Kɔ̀dɛ́ńtìpa Pɔkàdɛ́ɛ̀ta 6

¹ Ti há̰ pɛ́ɛ̀ dehú-mà nà Weèdi, ti nɛ teǹ è yɔ̀ nɛ dá teha kà pa̰á̰suumá nì nɛ pa̰à̰-ma é hḭn hécí. ² Weèdi wɛdà è yɔ̀:

N suumá wɔ̀ni tɛ̀i-má,

ká n besí-ma a cɔhàma.

Fḭ́hìnamá daàka mɛhɛká,

kà m'áa fḭ́hìna.

Ǹtɛ sá̰mà-ní wɔ̀ni suudí mɔ́nní. Yenì-dà Weèdi nɛ fḭ́hìnì-ma.

³ Ti pú kpɛ̀i kà nìpa é dɛ́tá yɔ̰́sàsa yècḭ́ḭ̀ ti tɔmú mɛhɛká, ye kú kpɛ́mú-dà tee ti pú pa̰kú-ma yècḭ́ḭ̀ mìì kó kpaná-sa p'oòcɔ̰́ǹ ò kó tɛ̀ni-má-ní Weèdi cɔ̀ku mɛhɛká. ⁴ Múńdìkaà, ti pa̰kú-sa wɛǹni mɛhɛká, ti bɛkú è yɔ̀ ti yòǹ Weèdi dehèpa mɔ́mpá-dà. Ti toó-ma nà mùyɔ̰ sào mìì héé-sa náńkú, nà pɛ̰́káma, nà bɔɔ̀pùukú, ⁵ nà potidí, nà wéékú, nà kòni, nà nuǹdɔmú mɔ́ńkàma. Kà pá ti kpemu kóodeèka mɛhɛká, é fucí nìpa ti hḭ́ǹka, kà t'éè toó. ⁶ Ti fòùmu de weni-í-ma nɛ cɔhɔ̀ka, kà tí nɛ bɛka ti yá̰á̰ma sá̰á̰ma Weèdi kpɛ́ɛsá hḭ́ǹka, é nɛ bɛka ti mùyɔ̰ sá̰á̰ma nà ti nììma. Ti de nɛ bɛkáà-á-ma Weèdi Sèdi ti péé-nà-ma kú bookú, é nɛ bɛka ti dɔ́sí-ma tɔɔ̀pa nà yàma màcɔ̰́. ⁷ Ti de nɛ bɛkáà-á-ma è yɔ̀ ti yòǹ Weèdi nìpa mɔ́mpá nà wɛbeèdi ti de cakú-di, kà Weèdi kpeèti ti péé-nà. Ti ta̰nɛǹti ti de káá-ti è mɔ̀ù-nà yoo è yení nà ti cɔ̰́ɔ̰̀di, mɛntí-dà héé tí pa̰á̰ mìì coó-sa Weèdi yìhìka. ⁸ Nìpa pàcɔ̰́ de ti cuunì-í-ma, kà tɔɔ̀pa ti yɔ̰́sí. Kà tɔɔ̀pa ti cóńtí, kà tɔɔ̀pa ti teù. Nìpa de ti tóńkú nuǹhetí yam̀ma-dà, kà ti há̰ cakú wɛbeèdi. ⁹ Pà de ti tóńkú è yònà pà pú ti yá̰á̰-ma-dà, è há̰ baà ti yá̰á̰ sukú, è ti tóńkú nìpa mɛ̀m̀pà kɔ̰́ńti-pá, kà ti há̰ baà fòù, è ti fá̰kápú, àmá pà pú ti kɔù. ¹⁰ Pà de ti pa̰kú-ma yaǹcɔ̰hàma kpɛ́ɛsá, àmá kà ti yàma baà nadi, è ti dìi pɛ́íhí, àmá kà ti tee kà nìpa dɔ́ɔ́di kání. Pà de ti tóńkú mɛ̀m̀pà kɔ́ɔ́-pa-dà yècḭ́ḭ̀, kà t'aá yè káá ye wɛǹni.

¹¹ Nɛ́na ti kpɛ́ɛpá Kɔ̀dɛ́ńtìpa-nà, ti nɛ cakáà-á-ma tenten mɛ̀mà péé-ma ti piidí mɛhɛká, ti pú nɛ sɔnà màcɔ̰́mà. ¹² Ti bɛkáà-á-ma ti dɔ́kàma sá̰á̰ma nɛ hḭ́ǹka, nɛ́na-dà kpenà nɛ yàma. ¹³ Múńdìkaà, n nɛ wɛì è yònà nɛ yòǹ-ma-dà n bííhí. Nɛ mɛ̀ɛ té dá ti sɔɔ̀na yècḭ́ḭ̀, nɛ mɛ̀ɛ té ti caka tenten mɛ̀mà péé-ma nɛ piìka mɛhɛká.

Nɛ dá pɛ́dá-nà fòùku kpɛ́ɛpá.

¹⁴ Pà pú hɔ̰́ pɛ́dá nɔtí boocí cìdɛ́ɛ́ kà tí dɔɔ̀di yoǹku. Ma cɔ̰́ɔ̰̀di-dà mɛ̀ɛ té dɛɛ̀, nɛ pú yònà é pɛ́ɛ́ pa̰á̰-nà-ma fòùku kpɛ́ɛpá yècḭ́ḭ̀ k'yè pú sudi. Ntɛ́ mìì coó-sa kó hḭmà é pɛ́ɛ́ nɔɔ́-nà mìì sḭ̀ǹ-sa? Yoo wenikú nà yḭ́ḭ̀pu yè pɛ́nì-í-ma? ¹⁵ Ntɛ́ Kídísì nà Wɛɛ̀ko kó hḭmà é yekà pa tɔɔ̀pa? M̀mɔ́ńya̰-dà péé weèdɔɔ̀o nà mɛ̀ǹǹ pú yòǹ-ko weèdɔɔ̀o pa cɔhàka? ¹⁶ Múnáma m̀mɔ́ḿma-dà péé Weèdi hɔ̰́ɔ̰̀ta nà wàci cɔhɔ̀ka? Ti yòǹ Weèdi mɛ̀nì fòù-di hɔ̰́ɔ̰̀ta-dà é n'yònà Weèdi mɔ́nní hḭ́mpú. Nì yɔ̀:

N kó n'fòù pa cɔhɔ̀ka-dà, é pɛ́ɛ́ pà n'cèǹtì-nà.

N kó n'yòǹ pa Weèdi-dà, kà pà yòǹ n nìku.

¹⁷ Ye kú kpɛ́mú-dà tee, nɛ yònà é yɛ̀ɛ̀-ma pa cɔhɔ̀ka,

nɛ dá pà m'múń-nà.

Nɛ dá yetá é pḭ́ń mìì pú weni-sá,

mɛma, mmí n kó nɛ codá-ma.

¹⁸ N kó n'yòǹ nɛ báàa-dà,

kà nɛ yòǹ n bíidahí nà bíipohí,

Bateó, nɔɔ̀ti wɛǹni yaǹn-dà mà hḭ́n.