Kɔ̀dɛ́ńtìpa Pɔkàdɛ́ɛ̀ta 5

¹ Ti yá̰á̰-ma è yɔ̀ ti wɔ̰̀ǹkù ti báá-kù mɛnkù tenkà hḭ́ńkà, kù yònà hɔ̰́ɔ̰̀ta-dà mɛ̀ǹtà kó pɔ́dá-ta daadí yènì. Kà tà há̰ pɔ́dà, ti yá̰á̰-ma è yɔ̀ ti káá hḭ́ǹka mɛhɛká hɔ̰́ɔ̰̀ta pà pú maá-nà-ta nìpa nɔ̀hi. Ye kú hɔ̰́ɔ̰̀ta, Weèdi-dà tà madí, tà mɛ̀ɛ kɔ́ɔ́ yɔ̀ɔmá. ² Ti mɛ̀ɛ kɔǹ-mà è kṵ́hú-nà yenì-ní ye wɔ̰̀ǹkù mɛnkù kú mɛhɛkà-ní, è bɔ̀hɔ̀ta ku kú dàhàka, tí wáńtá báá hḭ́ńkà kpɛ́kú-dà. ³ Kà ti báá mɛnku, ti koò pú kó wáńtá n'foó Weèdi yìhìka. ⁴ Kà t'aá baà péé wɔ̰̀ǹkù mɛnkù kú mɛhɛká, ti baà kó n'kɔǹ-ń-ma è kṵ́hú, kà náńkú ti yɛ̰̀ḭ. Yè pú yòǹ ti kpɛ̀i é tɔ̰ɔ̰̀ta-nà tenkà mɛnkà kú wɔ̰̀ǹku, àmá ti kpɛ̀i é báá ku hḭ́ǹka hḭ́ńkà kpɛ́kú-dà, k'yé teha kà fòùmu é nítá mìì yòǹ-sa kṵ́mú kpɛ́ɛsá. ⁵ Weèdi mɔ́nní ti pa̰à̰ sɔ̀do è ti ceí-nà ye kú niì-dà. Nì ti pɛ̰ḭ ni Sèdi, è kpɛ̀i tí n'yá̰á̰ tenten è yɔ̀ kááma nì kó wáńtá ti pa̰a̰-má wɛǹni, ma kpɛɛ̀namá-dà nì mun ti pɛ̰ḭ-má ye pesà-ní.

⁶ Ye kú kpɛ́mú-dà tee kà ti káá kṵnnɔ̀ǹci. Ti yá̰á̰-ma è yɔ̀ kà ti péé ti wɔ̰̀ǹkù mɛnkù kú mɛhɛká, ti pú kó n'tɔ́sí-nà Teó, ⁷ mìì tee-sá ti tṵ̀n ni cɔ̀ku nà dandaní-dà, ti pú tṵ̀n nà ti mádí-sa kú kpɛ́mú. ⁸ Kṵnnɔ̀ǹci-dà ti káá-ma tenten, ti mɛ̀ɛ kpɛ̀i-í-ma é yɛ̀dì ye wɔ̰̀ǹkù mɛnkù kú mɛhɛká é taá m'péé Teó pesá. ⁹ Ye kú kpɛ́mú-dà tṵ́mà tee, ti káà péé tḭ́ń wɔ̀ni ye wɔ̰̀ǹkù mɛnkù kú mɛhɛká yoo ti koò pú péé ku mɛhɛká, ti bɔhàta-má é m'pa̰kú ò naanà-sa, ¹⁰ è yá̰á̰ ti wɛnnì, ti kó wáńtá nɛɛ̀hi-í-ma Kídísì yìhìka k'ó ti sída. Ye wɔ̀ni, é bodá bá ti mɛ̀ǹǹ dɛ̀ɛ̀-ko de pa̰à̰-sa è káà péé teǹka, suusá yoo sḭ̀ǹya̰.

Weèdi tón é naaka nà nìpa nà Kídísì kpɛ́mú-dà.

¹¹ Ti yá̰á̰-ma mìì héé-sa é wampa Teó, ye kú kpɛ́mú-dà tee kà ti pɛnti ti kó hḭmpú kà nìpa é teha ti tonàpu. Weèdi ti yá̰á̰-ma tenten, n mɛ̀ɛ maàhu è tonà, nɛ yàma mɛhɛká, nɛ mɛ̀ɛ té ti yá̰á̰-ma sukú. ¹² Ti koò pú pɛnti è kó nɛ bɛka ti cɔ̰́ɔ̰̀di è yɔ̀ ti yòǹ Weèdi dehèpa mɔ́mpá-dà, àmá ti nɛ pɔ̰n bòdi-dà è yɔ̀ yé nɛ n'nadi nà ti kpɛ́mú. Ye wɔ̀ni, nɛ té kó dɛ́tá-ma nɛ kó tɛ̰́ná-sa tɔɔ̀pa mɛ̀m̀pà wá̰kánì-pa nà nìi dìi-sá tapaàdi, è pú wá̰kánì nà mìì péé-sa yàma mɛhɛká. ¹³ Kà ti yòǹ fìkapá, ti mà yòǹ nà Weèdi kpɛ́mú-dà. Kà ti mɛ̀ɛ yòǹ nìpa mɛ̀m̀pà kú yìhìka weni-pá, ti mà yòǹ nà nɛ́na kú kpɛ́mú-dà. ¹⁴ Kídísì dɔ́kàma-dà sṵ́n ti mɛhɛká, tḭ́ńti mɛ̀m̀pà yá̰á̰-pa è yɔ̀: Nìi òcɔ̰́-dà kpíi nìpa wɛǹni kpɛ́mú, ye wɔ̀ni kà nìpa wɛǹni é pɛ́ɛ́ óò kpíí-nà^a o kṵ́mú mɛhɛká. ¹⁵ Ò kpíi nìpa wɛǹni kpɛ́mú, è kpɛ̀i kà mɛ̀m̀pà kú wɛnnì fòù-pa, koò dá n'fòù pa cɔ̰́ɔ̰̀di kpɛ́mú-dà, àmá kà pá n'fòù o kú kpɛ́mú. Ò kpíi é yá̰ńtá pa kú kpɛ́mú-dà.

¹⁶ Mií-ì tee kà ti koò pú dìi òcɔ̰́ǹ nà nìpa kú diìdamá. Bá kà dekáà ti de dìi Kídísì ma kú tɔɔ̀ma, sá̰mà-ní ti koò p'óò dìi ma kú bookú. ¹⁷ Kà nìdo múń nà Kídísì, ò hɔ̰́ hḭn niìpàǹn-dà. O pa̰á̰ma kpɛ̰́m̀ma hɔ̰́ ka̰há-ma, kà pa̰á̰ma pààma é kaàdi. ¹⁸ Mii kú wɛnnì péé-nà-ní Weèdi pesá-dà. Nì tón é ti naaka-nà, nà Kídísì nì tɔn-kó-ní kú kpɛ́mú-dà. Nì mɛ̀ɛ ti púkà ye kú tɔmù, è yɔ̀ tí tɛɛ̀ní nìpa-dà kà ní tón é pà naaka-nà. ¹⁹ Weèdi de yɛɛ̀ nà Kídísì-dà é tón é naaka-nà nìpa, nì pú wɛ̰ntà pa sḭ̀ḭ̀ma. Nì mɛ̀ɛ ti kɔ̰́ɔ̰̀ wɛmá mɛ̀mà tóǹ è nakànì-ma-dà mɛní nà nìpa, è yɔ̀ tí mà caka.

²⁰ Kà mɛmá-dà, ti yòǹ Kídísì tɔn-pá-dà n'ɔ̀ɔ wɛmá. Yè yònà Weèdi nɛ yún-má-dà nà ti kú nùka. Ti mɛ̀ɛ nɛ sɛ́úkú-ma nà Kídísì yèdi, è yɔ̀ nɛ́ tón é naaka nà Weèdi. ²¹ Kídísì de kɔ́ɔ́ sḭ̀ḭ̀ma màcɔ̰́mà, àmá kà Weèdi óò towá ti sḭ̀ḭ̀ma, k'yé teha nà mɛnń kú kpɛ́mú kà tí kpáńtá niìcoópa Weèdi yìhìka.