Kɔ̀dɛ́ńtìpa Pɔkàdɛ́ɛ̀ta 4

Náńkú ti yon-kú nà Sèsíì kpɛ́mú o wɛmá cakàma mɛhɛká.

¹ Weèdi, ni pa̰á̰suumá mɛhɛká, nì ti kɔ̰́ɔ̰̀ ye kú tɔmù-dà, ye kú kpɛ́mú-dà tee yècḭ́ḭ̀ pú nampú-ma ti kṵnnɔ̀ǹci. ² Ti yedáà-á-ma yɔ́humú pa̰á̰ma nìpa sɔɔ̀-sɔ̀tì è pa̰kú-ma. Ti pú pa̰kú yècḭ́ḭ̀ nà seúma, ti mɛ̀ɛ pú wɔ̰nì Weèdi wɛmá. Àmá, ti cakú wɛbeèdi-dà pópóí è kpɛ̀i Weèdi yìhìka, bá mɛ̀ǹǹ dɛ̀ɛ̀-ko, ó cɔ́dí o yàma mɛhɛká é bantá è yɔ̀ ti cakú mɔ́ma-dà. ³ Kà ti wɛnaamá há̰ káà bìnì-nà pàcɔ̰́, mà bìnì-nà mɛ̀m̀pà féè-pa-dà, ⁴ mɛ̀m̀pà pú mà tà̰ǹtà-pa. Wɛɛ̀kupá wódo mɛ̀ǹǹ wódí-ko fòùkù mɛnkù kú hḭ́ǹka, ò bìkànà pa yam̀màhàka-dà è pú kpɛ̀i kà pá dɛ́há wenikú mɛ̀ǹkù sìkàdi-kú wɛnaamá mɛhɛká. Ye wenikú bɛkú Kídísì wɛhimú-dà, mɛnń mɛ̀ǹǹ yònà-ko Weèdi sukú. ⁵ Tḭ́ńti, ti pú cakú ti mɔ́mpá kú wɛmá, àmá ti cakú Teó Sèsí-Kídísì wɛmá-dà. Tḭ́ńti mɛ̀ɛkà, ti yòǹ nɛ dehàpa-dà nà Sèsíì kú kpɛ́mú. ⁶ Weèdi de wɛdà è yɔ̀: Wenikú é sikàdà binìku mɛhɛká. Ni mɔ́nní-dà mɛ̀ɛ hédà kà ni wenikú é sikàdà ti yàma mɛhɛká. Nì hḭn mɛma, è kpɛ̀i tí yá̰dá ni wenikú mɛ̀ǹkù sìkàdi-kú Kídísì yìhìka sá̰á̰ma-dà.

⁷ Ye wenikù há̰ yòǹ kpàtìdi-dà kà ti tì toó, tḭ́ńti mɛ̀m̀pà yònà-pa tá̰à̰ti caàka. Yè yòǹ mɛma, è kpɛ̀i kà bá mɔ̀ǹǹ dɛ̀ɛ̀-ko-dà é bantá è yɔ̀, ye kpàtìdì kpeetì mɛ̀ǹtì pú sá̰à̰-nà-tì tɔɔtí tìcɔ̰́tì, tì pú péé-nà-ní ti pesá, tì péé-nà-ní Weèdi pesá-dà. ⁸ Nìpa ti nɔɔ̀ǹta-á-ma tenten ti páàti wɛǹni, àmá pà pú nɛɛ̀ é ti pɛ̰ń-pɛ̰ntá. Wɔ̀ni nìcɔ̰́ kà ti yàma té yɛ̀dì, àmá ti pú kó hédá è pú n'dań. ⁹ Pà ti fá̰kápú-ma, àmá Weèdi pú ti wɛ́i, è ti hán teǹka, àmá pà pú hɔ̰́ nɛɛ́ ti kɔ̀ù. ¹⁰ Ti yɛɛ́-ma ti wɔ̰ɔ̰̀ka wɔ̀ka wɛǹni é n'yònà Sèsíì yɛkáàma o kpɛ́ɛdí, è kpɛ̀i kà nìpa é dɛ́há nà ti pesá o fòùmu. ¹¹ Tḭ́ńti mɛ̀m̀pà fòù-pà-ní, wɔ̀ka wɛǹni, kṵ́mú-dà ti yéńti nà Sèsíì kpɛ́mú, k'yé teha n'ɛ̀ɛ kú pa̰á̰mà-ní o fòùmu é fodá ti wɔ̰̀ǹku mɛ̀ǹkù kó kpíí-ku mɛhɛká. ¹² Mɛma, tḭ́ńti kó m'mɔdì-nà kṵ́mú-dà, kà nɛ́na dɛ́hù fòùmu.

¹³ Pà wà̰tà Weèdi wɛmá pɔ̀kàhi mɛhɛká è yɔ̀: N taà dandaní o hḭ́ǹka-dà, ye kú kpɛ́mú-dà tee kà n cakú o wɛmá. Tḭ́ńti mɛ̀ɛtékà, ye dandaní ni cɔ̰́ɔ̰̀di-dà ti yɛ̰ṵ̀ kà ti dehú. Ti dań-ma kpɛ́mú-dà tee kà ti mɛ̀ɛ té cakú o wɛmá. ¹⁴ Ti yá̰á̰-ma è yɔ̀ Weèdi mɛ̀nì yá̰hìnà-di Teó Sèsíì, nì mɛ̀ɛ té kó wáńtá ti yá̰hìna-á-ma kà tí m'péé-nà Sèsíì, é yídá ti fohìna tḭ́ńti nà nɛ́na o yìhìka. ¹⁵ Mìì mɛ̀ɛ ti tɛɛ̀hu-sà-ní miì kú wɛnnì, yè ti tɛɛ̀hu-ní nà nɛ́na kú kpɛ́mú-dà, k'yé teha kà Weèdi pa̰á̰suumá é dɔ̀hà é pidá é dontá nìpa kà pá n'káá dɔ́ɔ́di, é n'sɛɛ́ Weèdi é tṵ́má nì n'fa̰ntí.

Ti nɔ̀ǹci cɔ̰mú mìì ti ceí-sa-dà Weèdi hɔ̰́ɔ̰̀ta mɛhɛká.

¹⁶ Ye kú kpɛ́mú-dà tee kà ti yàma pú cɔ̰hú. Bá kà ti wɔ̰̀ǹku sɔ̰ɔ̰̀ku cɛ̰́ma cɛ̰́ma, ti sèdi mɛhɛká Weèdi ti tuɛhɛ̀nì-í-ma kpeèti daàka wɛǹni. ¹⁷ Náńcì ti yon-cì sá̰mà-ní, cì pú kpenì, cì mɛ̀ɛ káá nùdi-dà. Cì ti pa̰kú sɔ̀do-dà kà ti kó wáńtá dɛ́tá wɛkànamá sàma. Ye wɛkànamá kɔ́ɔ́ yɔ̀ɔmá, mà mɛ̀ɛ tṵ́mà cì ha̰tà-á-ma. ¹⁸ Mɛ̀ɛkà, ti nɔ̀ǹci pú cɔ̰mú niìya̰ pà dìi-sá kú hḭ́ǹka, àmá cì cɔ̰mú niìya̰ pà pú dìi-sá kú hḭ́ǹka-dà, è yá̰á̰ niìya̰ pà dìi-sá pú yókú, àmá pà pú dìi-sá kɔ́ɔ́ yɔ̀ɔmá.