà tee ti pú yònà-ma é kɔń-nà ye kú yaǹcɔ̰hàmà. Àmá, fòùkù mɛnkù kú yam̀màhàka kɔ̰́nì-ma yaǹcɔ̰hàma, mɛma tɛɛ̀hu-nà-ní nìdo kṵ́mú-dà. ¹¹ Nɛ kú yaǹcɔ̰hàma mɛma suu-ú-ma Weèdi yìhìka. Cɔ́ɔ́-nà mà pa̰à̰-sa nɛ fòùmu mɛhɛká. Mà hédà kà nɛ́ pa̰a̰ nɛ kpɛ́ɛtí-dà é dɔ̀hà feǹ-fem̀ma wɛkú mɛ̀ǹkù de yè péé-ku, é bɛka è yɔ̀ nɛ pú teháà ye yaǹn pa̰à̰-ma sḭ̀ḭ̀ma. Nɛ de bɛkáà-á-ma nɛ yàma pɔ́dà-ma n'ɛ̀ɛ kú pa̰á̰mà-ní, è wani nà mìì kó nɛɛ́ tṵṵ̀na-sá-ní, k'yé n'tee-nà kà nɛ kpɛ̀i é n dɛ́há fem̀ma. Nɛ wɔ̰̀ǹti de wáhi-í-ma kà nɛ kó pa̰á̰ Weèdi kpɛ̀i-sá, é yɔ̰́ń mɛ̀ǹǹ pa̰à̰-ko ye sḭ̀ḭ̀ma toòka. Mii kú wɛnnì, nɛ de yè pa̰à̰ é bɛka è yɔ̀ nɛ kɔ́ɔ́ màcɔ̰́mà ye wɛkù mɛhɛkà-dà.

¹² Pɔ̀kàtà n há̰ nɛ wa̰à̰hu-tà mɛntà-ní, n pú tà wà̰hu ye mɛ̀ǹǹ yetà-ko kpɛ́mú, n mɛ̀ɛ pú tà wà̰hu ò yetà-nà-ko kpɛ́mú. Àmá n tà wà̰haà è kpɛ̀i Weèdi yìhìka, nɛ mɔ́mpá-dà é dɛ́há pópóí, nɛ kɔ̰́káàma nɛ cɔ̰́ɔ̰̀di ti kpɛ́mú. ¹³ Mií-dà yahikànà ti wɔ̰̀ǹti.

É m'bààsí ti wɔ̰̀ǹti yahikànamá, yè de ti naakáà-á-ma sàma, nà ti de dɛ́hà-ma Títì k'yè ò nadi mìì tee-sá nɛ wɛǹni de kanà o yàma tenten. ¹⁴ O yìhìka, n de fóń-ma cɛ̰́ma nà nɛ kpɛ́mú, nɛ mɛ̀ɛ pú n dià fɛ̀ci. Múńdìkaà, ti baà nɛ cakú-ma kú bookú wɛbeèdi, ma kú bookú-dà cóńdàma ti nɛ kɔ̰́ɔ̰̀-ma Títì yìhìka mɛ̀ɛ té hḭn-má wɛbeèdi. ¹⁵ Ò káà dèn-ń-ma ò de tɛ̀ni-má-ní nɛ hɔ̰́ɔ̰́hí kà n'ɔ́ɔ̀ codá sukú nɛ wɛǹni, óò cùwa, óò wampa, óò yèkà-nà toodí. Ye kú kpɛ́mú-dà tee k'òo dɔ́kàma dɔɔ̀haà è wɛhi nɛ hḭ́ǹka. ¹⁶ Yè n naa-á-ma nà n kó nɛɛ́ n'dań-ma nɛ hḭ́ǹka niìi wɛǹni mɛhɛká.