Kɔ̀dɛ́ńtìpa Pɔkàdɛ́ɛ̀ta 3

Múnáma pààma dehèpa.

¹ Nɛ maàhu è tonà ti yònà é tṵ́má nɛ bɛka ti cɔ̰́ɔ̰̀di-dà ti yòm̀pu? Nkɛ́ɛ̀ nɛ maàhu è tonà yè békú pá ti kɔ̰́ɔ̰́-ní pɔ̀kàhi-dà yoo nɛ́na hì ti kɔ̰́ní, mɛ̀ǹhì kó m'bɛkú-hi è yɔ̀ ti yòǹ Kídísì tɔntɔdipá mɔ́mpá-dà é n'yònà tɔɔ̀pa hɔ̰mpú? ² Nɛ mɔ́mpá-dà yòǹ ti pɔ̀kàta pà wà̰tà-ta ti yàma mɛhɛká, kà nìi wɛǹni tà yá̰á̰ è tà kàǹ. ³ Mɔ́masí-dà nɛ yòǹ-ma Kídísì pɔ̀kàta ò wà̰haà-ta nà tɔmú ti pa̰à̰-pu nɛ cɔhàka. Ò pú tà wà̰haà nà wa̰hàpeǹfa nɛ́ɛmá, àmá ò tà wà̰haà nà Weèdi mɛ̀nì fòù-di Sèdi-dà. Ò mɛ̀ɛ pú tà wà̰haà tá̰à̰ka dawɛhí hḭ́ǹka, àmá ò tà wà̰haà nɛ yàma mɛhɛká-dà.

⁴ Daḿma ti káá-ma-dà ye pesà-ní Weèdi pesá nà Kídísì kpɛ́mú. ⁵ Mii mɛ̀ɛ pú kpɛ̀i é caka è yɔ̀ ti kó nɛɛ́ pa̰á̰ yècḭ́ḭ̀ nà ti cɔ̰́ɔ̰̀di, àmá ti nɛɛ́ma péé-nà-ní Weèdi pesá-dà. ⁶ Ye Kídísì-dà tee kà tí nɛɛ́ è yòǹ-nà múnáma pààma dehèpa. Ye múnáma mɛ̀ɛ pú péé-nà-ní kpɛ̰́ńtìnùdi pà wà̰tà-di, àmá mà péé-nà-ní Weèdi Sèdi pesá-dà. Kpɛ̰́ńtìnùka pà wà̰tà-ka kɔudì-í-ma, àmá Weèdi Sèdi mɛni kɔ̰́nì fòùmu-dà.

⁷ Ye kpɛ̰́ńtìnùka wɛmá, Weèdi de mà wà̰haà tá̰à̰ka dawɛhí hḭ́ǹka-dà. Nì mɛ̀ɛ de mà hɔ̰n tḭ́ń daadí é bɛka-á-ma ni wenikú sá̰á̰ma háá kà Ìsìdàyɛ́pa de hɛ̰ka pà kó wáńtá-ma Mɔ̀yísì yìhìka mìì tee-sá kà de sikàdi-í-ma. Ye wenikú há̰ de yòǹ wɔ̀ni cɛ̰́masí kpɛ́kú-dè. Kà kpɛ̰́ńtìnùka mɛ̀ǹkà kɔ̰́nì-ka kṵ́mú de bɛkáà ma kú bookù Weèdi wenikú kà fodà tḭ́ń wɔ̀ni, ⁸ Weèdi Sèdi kú tɔná fodáma pú kó bɛka ni wenikú k'yé ha̰tá? ⁹ Kpɛ̰́ńtìnùka kú tɔmú-dà de héé ká sída nìdo óò kɔ̰́ɔ̰́ yetádi. Kà mɛnka kú fodáma há̰ de bɛkáà Weèdi wenikú, Weèdi Sèdi kú tɔmú mɛ̀mù kɔ̰́nì-pu coóma, mu kú wenikú bɛkàma pú kó ha̰tá? ¹⁰ Ti múńtà kó nɛɛ́ n'yɔ̀, Weèdi wenikú mɛ̀ǹkù de fodà-ku dekáà wɔ̀ni pú kó nɛɛ́ beé-nà yenì kú kpɛ́kú, mìì tee-sá yenì kú kpɛ́kù kù ha̰tà-á-ma sàma. ¹¹ Kà niìya̰ mìì kó ka̰há-sa de káá wenikú sàma, ntɛ́ mìì kó yóka-sá kú kpɛ́kú kó n'sá̰à̰?

¹² Ye kú daḿmà-dà ti káá-ma, ye kú kpɛ́mú-dà tee kà ti wɛì è pú dàsi-nà yècḭ́ḭ̀. ¹³ Ti pú pa̰kú é n'yònà Mɔ̀yísì de hḭmpú. Ò de pikà o yìhìka-dà nà pɛ́ńkú, è pú kpɛ̀i kà Ìsìdàyɛ́ɛ̀pa é dɛ́há wenikú mɛ̀ǹkù de pú kó yóka-kú yɔ̀ɔmá. ¹⁴ Há̰kà, pà de kpenà-á-ma pa yam̀màhàka k'yé n'tee-nà háá nà yenì, k'yèe pɛ́ńkú baà káà pà pìci kà pà kàǹ múnáma kpɛ̰́m̀ma pɔ̀kàhi. Kù pú dedà pa hḭ́ǹka mìì tee-sá Kídísì mɛhɛká-dà kù hɔ̰́ deèda-má. ¹⁵ Háá nà yenì, kà Ìsìdàyɛ́ɛ̀pa kaǹ Mɔ̀yísì pɔ̀kàhi, ye pɛ́ńkú hɔ̰́ m'pìci-í-ma pa yam̀màhàka. ¹⁶ Àmá é n'yònà pà wà̰tà è yɔ̀pu, kà nìi fidí Teó bɛ́ka, pɛ́ńkú mɛ̀ǹkù ò pìci-kú hɔ̰́ deèda-á-ma. ¹⁷ Teó pà há̰ wɛì-ko kú wɛmá miì, mɛnń-dà héé Weèdi Sèdi. Kà Teó Sèdi há̰ péé-sa, cɔ̰́ɔ̰̀di teemá-dà hɔ̰́ yè m'péé. ¹⁸ Ti wɛnnì, pɛ́ńkú pú pìci ti yìhìka kà ti dìi Teó wenikú ti hḭ́ǹka è yònà díhikú mɛhɛká. Teó mɛ̀ǹǹ yòǹ-ko Weèdi Sèdi, hɔ̰́ ti peǹta-á-ma, kà t'óò n'yònà, kà ti wenikú é dɔ̀hà é n'wɛhikú, mií-dà héé ni tɔmú.