Kɔ̀dɛ́ńtìpa Pɔkàdɛ́ɛ̀ta 2

¹ Ye kú kpɛ́mú-dà tee n ta̰kadà-ma è yɔ̀ n pú tóńti nɛ hɔ̰́ɔ̰́hí k'yé teha kà n dá cɔ̰ha nɛ yàma. ² K'yè yònà mmí cɔ̰háà nɛ yàma, woò mɔ́ńn-dà kó tṵ́má n pa̰a̰ yaǹnaakú? Nɛ́na n cɔ̰háà-pa kú yàma-dà kó kù nà n pa̰a̰? ³ N pú kpɛ̀i é tɛ̀ni nɛ hɔ̰́ɔ̰́hí kà mɛ̀m̀pà de yònà é nakàna-pá n yàma, kà pá mà cɔ̰ha. Ǹtɛ mìì tee-sá n nɛ wa̰à̰haà-sà miì ká n yè wà̰hà. N mɛ̀ɛ yá̰á̰-ma tenten è yɔ̀ kà n yàma nadi, nɛ kpɛ́ɛmá mɛ̀ɛ té hɔ̰́ mà n'yòǹ-ń-ma. ⁴ Mɛ̀ɛkà, pɔ̀kàtà n nɛ wa̰à̰hu-tà mɛntà-ní, n tà wà̰hu nà yaǹcɔ̰hàma-dà, nà dawòni, nà nuǹnɛ́ɛmá sàma. Yè pú yòǹ n kpɛ̀i é cɔ̰ha nɛ yàma, àmá n kpɛ̀i é nɛ bɛka n dɔ́kàma wɛhimú sá̰á̰ma-dà nɛ hḭ́ǹka.

Bútá mɛ̀ǹǹ a yetà-nà-ko a pa̰à̰-sa.

⁵ Nìi tɛɛ̀ tḭ́ń wɔ̀ni yaǹcɔ̰hàma nɛ cɔhàka, ò pú mà hḭn è kó cɔ̰ha mmí kú yàma cɔ̰́ɔ̰̀di, àmá ò mà hḭn è kó cɔ̰ha nà nɛ kpɛ́ɛmá-dà, bá kà n pú kpɛ̀i mà sṵ́ná, n kó n'yɔ̀ nɛ pàcɔ̰́ yàma-dà ò hɔ̰́ cɔ̰ha-má. ⁶ Ye kú yanǹ kú bookù-ní, kà nɛ dɔ́ɔ́di yɔ̰́ń o toòka, yè sà-á-ma. ⁷ Ye kú kpɛ́mú-dà tee sá̰mà, nɛ yònà-ma é bútá ò pa̰à̰-sa dàhàka, é yahikàna o wɔ̰̀ǹti k'yé teha kà yaǹcɔ̰hàma sàma dá ò sɛ̀da. ⁸ Mɛ̀ɛkà, n nɛ cɔɔ̀hu è yɔ̀ nɛ́ bɛka nɛ dɔ́kàma o hḭ́ǹka. ⁹ Mìì tee-sá ká n nɛ wa̰hà ye pɔ̀kàtà mɛntà-ní, mií-ì héé n nɛ bɛń é dɛ́há kà nɛ sɔ̀do bii kà nɛ kó tṵṵ̀na n nɛ cakáà-sa wɛǹni. ¹⁰ Nɛ kó bútá-ko wɛǹni sḭ̀ḭ̀ma dàhàka, n mɛ̀ɛ té kó mà bútá-ma. Mmí kú bɛ́ka, kà n bútà òcɔ̰́ǹ kú sḭ̀ḭ̀ma dàhàka, k'yècḭ́ḭ̀ péé è békú ń yè bútá dàhàka n mà hḭn nà nɛ́na kú kpɛ́mú-dà Kídísì yìhìka, ¹¹ k'yé teha kà Wɛɛ̀kupá wódo dá tódá yudí ti hḭ́ǹka. Ti mɔ́mpá mɛ̀ɛ yá̰á̰-dà sukú ò ti pɛnti-nà-sa.

Mìì káá-sa Pɔ́dì wantafɔ̰̀di.

¹² N de ta̰ntà-ma Tòdòwásì yɔtí è kó caka Kídísì wɛnaamá, é tɛ̀i è hɔ̰́tà Bateó n kpetà cɔ̀ku-dà tenten è yɔ̀ ń mà caka. ¹³ Nà mɛma há̰kà, n yàma de pú kaàdi dɛ́dɛ́í mìì tee-sá n de pú dɛ́hà n kúcàa Títì. Mií-dà tee kà n de cɔwa Tòdòwásì kpɛ́ɛpá é ka̰há Màsèdɔ́nì teǹka.

Nɛdáma Sèsí-Kídísì ti kɔ̰́nì-ma.

¹⁴ Tí duntà-nà Weèdi nà nì ti kɔ̰́nì-ma nɛdáma wɔ̀ka wɛǹni nà Kídísì kpɛ́mú. Nà tḭ́ńti-dà nì héù-ma kà nìpa ò yá̰ní páàti wɛǹni, é n'yònà tùdàdésa nɔ́kú hɔ̰́ pidáma páàti wɛǹni. ¹⁵ Ti yònà Weèdi yìhìka, tùdàdésa-dà nɔ́ɔkpekú kpɛ́ɛsá Kídísì nì kɔ̰́ɔ̰̀-sa. Ti mɛ̀ɛ mà yòǹ-ń-ma mɛ̀m̀pà dɛ́ɛ́kú-pa fḭ́hìnamá cɔhɔ̀ka, nà mɛ̀m̀pà féè-pa cɔhɔ̀ka. ¹⁶ Mɛ̀m̀pà féè-pa pesá, ye nɔ́kú yòǹ kṵ́mú nɔ́kú-dà, è kṵǹ-nà kṵ́mú mɛhɛká. Mɛ̀m̀pà dɛ́ɛ́kú-pa fḭ́hìnamá, kà kù yòǹ fòùmu nɔ́kú è kṵǹ-nà fòùmu mɛhɛká. Woò mɔ́ńn-dà há̰ kó nɛɛ́ pa̰á̰ ye kú tɔmù-ní? ¹⁷ Ti pú yònà tɔɔ̀pa dɔ́ɔ́di mɛ̀m̀pà wɔ̰nì-pa Weèdi wɛmá è pɛnti cɔ́ǹti tìcɔ̰́tì. Tḭ́ńti, Weèdi-dà ti tɔn, kà ti cakú ni wɛmá nà yàma màcɔ̰́, ti mɛ̀ɛ mà hɔ̰n ni yìhìka-dà nà ti múń-ma nà Kídísì.